صعفق غير حياتي!!!! (لاتفوتكم هالقصة)

الزين زين لو توه قايم من النوم و الشين شين لو تروش و مدري وش سوا كل يوم
8
8
حكمه تسذب ولا تمت للواقع بصله ..!

هذا الموضوع اهداء الى كل شيفه على وجه الارض عشان تعرفون ان الشين نعمه وان الزيون
يتعبون نفسيا ً وجسدياً وكل شي يعني لو نفكر فيها في مجتمعاتنا ما ينضل و تصكهم العين و
يتدحوسون الا الزيون..! و ما ينخطف و يصير فيهم جرائم الا الزيون..حتى المشاهير الطخمان تصوير
و قلق و ينشبون لهم في كل صغيره و كبيره بحياتهم..! يعني من جد تعذيب المهم مالكم بالطويله ابقولكم
سالفتي عشان تعرفون قيمة الشين >>>اسم اني كتبت مقدمه ..!
خلاص درعموا في الموضوع
7
7

في ذات يوم سمرمدي ومع شروق اشعة الشمس البرونزيه التي سطعت في خشتي
و تغلغل النور داخل عيوني لين طار النوم مني ..مشكلة اهلي ملحطيني و غرفتي ما فيها
ستاير و كنت احط شرشف خفيف و امسكه بشباصتي و شكلها طاحت الستاره>>>إغ يا حياة الشقا
جلست ساعه اتمغط على السرير و افكر وش ابسوي اليوم تذكرت ان وراي الليله عرس ويبي
لي اقوم اتجهز ..يمكن تشوفني ام العريس و تخطفني بنظره خطافيه واصير مرت ولد

والبس الفوسطااان الابيض و امسك مزهرية ورد والكعب الي يقرقع مع كل مشيه وشعري هابط
و متربع فوقه التاج مهوب منتفش و طاير مثل كل ابو دايم
و اطلع و اركب قدام في السياره همن اروح السوق و اتقضى و البس ملابس جديده موب كل شي
موروث من امي مزنه الله يرحمها..في هذه اللحظات ارتسمت الضحكه على محياي المخور لين حمر
وجهي من المشق الي فيه>>>الله من الطماله في هالخشه ..!
ما خرب علي حلمي الا صراخ امي الله يهديها "هااااااااااااااااااااااااايدي و تبن" توني هه ابحتسي
ابقول كلمه الا والباب يدبتس بقووه واسمع امي بلهجة زجر و وعيد "هديه و وجع حاقرتني الله يحقر
رويستس يالسبهه ساعه انادي .!! "
ارد عليها وانا يدي على اذاني من صراخها " يمه لا تظلميني جالسه افكر وش البس في العرس
الليله " ما عطتني فرصه اكمل و تقولي تسفهيني عاد ما يشتغل عندتس الا نظام واحد يا تفكرين يا تسمعين ؟!!
يعني من حلاة هالخشه الله باليني بتس وبختشتس الي تخلي الواحد يستحي يضفتس معه لأي مكان
لو سألوني الحريم وين بناتس اقول ما عندي الا عيال ما رزقني الله ببنيه استحي اقولهم هالرقطاااء بنتي
انا ما قدرت اتحمل و قامت عيوني ترقرق بالدموع و انحبس الحتسي في حلدزي من طعنات حاتسيها
مخشت مشاعري امي كل مناسبه تسمعني من هالحكي انتس شينه وشيفه ومحد باغيتس و مع هذا
اكل تبن اسكت ولا اقول شي

جت و نزرتني ثانيه قومي سوي لأبوتس و اخوانتس فطور خلينا نستفيد منتس شوي دايم متربعه في
ذا الكنيسه و سافهتنا والله يا هي حسوفت(ن) عليتس لو نأجرها ونسكنتس في بيت الدرجه اصرف..!

طلعت من غرفتي و اول ما اشوف الدرج وانسبه ..درج بيتنا بالنسبه لي الملاهي حقتي
امحط عمري عليه و اتزحلق لين اوصل حدر و طراخ على خشتي واقوم بكل سباهه وانا فاقعه ضحك
و مبسوطه وامي تصاارخ يالسبهه منتب ناقصه عاهات انتي تخربين و يطلع لتتس ثقب و يرجعتس
لنا المقرود الي بيضفتس ..!

