أرهقتنـي الحيـاه .. هل من معين بعد الله / زواج زوجي علي !!

السلام عليكم ورحمة الله وبركاته ..



:
أخواتي الفاضلات أسعد الله صباحكن برضا الرحمن


أشهد الله وملائكته إني أحبكن في الله

,,

أخواتـي .. بعد ان ضاقت بي السبل وتاهت بي الدروب وتكالبت علي المصائب و الهموم ..قصدتكن راجية من الله ثمـ منكن وبحق مانزل الله بيننا من اخوة في دينه أن تكن معي صادقات معينات ولكن الأجر بأذن الله ... :(


.
انا متزوجه ولي 10 سنوات زواج .. وعندي من الأبناء 4 وسعيدة في بداية زواجي لكن .. بعد 4 سنوات من الزواج بدأت المشاكل تنخر في احشاء حياتي الزوجيه بدأت تنهار شيئا فشيئا
..
ووصلت لدرجة الطلاق .. وتم الطلاق بطلقه واحده .. وراجعني ورجعت ... ثم بعد فتره .. طلقني أخرى .. وراجعني ورجعت والآن بقي لي واحده .. واسأل الله ان يبعدها عني .. :44:

. وفجأه تزوج زوجـي العزيز بأخرى .. وهجرني لي 7 أشهر الآن لا يدخل البيت علينا ولا ينام عندنا ولا يسأل عن حالنا ولا أحوالنا بإستثناء أغراض الأولاد والبيت يجيبها لحد الباب وينزل السياره ويتصل ناخذ الأغراض ..


.. تمر الصيفيه والأعياد بلا طعم ولا لون في حياتنا كئيبه وممله .. حاولت أصلح مافسد لكن لا تجاوب من زوجي ...
ولولا اطفالي مابقيت على هذا الوضع
..
اعطيكن معلومات عن نفسي
عمري 26 سنه وزوجي 40 سنه وزوجته الآن عمرها 34 سنه الحمد الله جميله جدا بشهادة الجميع لكن انا سمينـه سمينـه سمينـه وهذا سبب رئيسي في مشاكلنا

فقدت الكثير من جمالي مع الهموم تساقط شعري وتغير لوني سمرت كثير وفرطت بالسمنه جدا وكرهت حياتي ونفسي وبيتي وكل العالم حولي ..

مشاكلنا كلها تدور حول علاقته بأهله وأخواله تأذيت منهم كثير وقطعت زيارتي عنهم لأنهم قطعوا زيارتهم عني .. وكان يضربني ويهينني ومقصر علي في المصروف لكن ابدا مايقصر في البيت ومصروف الأولاد ابدا .. ولو فرضا كنت بروح لأهلي هم يعيشون بمدينه ثانيه يرسل مع أولادي مصروفهم او مؤووونه تكفينا لين نرجع .

تعليمي بس إبتدائي .. زوجته تعليمها جامعي وهو جامعي واعتقد هذا سبب بعد بزواجه الثاني ..
.....
آآآه يابنات ثم آآآآآآآه ثم آآآآآه .. نفسيتي في الحضيـض .. دمار شامل بركان في داخلي نار تستعر في قلبي . .. ماعاد اعرف انام ولا آكل ولا البس كرهت الحياه وكرهت كل شيء بالدنيا .. كل ماسوي شيء جديد تنسد نفسي عنه بنص المشوار ...

...
الآن مخيرني بين شيئيين .. إما طلاق .. او هجر دائم ... واخترت الأخير عشان لا يضيعون الأولاد .. خصوصا كلهم أولاد مافيهم بنات .. ولا اقدر افرط فيهم ساعه .. ومستعده ابيع دنياي من أولها لآخرها لعيونهم فقط ...
..
بسسسسسس
يأخذني الشوق له أعشقه يابنات بجنوووون واحبه بجنوووون اكثر لكن .!!!!! حسبي الله ونعم الوكيل


............ أعتذر افكاري ملخبطه ومشتته ولا اعرف وش اسوي عشان ارده لي ........ كل يوم أًلي وأدعي وأرجوا من الله الفرج القريب ..

