تابع لحملة ((يلله نظم حياتنا)) موضوع شيق ومصور
بسم الله الرحمن الرحيم
طبعا بما ان اختنا مس سنو اعتذرت عن تكملة الموضوع بسبب ظروفها
اقترحت اني اكمله معها ونتعاون عليه
واسأل الله العلي العظيم ان يجعله في موازين اعمالها انه سميع مجيب الدعوات
تكلمت اختي مس سنو عن الجانب الديني والاهداف المرجوه
الحين بنتكلم عن الجانب الاجتماعي
مرحلة تحديد الاهداف
يلله الحين اكتبي بدفترك الصغير اللي اتفقنا عليه بالجزء الاول من الموضوع واكتبي اهدافك القريبه والبعيده
مثال..
اهدافي الاجتماعيه
1-احافظ على علاقاتي الاجتماعيه
2- اكون لي صداقات جديده(خصوصا الكثير منا ليس لديه صداقات)
تلاقينها محور اهتمامها زوجها او ابنائها وهذا مو سيء لا..لكن لازم يكون لها صداقات
يتبادلون الافكار والهموم والنصايح ومعك يكونون بالشده والرخا
وهذي فعلا انا جربتها
اذا كان محور اهتمامي بس زوجي
اذا صار بيننا خلاف تلقينه يطلع ينبسط مع اخوياه
وانا لحالي بالبيت اكل بنفسي
بينما لو لي صديقات كان افرغ عندهم واسولف واستانس
وارجع بنفسيه حلوه لزوجي
صح ولالا؟
تصير كثير مع اكثرنا
وترى الصداقات تأثر كثير بالنفسيه >>>مو كأني طولتها شوي
نكمل الاهداف
3-اقوي صلتي بأمي وابوي.. بأخواني واخواتي وابنائهم>>وهذي كثار غافلين عنها
يعني احاول قد ماقدر اكلمهم وارسل مسجات
صدقيني بيكون لها الاثر الكبير بنفسك وتحسين بأحساس الرضا>>>مو كأنها دعايه لبن المراعي
4-تطوير اسلوبي بعلاقاتي
هذي كيف يعني؟؟
انا اقولك كيف
شوفي حبيبتي كثير مننا عندها اسلوب حلو وراقي وتلقينها تجذب اللي حوالينها بالسوالف
بس البعض تلقينها مستمعه فقط
اسمعي يالغاليه كثييير من الناس يحب المدح يعني خلي لسانك حلو مع كل الناس
صدقيني الناس بتحبك وبتحرص على شوفتك
لاتقولين انا بكذا اصير منافقه
انا ماقلت لك قولي بوجهها شي ومن وراها شي ثاني
مثال..
انا قابلت وحده من معارفي بعدين اول ماشفتها
هلا والله بالغاليه كيفك ايش اخبارك والله اني افرح لا شفتك يختي سبحان الله انتي من اللي احب سوالفهم وتعجبني(وانتي فعلا تحبينها بس حنا سبحان الله مانعبر عن المشاعر)
تلقينها ياعمري لاشعوريا طول القعده وهي جنبك فرحت بتعبيرك لمشاعرك
يلله ياشيخه مو لازم وحده
انا اقولك امك
يعني لاكلمتيها هااا يمه وش اخبارك ولهت عليك يالغاليه والله مانلحق جزاك
ليتي اصير زيك بطيبتك والله من غيرك مادري وش اسوي محد يوسع صدري غيرك
ورب البيت تلقينها طول اليوم فرحانه بهالكلمات البسيطه
طبعا ماقولك بكل مكالمه لازم تقولين هالكلام لكن اللي اقصده
يكون هذا اسلوبك
صدقيني الناس بتحبك وتحرص على جيتك
قصه..
وحده من قريباتي كان مزحها ثقيل الله يذكرها بالخير كانت اول ماتشوف صديقتها او قريباتها(يعني اسلوبها مع الكل)
هلا بالشينه وينك انتي ووجهك ماشفناك يالقاطعه
يعني كذا اسلوبها بالبدايه كان مزح بعدها صار طبع
المصيبه الحين عجزت وصار عمرها فوق 60 سنه
تدرون..بنات
صار كل كلامها كذا لدرجة ناس كثيرين مايحبون يشوفونها لانه صار التحطيم جزء من شخصيتها
لدرجة انه بناتها تعودوا التحطيم من امهم
يعني لاشافت وحده من بناتها تقول لها مادري وشلون رجلك صابر عليك انا لو منه اتزوج عليك
صار هالاسلوب االسيء جزء منها خلااص
الزبــــده..
اذافيك عيب حاولي تعالجينه من الحين قبل لايصير طبع فيك
واذا الحمدلله مافيك حاولي تطورين اسلوبك خلي جلستك محببه لقلوب الناس
امزحي اضحكي فرفشي خلي جلستك حلوه
الكل عنده مشاكل الكل عنده هموم
انا مو ضد اننا نفضفض لبعض
انا ضد طبع الشكوى الدائمه بحيث انك خلاص معروفه عند الناس هالادميه بس تتشكى
هذا موضوعنا لليوم
نكمل بقية الاجزاء بأقرب وقت ان شاء الله]
عيون وليد @aayon_olyd
محررة
يلزم عليك تسجيل الدخول أولًا لكتابة تعليق.
ياعمري انتي راح اكمل ان شاء الله باللي يقدرني الله عليه بس خليكي متابعه معنا
والله يحييكي بيننا
والله يحييكي بيننا
الله يعطيك العافيه اختي موضوع اكثر من رااااااااااااااااائع واسلوبك شيق وخفيف عالقلب الله يجعله بموازين حسناتك
بس ياليت تحطين لنا رابط الموضوع الاول عشان نكون ملمين باطراف الموضوع وتكتمل الفائده
الله يجزاك خير
بس ياليت تحطين لنا رابط الموضوع الاول عشان نكون ملمين باطراف الموضوع وتكتمل الفائده
الله يجزاك خير
الصفحة الأخيرة
تكلمي عن كيف اقدر اطور نفسي في الحديث عندي مشكله فيهه
دايما زي الحجر مافيه تعابير مافيه اسلووب مافيه شي
والله تعبت