أكثر حلى أو حلويات تسوينها

السلام عليكم ورحمة الله وبركاته
كيفكم أخواتي ؟إن شاء الله بصحة وعافية انتم ومن تحبون
موضوعي بخصوص الحلويات اللي نسويها دائما،ياريت كل وحده تدخل تكتب الحلى اللي تسويه ونتبادل الخبرات مع بعض،عن نفسي أكثر شي أسوي بسبوسة وهذي طريقتها،معتمدتها وماأغيرها،ومقاديرها بالكوب والملاعق القياسية:
كوب سميد،كوب جوزهند،نص كوب زيت،نص كوب سكر،علبة زبادي 200جرام،علبة قشطة 155جرام،بيضة+ملعقة صغيرة فانيلا،ملعقة صغيرة بيكنج باودر.
أول شي أسخن الفرن لدرجة حرارة 170درجة،وأدهن صينية متوسط بالطحينة،أخلط المكونات كلهاوأصبها في الصينية،أحيانا أزينها بجوزالهند أو المكسرات،وبس أخبزها من تحت لمدة45دقيقة ومن فوق حتى تصير ذهبية،أطلعها من الفرن وأصب عليها الشيرة الباردة اللي مجهزتها من بدري وهي عبارة عن كوب سكر+نص كوب ماء،أحيانا أحط معاها هيل أو فانيلا لمجرد النكهة.
وماتحلى غير مع القهوة،وسلامتكم.