مواقف بنتي مع ام زوجي...

ماني عارفه من فين ابتدي؟؟ انا عندي بنتين وحده 8 سنوات ووحده 7 سنوات

وانا ساكنه مع اهل زوجي في نفس العمارة بس كل واحد في بيت مستقل, بس اعطيكم نبذه مختصره

عن ام زوجي < حقت مشاكل, تدور على اخبارنا عن طريق عيالنا او شغالاتنا, زعوله جدا

يعني لو اقعد سنه ما اطلع من البيت وبعدين اروح على مطعم ,تقلب براطمها وتكشر وتقول ما

زهمتوني مع انه تخرج تقريبا شبه يومي, تحب بنتي الكبيره لأنها جريئة وتحب تتكلم ودايم تسحب

لسانها وتسألها عن اخبارنا, تقريبا ما عندنا خصوصية>

بقلكم على مشكله صارت قبل شهر بس عشان تقدروا قد ايش تأثير هذه المشكله صارت على بناتي>

المهم: ام زوجي فيها حركه بايخة اذا ما نزلت عندها وزعلت مني تمسك بنتي الكبيره وتقولها

<ليش مامتك ما نزلت عندي ها؟؟ لأني ماني امها لو كنت امها كان نزلت عندي>

انتبهوا بس لعمر بنتي وللكلام اللي ينقال لها.. المهم تطلع بنتي مشحونه عندي وتقلي ليش ما تنزلي

جدتي؟؟ مو حرام عليكي هي مسكينه قاعده لوحدها؟؟ والله يا بنات مدري ايش تقول لبنتي وخلت

بنتي واقفه في صفها ضدي.

موقف ثاني : العام كان زواج واحد من اخواني واشتريت لبناتي فستانين فرح وحضروا الزواج

وبعدها بفتره كان زواج اخو زوجي وذيك الفترة كنت نفاس بولدي وليد يعني ما اقدر احضر الفرح

وكانت نفاستي في بيتي, وطبعا اذا ما رحت اكيد بناتي ما راح يروحوا لأنه مافي احد بينتبهلهم

والكل مشغول عنهم , وحتى زوجي رفض انه بناتي يروحوا للفرح وقال اذا انتي ما بتروحي

مو لازم البنات يروحوا. المهم سألت ام زوجي بنتي الكبيره انتوا بتروحوا الفرح؟؟؟ ردت بنتي وقالت

ماما وبابا يقولوا لا ما بنروح عشان ماما تعبانه, ردت عمتي العزيزة وقالت كل البنات الصغار رايحين

الفرح والأهم من كده قالت : زي ما انتي رحتي فرح خالك هذا برضه فرح عمك وراح تروحين الفرح

وكلمي بابتك يشتريلكم فساتين , طبعا بني انشعفت وطلعت تجري عندي وتبكي وتقول والله لا اروح

الفرح كل البنات رايحين, والله يا بنات دايم عمتي تكسر كلامي قدام بناتي وتحب تغلطني قدامهم

لمن صار البنات ما يحترموني. وفي النهاية عمتي مشت كلامها ورحنا اشترينا فساتين للبنات

مع انه زوجي كان مرررررررررة زعلان من امه لأنها لعبت في عقول البنات.

موقف ثالث: وهو اللي سبب المشكله

قبل ما بناتي يدخلوا المدرسة 24 ساعة طالعين نازلين تحت , وطبعا ما كان عاجبني الوضع

لأنه احس البيت صار فوضوي ولو منعتهم ينزلوا كثير راح تزعل عمتي وتسوي مشاكل

وتبين للناس انه انا اللي ما ابغاهم ينزلوا عندها بالرغم من انها تشتكي للناس انه بناتنا يكسروا

بيتها ويضايقوها وغيره. لكن لو منعناهم سوت الف قصة < اظنها تعاني من انفصام في الشخصية>

طبعا هذا لمن كانوا بناتي صغار , بس لمن دخلوا المدرسة بدأت اتعذر بالدراسه يعني بس ينزلوا حق

نص ساعة تحت ويطلعوا وبالنسبة لزوجي ما عنده اي مشكله طالما تربيتي لبناتي في صالحهم

واصلا زوجي عارف انه امه تعبي بنتي علي عشان كده ما يبغى بناتي ينزلوا كثير تحت ومع ذلك

ما يوقف بجنبي تجاه امه يعني موقفه انحيادي .

غير كده سلفتي ساكنه في الشقه المقابله لنا وعندها بنات من قد اعمار بناتي واذا اجتمعوا صار البيت

حرييييييقة, وغير كده صاروا بناتي مراجيج يعني ما عندهم انضباط ونظام وغيره وزي ما قلتلكم

مو عاجبني الوضع , غير كده كثير من قرايب زوجي < بنات عماته وبنات خاله> ينصحوني

انه ما انزل بناتي كثير تحت يعني نص ساعه في اليوم يكفي < بس ما ادري يكونوا سامعين شيء

مو كويس تحت عشان كده منعوني انزل بناتي تحت>

تعبت من الكتابه ........معليش

يتبع