هذا كان نموذج من حياتي بأختصار اضطهاد غير طبيعي كلي يوم سب وتحطيم و تهزيء من امي
..و ابوي ما يعطيني وجه دايم لاهي في شغله اللي يسمعه يقول هامور و هو دايم متكي في
الاستراحات لين اخر الليل و سهرات مع الشله
هذا غير المصارعات الي مع اخواني لين صرت حريفة كراتيه..!

مليت من حياتي و قلت ما فيه مفر الا اني اعرس و افك عمري كل ما شمت ريحة مناسبه ولا عرس
ارز خشتي حتى لو جيرانا الي عندهم عرس دبرت لي بطاقه و رحت حتى لو اضطر الامر للتزوير
كل شي يهون عشان عريس المستقبل ..

جاء اليوم الموعود الي هو عرس ولد جيران عمي!! وكنت احوس في غرفتي اتجهز والطخ في
خشتي من هالاحمر و الاخضر و ازحلق المسكره على رموشي الي ما بقى منها الا شعرتين
من كثر ما اغطس رموشي فيها ..!

و امعط كشتي بقوه واربطها لين بغت تنقز عيوني من محلها ومن كبر عرادتي شوي و الا
وتنكسر الشباصه وتصقع في الجدار و ينتفش شعري ثانيه و تنكمش عيوني في محلها
..دخلت علي امي في هاللحظه و صرخت ورا شكلتس كذا من مروعتس..؟؟!!
قلت لها وشو تراه الموضه >>>طراه ان كل ما شافوا شي عاهه قالوا تراها موضه ..!

عطتني نظره مخيسه وقالت الله يخلف عليتس جيبي عباتس بس و انزلي ولا تدرين
لا تأخرينا موب لازم عبايه ما عليتس اثم انتي ما في وجهتس اي معالم فتنه

ابتسمت و قلت في نفسي وهـ يا يمه وش هالتفتح ليت كل الحريم مثلتس >>>لأنتس كمخه
ايه يا هايدي قريح قبل انسى ان سألتس احد من انتي بنته لا تقولين الحصي >>امون على امي حصه
وخليتس حرمت(ن) عاقله كود الله يجيب حظتس في هالعرس ونفتك منتس
طلعنا ورحنا للعرس ..دخلنا القصر وامي بدت تسلم على العالم و استلمت حش و ضحك و سواليف
وفقش مع الحريم وكلهم يسألونها نذكر عندتس بنت وينها ما كبرت ..!؟

و تتوهق امي و صرفتهم بأني دافوره ومتحظنت(ن) الكتب حضن من حبي للدارسه ومنيب احب
الطلعات والروحات حسوا الحريم من حتسيها اني طخمه ولا كان ما لفزتني في البيت ..ما يدرون
اني اول ما جيت نطلت عباتي و انصى المنصه اردح اتميلح ابي احد يناظرني ..!

كنت ارقص و اردح على كل اغنيه حتى في الموال استنتزل لين سوو حركه وسخه الطقاقات بدو
بالاغنيه وجلست ارقص ثم وقفوا جروني الله ياخذهم لقطت وجهي قدام العالم ..تحسبوني استحيت و وقفت ؟؟
اطقع ما اشوف البشريه كملت رقص و مطامر والناس تناظر وش هالنشاط في هالمهبوله ..!
وانا منبسطه على نظراتهم وازيد رقص احسبهم خاقين معي واجلس اتفنن في الحركات ..شوي الا
واحس بدوخه واعياء شديد اللي سفطني من طولي الي ما تعدا متر ونص وانبطح على الارض ..و
يجتمعون علي العالم والطقاقات تحمسوا مع الزار و يزيدون في الطق وانا اتحدوس على الارض و
عيوني مقلبه ..!
قاموا الحريم يصارخون من الروعه الا واصرخ صرخه مدويهبصوت الجني صعفق ..!