.. الي ماتقدر تفيدني ترفع لي الموضوع بدعوه صادقه علــــها تكن سبب في سعادة قلبي المحطم
..
دمتن في رعاية الله






السلام عليكم ورحمة الله
..
يآرب اسألك كل من دعت لي في هالموضوع او خارج الموضوع أن تجزيها خيرا وتقر عينها بمن تحب وتحفظ لها شبابها وعافيتها وسترها يا أكرم الأكرمين
........................
يا أخوات انا ما أكملت قراءة الردود .. وبكملها الآن ..
بس حبيت أبين لكم كم نقطه
.,
أولا سبب مشاكلي وأساسها (( بيني وبين اهله وخواله )).. وأقسم لكن بالله إني مظلومـه وكل العالم تدري إني مظلومـه في هالسالفه .. وماهي إلأا مكيده نسائيه بحته يسعون بالتفرقه بيني وبين زوجي وحقيقه نجحـوا نجاااح باهر في غايتهم .. لكن ماقول إلأا حسبي الله ونعم الوكيل حسبي الله ونعم الوكيل ..
يا أخواتي الفاضلات اللي تقول حسنـي علاقتك مع أهله .. والله إني دخلت لهم أحمل الود وشاريتهم من كبيرهم إلى صغيرهم من شيبتهم إلى شبابهم من رجالهم إلى نسائهم .. وماكان في قلبي عليهم شيء غير الخير ..
أتهمـت في (شرفـي وعرضي ) وخلوني علكه في أفواه اللي يسوا واللي مايسوا .. وانا ورب الكون إني بريئه براءة الذئب من دم يوسف .. ولا لي علاقه بكل ماقيل عني .... وعزائــي الوحيد في هالموضوع إني مظلومـه وإن الناس كلهم غير مصدقين لكن تعرفون شعشعه هالمواضيع ونظرات الشك والريبه أشد فتكـا من الموت ......................! .. وعلى هذا كله ماتبوني أقطعهم ..؟ والله لو أجد منهم بادره حسنه ولو طفيفه لكنت سااامحت وعفوت وأحتسبت الأجر عند المولى الكريم اللي مايضيع عنده شيء .. أنا قلبي كبير ومايحمل على احد شيء لكن هالمواضيع تشيب الراس ..ماحاولت أغير عيالي على عمانهم او جدتهم وجدهم أرسلهم بالأعياد يعيدون عليهم ويرجعون لي مباشره .. في الزواجات أرسلهم يباركون ويرجعون لي مباشره .. علمتهم بر الجد والجده .. لأنهم بالأول والأخير مالهم في هالموضوع لا يد ولا رجل (أقصد ابنائي ) ولا اعلم كم لي بالحياه ومتأكده لو غابت شمسي عنهم مردهم إلى أهلهم وعمانهم لذالك سعيت اني اقوي علاقتهم معهم ..
وهذه يا أخوات المشكله الرئيسيه بحيــاتي ...
..
بعض الإضافات اللي متأكده إنها زادت في تدهور حياتنـا . مثل ماذكرت سابقا 1 - وزني 2- وتعليمي .. لأن زوجي يعشق الجمال والعلم وعيونه زايغه دائم يعني كنت متأكده بيتزوج علي طالت الأزمان او قصرت لكن ماتوقعت الهجر ابدا :(
3- لسـاني طوووووووووووويل ماعرف اسكت على الغلط لازم أوضح له الصح من الغلط .. بس يعلم الله ماعمري طولت لساني بقلة أدب عليه او على اهله او تجاوزت حدودي لكن يبغاني خرساء صماء عمياء أرضى الهوان وأبتسم واسكت أرضى الإتهامات واسكت ..
حقيقه أتمنـــــى أدوس قلبي ومشاعري وأمضي قدمـا لكـن ........!

..
لي عوده والرد عليكن واحده واحده بإذن المولــى