أنا بصراحه اطبخ الخروف الصغير (البينى) ساعه ونصف أو ساعتين الا ربع بالكثير
وأهم شىء الماى مايكون كثير يعنى يغطى اللحم والملح أحطه بعد ربع ساعه من طبخه علشان يستوى اللحم بسرعه
ملاحظه أنا احط البهارات الصحيحه مثل الفلفل الأسود والهيل والليمون الاسود ولاأكثر منه وبهار اللحم وطبعا أحط البصل والفلفل البارد والثوم مقطعين كبار ولا أحط الطماطم والمسمار والدارسين علشان مايسود اللحم والعيش لازم يكون أبيض
وطبعا قبل مايخلص اللحم بنصف ساعه أطلع الجنوب والادين وأخلى المفطح لأنهم بسرعه يستوون لأنه خروف صغير
وأحط عليهم بعد مايستوون خلطه حق التحمير صلصله طماطم وشوى كركم وبهار وفلفل اسود وصبغه العيش أصفر وكوب من مرقة اللحم ونخلطهم ونمسح على اللحم ولا تنسين اعصرى عليهم ليمون وندخله الفرن من فوق علشان يتحمر
وطبعا الحشو بصل وزبيب وفلفل بارد ونخى مفلوق
واى سؤال أنا فى الخدمه

نسيت أقولك العيش لما تطبخينه قبل لا يخلص بعشر دقايق تحطين عليهم الحمسه الا وهى راس ثوم مدقوق حيل وكم حبة طماط 3 وتحمسين الثوم فى زيت نصف كوب وبعدين الطماط معاه حتى يذوب وتحطينه فوق الرز وتحركينه شوى علشان مايتكسر العيش وشوفى الريحه والطعم يييييممممممم

ينقل من الساخنه لاطباق حواء

انا اسويه مثل ام مصبح بس ما احط اللومي في اللحم واحط الدارسين والمسمار
بس اللحم بعد ما ينضج احطه في صينية وامسح عليه بالصلصه
( زعفران وهيل مطحونين عدل مع بعض وشوي ماي ورد بس يستوي مثل العجينه)
واشويه بالفرن ولما تغرفين رشي بقدونس مفروم فوق اللحم

العيش صفي ماي اللحم وصبي الماي في قدر يكفي العيش
ذوقي الماي لازم يكون مالح علشان العيش يصير مضبوط بس مالح حيل
لا تصبين كل الماي خلي شوي كبي العيش وشوفي مقاس الماي اذا احتاج زيديه من ماي اللحم

وكميته تعتمد على نوع العيش

اذا قرب ينشف حطي الحشو على صوب و رشي لون العيش على جهه اخرى

وعند الغرف اخذي الحشو بصوب والعيش الملون بصوب
اغربي الابيض ثم افرشي الملون
ثم الحشو بس خلي كل طبقه تبين
حطي اللحم ورشي البقدونس على اللحم

وسلامتك بس
هذي طريقتي بالذبيحه اتمنى تعجبك