سكتوا العالم وانا تسني هجدت و اقوم من مكاني وانا منزله راسي و انزل من المنصه واجلس على
الكرسي ..يوم جلست و تواسيت الا والجني صعفق يحاتسيني "يا مال الكسار يا هايدي قريح ما مليتي
؟ كل يوم اشوفتس في كل عرس ناقزة لي وكل مره تجين وتهابدين فوق روس عيالنا واحد من
اخواني طاح غيبوبه بسبب مطامرتس الله ياخذتس والله ما اطلع منتس ابردها لتس ابحوستس لين اطلع حرة اميمتي..!
وانا اسمع كلامه و منثبره في مكاني و طاقتني الروعه منهو ذا و وش يبي .؟!

و كل ما جيت احتسي واقول كلمه بس ابي اسأله وينك قاعد(ن) فيه ولا من انتي الا و يجي يقبصني
مع شحيماتي و تخنقني العبره واسكت لين فجأه جلست اضحك تسني مهبوله اثاري صعفق انبسط
على هالشحيمات يالله من فضلك وجلس يدغدغني <<< ولو خبيث هالجني

خلص العرس و رجعت البيت و صعفق ما زال ساكن فيني حالف(ن) ما يطلع لين يحوس مريري
عاد انا كنت مرابطه في غرفتي ما اقدر اطلع بسببه ساجني وامي ما طقت لي خبر ولا سألت عني
و دايم جالسه في سريري و اتنح مع بنات افكاري المخيسه و افكر في اهلي الزلايب ساحبين علي و
لا فقدوني و صعفق يقرق فوق راسي وانا سافهته مدري وش يقول شوي وتدمع عيوني سكت صعفق
لحظتها وسألني وش فيتس وش مضيق صدرتس ..خلاص سولفي معي ما عاد(نيب) قابصتس
قولي كل الي في خاطرتس ولا يردتس شي ..وهنا طحت في نوبة بكاء عنيفه هالجني من كم يوم
عاش معي حس فيني و رحمني و اهلي وهم اهلي ساحبين علي

جاء صعفق ضمني حسيت ان احد مسكني بس مدري وش وضعيته الوكاد اني حسيت بالحنان الي كنت
محرومه منه وفكيتها صياح زود يوم حسيت اني ارتحت شوي جلست اشكي له عن اهلي ومعاملتهم
لي و محد يقدرني منهم ودايم يقولون لي اني شينه و محد(ن) باغيني و الي يخليني اطامر من عرس
في عرس وافقع راس اخوه اني ابي احد يشوفني ثمن يخطبني واعرس و افتك منهم

تعاطف معي صعفق وجلس يواسيني ..يعني شوفي يا هايدي انتي منتب شينه مره لو ما يجي
منتس الا هالشحيمات وطيبة قلبتس يا قلبي ..!!!!!!
انصدمت من كلمته ..وشو قلبي !!!
ما قد سمعتها الا في المسلسلات و القصص محد قد قالها لي على الهواء مباشره رجعت
سألته وش قلت ؟؟؟
شوفي يا بنت الحلال انا والله كنت ناوي احوس حياتتس واخليتس تكرهين عمرتس لين تتمنين
انتس تطبين في مسبح فاضي عشان تنتحرين ..!
بس بعد ما عاشرتتس و عرفتس زين و حسيت بحنانتس و طيبة قلبتس تغير الوضع و بدا حبتس يتغلغل في اعماقي ..!
في هاللحظه اغمى عليه من هالحتسي و يصقعني ذاك المخمس الي قومني
ثانيه..وش فيتس انتي وراتس كذا مسبوهه ؟؟
سكت و كنت مستحيه منه طبعاً انا ما اشوفه مختفي كنت اناظر فراشي وابتسم الا و تدخل امي
"اللهم لك الحمد والشكر يالله ان تعافيها ولا تبلانا !! وش تضحكين عليه يالسبهه ؟؟
الا اقول ما شفتي كتاب الطبخ حق ام محمد "
قلت لها لا..! و تطلع وتصقع بالباب وراها ..حقد صعفق عليها قال هايدي ما عليتس منهم ابقولتس
كلام بس ركزي معي ولا تفهين ثانيه و يغمى عليتس و ابحل بتس..!
سم يا بعد الدنيا كلها قل وش عندك
صعفق بكل حنيه : وهـ بس قسم انتس تنشرين بعظام الدنيا كلها >>>هذي مدحه عندهم
انا اللحين صكيت الـ 150 الي كبري عندهم عيال خاطين اشنابهم ..طارت عيوني قلت لا
ياتسبدي اللي كبرك متحللين في قبورهم من 50 سنه اقل شي ..!
كلي تراب يالكمخه وخليني اكمل نسيتي اننا غير عنكم ..؟!

شوفي وش رايتس اخطبتس من ابوتس على سنة الله و رسوله عشان تصير الجلسه الي بينا
شرعيه يكفي اثام خصوصاً ان علاقتنا بدت تاخذ منحنى ثاني

و شفتي هذولي بنات جيرانكم التسلاب الي يتهزون فيتس و يقولون الله يعين الي بياخذتس
ابجي لأبوتس بصورة هامور اختاري بس من تبين خشته واجي اخطبتس و انتي تدلعي قولي
مابي ابكمل دراستي حتى لو انتس ما تدرسين بس يقالي تتغلين وانا ابنشب لهم و اخطبتس و
نعيش احلى عاشقين كل هذا عشان يعرفون قيمتس و نعلمهم من هي هايدي
رديت عليه بدلع صدقي : وهـ يا صعفق قسم بالله اني احبك وارتحت لك و ودي اعرس عليك
الليله واعيش معك طول عمري.. يا ليت تجي بخشة دحيم ولد جيرانا

صعفق:وش دحيم بعد يا وجه الفقر شوفي في عارض ازياء سعودي خاقين معه بنات جيرانكم
و بنات اخوالتس بجي بخشته و بتشوفين وش يصير توكلنا على الله ..!

و يجي بكره العصر الا و يزهم على ابوي و يقوله اني واحد ابيك في موضوع وبجي اتقهوى عندك
العصر ..توه يسلم من صلاة العصر الا والبانوراما ملبقه عند باب بيتنا و ينزل ذاك الاطخم الطويل
العريض و ذراعه الايمن مصفط(ن) بشته عليه و الجيران يطلطلون موب مصدقين من ذا الي زايرنا..!!

المهم انه خطبني و كنت اتدلع و ابوي بغى يتوطاني وش دراسته بتاخذينه غصب ما صدقنا
انتس تنخطبين و امي منصدمه يوم شافتني اقول ابكمل دراستي بدون شعور قالت لأبوي قلهم
اني موافقه بتعرس عليه !!

جاء اليوم اللي كنت احلم فيه و كان عرسنا في الربع الخالي لأن اغلب اهل صعفق ساكنين هناك
و اهلي ما قالوا شي هماه هامور اكيد ان عنده سالفه يوم يسوي عرسه في الربع الخالي ..!

و كل العالم حظروا عرسي و كلن يحتسي فيه و رجلي المزيون و حظي الاطخم الي جمعني معه ..
عشت احلى ايام عمري مع صعفق كان جني مستقيم و رومنسي ما في كلمة حب و عشق الا
قالها صار يكتب فيني دواوين شعر و خواطر من كثر ما يحبني ..و مدلعني الى حد الثماله أي شي
اطلبه يزرق لمكانه و يجيبه مره شفت طقم على مرت خالي و خقيت معه ابد ما عاقت كلها دقيقتين
الا والطقم قدامي ..اي شي ابيه بس أشر عليه و يجيبه ..!!

في يوم من الايام كنت منسدحه في الصاله على الكنب و هو متربع في الهواء و معه ببسي عاد اذا
صار ماله خلق يصير مختفي و انا اشوف الببسي يتحرك يدخل في اثمه و اسمع صوت بلع و بس ولا اشوفه
شوي الا قمت اكحكح و بطني يعورني و اروح الحمام (وانتم بكرامه) و ادوخ و يغمى علي
و يركض صعفق و يطير بي للمستشفى لا يكون تسممت ولا شي كنا البارح متعشين عند حماتي
عفريته وحاطت(ن) اكل مدري وشو وقلطت معهم خاف اني استكرت اكلهم وتعبت منه ..!!

دخلوني غرفه وسووا لي فحوصات وكشف وتجيني الدكتوره تقول انتي معرسه؟
قلت ايه ..قالت ايه مبروك تراتس حامل و تنفجر اسارير صعفق ..يعني واخيراً ابشوف عيالي ..!
و عطتني موعد بعد شهرين عشان تكشف على الجنين و تسذا ..رجعت البيت و تزيد جرعات الدلع
معيشني ملكه متربعه في سريري و ما غير افرم عشان نغذي هالبزر ويطلع صاحي و كنا نفكر وش
نسميه لو ولد بنسميه عظيمان على جده السابع الله يرحمه وان تسانها بنت بنسميها خيزرانه على امه ..
رحت للمستشفى ابي اكشف على جنيني وفلذة كبدي واشوف وش هو من لحيه عشان اروح اتقضى
له.. يوم دخلت حق الاشعه واطلع لهم كرشتي الا وتنصرع الكتوره ..
ايه ده بطنك منتفخ ودي اعراض حمل بس فااااااضي ما فيش حاقه !!!

قلت ايه ما عليتس اجل على عمانه و انزل بلوزتي و اطلع و ارجع للبيتنا وصلت للشهر التاسع
و توني ما ولدت ..! قلت لقرة عيني صعفق وش سالفة ذا البزر متى بيطلع ابصك الشهر العاشر و
هو ما طلع بيجي بعير الظاهر !!

شوفي حنا مجتمع ديموقراطي ما عندنا مثلكم تسع شهور ثمن تولدين ..متى ما بغى يطلع البزر طلع
له حقوقه بس ما عليتس ابسأله لتس و اشوف عنه متى ناوي يطلع على هالدنيا ..و يجي يقرب من
كرشتي و احس باشياء جوا تحوس و ينادي الولد اقول متى ودك تطلع ؟؟
و يرد حشاشة جوفي :والله فيذا براد وسعة صدر و متى ما بغيت اكل يجيني الاكل مطر من كل
نوع يكفي اني اشوفكم وش تسوون
اقول يالداشر اطلع ولا يكثر ولا ترى ابجي انفضك
قال خلاص درب هذاني ابطلع و تطقني الروعه جت الولاده !!

قالي صعفق لا ترتاعين روحي الحمام وفقي اثمتس وطرشيه ترى ولادتنا ماهنا اسهل منها
و صدز رحت وطرشت و تزحلق في المغسله على شكل كوره ارتعت انا وش ذا الولد هذي اخرتها !!
و يجي ابوه يضحك يقول عظيمان وليدي بلا استهبال هذي اولها قم سلم على امك وحب راسها ..
وتختفي الكوره و احس بأحد يجغفني ولا ادري وشو ..! صار الولد مرره على عمانه جني 100%
ما في امل اشوفه الا لازم يتشكل بصورة احد وكل يوم يجي بخشة واحد ..

ومع مرور الايام والسنين و يكثرون عيالي و يطلع عندي 9 في خمس سنين <<<جني بعروق جيزانيه !!
شي على خواله بس انه عاهه وشي على عمانه مثل اخوه عظيمان واللي يجي مخلط يمشي
بدون رجول يعني نص ونص ويالله من فضلك عايشين احلى عيشه ..

صغر علينا البيت و قررنا نشتري بيت ثاني و اكثر ما فيه جدرانه والبيبان يتفننون وهم يمشون
ويدخلون مع الجدار يقفلون بيبانها و يضيعون مفاتيحها و انا يا عميري اجلس ساعه ادور المفاتيح
ابي افتح البيبان عشان امر.. واحد من عيالي الي نص ونص سبهه يدخل واذا وصل عند بطنه وقف
ما قدر لأن الجزء الباقي طالع علي ما يقدر يخترق الجدار و دايم ننشب معه ومع ذا الجدارن
و نجلس ساعه نسحب فيه عشان نطلعه ..

ومرت(ن) من المرارير جاني صعفق قالي ترى عندي مهمه يمكن يبي لها شهر كذا وارجع وبكره
ابمشي ابيتس تنتبهين لعيالنا زين و قولي لهم ان كورسات الزار ان جيت ان شاءالله اباخذهم في
عرس دواسر يوسعون صدورهم بس بعد ما ارجع بالسلامه ..

ويضيق صدري و اودع حبيب قلبي و زوجي صعفق وانا قلبي ينغزني حاسه انه بيصير شي
كان عنده مهمه يدخل في واحد مزعج(ن) حكومتهم و وكلوا لهم هالمهمه ولا على رقبته وما كان
منه الا انه ينفذ اوامرهم و يدخل في هالرجال ..راح صعفق وغاب مده و صرت انا و عيالي بلحالنا
في هالبيت و عندي 3 شياطين يطبون في بيت الجيران تالي الليل و يروعون بناتهم يفتحون الانوار
و يسكرونها و اذا قاموا يصارخون يفقعون ضحك ولا يحركون دواليبهم و الا يمعط شوشة وحدت(ن)
منهم مطلعين ريحتهم لين تناحشوا الجيران و صارت الحاره فاضيه وما فيه الا حنا وبيت جنبنا
ابوهم قعيطي و لا يبي يغير بيته و متمسك فيه ..لين جا اليوم الاسود الي يجيني فيه ولدي البكر
عظيمان ويقولي ان ابوه ودع الدنيا وان الشخص الي دخل فيه راح لشيخ معروف وقرا عليه لين
مات ابونا تقفل الدنيا في وجهي وانهبل واجلس حداد عليه وعيالي حولي يواسوني والناس تدخل
وتطلع في هالبيت يعزون وانا ما غير اصيح واتذكر الايام الخوالي و وشلون صعفق غير لي حياتي
وعشت معه احلى ايام عمري وجبت عيال مهبل و وسعين صدر و حبيتهم زود لأنهم يذكروني بريحة
و صنان ابوهم صعفق الله يعفو عنه و يرحمه

جارنا النذل صاير(ن) كنه مسمار جحا هو الوحيد الي بقى في هالحاره و فايحت(ن) تسبده مننا كل يوم
يروح يشتكي يدور لنا سالفه يبي يوهقنا وانا اقول لعظيمان تراك اللحين جني كبير بحسبة الوالد الله
يرحمه شف شغلك معه وكل يوم يروحون لبيتهم و يحوسون جارنا وعياله و الحمار ما تأدب ما زال
يدور لنا المشاكل جا يوم قالي عظيمان ان فيه عرس دواسر و بيقلبونه زار و يبون يروحون له هو
واخوانه قلت ابد روحوا وسعوا صدوركم بس لا تتأخرون كثير تراني اللحين بلحالي مهوب مثل اول
وطلعت للحوش اودع عيالي و يركبون السياره و كانت تتحرك وهي فاضيه وانا اويدز مع الباب و
اقولهم شوي شوي لا تسرعون الله يحفظكم ..!
واثر ابو جيرانا هالتسلب يطل علينا و شافني احاتسي سياره فاضيه ثمن تمشي وينهبل و يروح
يشكيني و يقولهم اني مهبوله واني ازعج الجيران وامشي في الشوارع لابسه بدون ملابس ..!

ويجون شهار و يقشوني عندهم و انا اصارخ قسم بالله اني صاااحيه منيب مهبوله خلووووني يكفي
مات زوجي و الدنيا مسوده في وجهي تبوني اخر عمري ادخل شهاار!!!

و الله ولا همهم يمسكوني مع شوشتي و يتلوني على هليكبوتر وطيران لشهار و ينطلوني في غرفه ..
و عيالي رجعوا ولا لقوني و علمومهم ربعهم اني منجطله في احدى غرف شهار ظلم و بهتان !!

ويجون عندي لا تضيقين صدرتس يا اميمتي بنصير كل يوم نجيتس و هالهيس ابو جيرانا نوريتس فيه
ان ما خليناه يربط عمره في مروحة مقلطهم ما نصير عيال صعفق ..!

ترى انا اللي اكتب لكم السالفه اللحين عظيمان و يوزر امي هايدي معي ما عندهم نت في شهار
وتراها تحبكم و تقول حللوني كلكم تساني غلطت ولا حشيت في احد..
ومعليش على المصاله و طولنا عليكم شويتين..

هايدي

منقوووووووووووووووووووووووووووووووووول