قصةمرض ولدي وإلى الآن ماتوصلوا لسبب معين

السلام عليكم ورحمة الله وبركاته 
الاطفال نعمه من الله اسأله تعالى مايحرم احد منها رزقت بطفل قبل خمس سنين واصبح الكل يحبه وبعد عشرين يوم من ولادته سخن وقال الدكتور التهاب بالحلق وصرف له فيفادول ومانفع معه العلاج ثاني يوم قال ابوي الله يحفظه ويطول بعمره اعطيني الولد اقراء عليه وابخ بصراحه انه عجبني ومدري ذكرت الله وإلا لا المهم وضى ابوي وصلى ركعتين وقراء عليه المعوذات وبخ عليه مويه  ومن اليوم الثاني وهو الحمد لله بخير ومن عمر الشهرين ترك الرضاعه الطبيعي وبداء مع قصه جديده وهي الامساك ومابقيت ولا علاج ولا وصفه ماستخدمتها وماقول إلا الحمدلله على كل حال وفي عمر اربع شهور بداء الربو والله المستعان رايحه جايه على المستشفى ومضادات حيويه واكسجين بعدها على طول اصيب بالاسهال والطراش وطفح جلدي وهذا كله كوم والحراره كوم ثاني واستمرينا نعطيه في ذي المضادات اللي شراب واللي وريد وفي عمر سبع شهور اشتد عليه المرض وزادت الاعراض قوة وفجأه انتفخ بطنه من جهة اليسار وطلع فيه حبوب مثل العنقز و خراجات من دةن دم وصديد ونومونا بالمستشفى وحطونا بغرفة العزل وهاتيك من تحاليل ومضادات واشعات جلسنا لمدة خمسطعش يوم ولا فيه نتيجه صاحيه منهم ولا فيه تحسن والحراره مانخفضت وطلعنا من التنويم على فيفادول ومضاد ومراجعات وكل مانروح للموعد يلقوه تعبان وينوموه ويبداءو مع قصة التحاليل والاشعات دون نتيجه مقنعه وفوق هذا تحاليل على حسابنا في مستشفيات اهليه بحجة ان التحاليل مو موجوده عندهم  واستمرينا إلى هذا الحال لحد وصل عمر الولد سنه ونص وحولونا مسنشفى ثاني عشان نعمل عملية لوز عشان يرتاح من الالتهابات وبداءنا مراجعة جديده مع علاجات جديده لحد ماقرروا العمليه وطلبوا تحاليل قبل العمليه بكم يوم وعملناها وجاء يوم العمليه وقابلنا الدكتور وللاسف قال مانقدر نسوي له عمليه لان عنده نقص في الحديد ومايتحمل البنج واعطانا تحويل لمستشفى اطفال ثالث عشان نراجع ونعالج نقص الحديد وهذا الطفل مازال يعاني من الاسهال والخراج والحراره والغدد اللمفاويه وبداءنا قصه جديده مع دكتوره جديده حتى تكشف سبب نقص الدم وعملنا تحاليل قد الدنيا والحمد لله ماعنده فقر دم من النوع الخطير قالت بس غذائي وحولتنا لدكتورة الدم والحساسيه بنفس المستشفى وبدأت تحاليل جديده وإضافيه على قولتها وتوصلت إلى ان عنده نوع من انواع كريات الدم البيضاء قليل بس المشكله إنها إذا عملت له تحليل وهو مريض يطلع عنده ارتفاع كبيييير في كريات الدم البيضاء وحولتنا لدكتوره الجهاز الهضمي عشان تشوف مشكلة الاسهال وعملة تحاليل وطلع كل شي سليم بس قالت لازم تسووا عملية منظار لان يمكن يكون عنده تقرحات بالقولون ويمكن تكون هي السبب الاساسي للاعراض هذي كلها المهم طلع ماعندهم عملية منظار لازم تحولنا مستشفى ثاني وفي كل موعد عشان تعطينا التحويل تطلع الدكتوره ماهي موجوده في المستشفى  وفي نفس الوقت صرفت الدكتوره حقت الدم والحساسيه ابره ياخذها كل شهر مره ترفع من كريات الدم اللي ناقصه واستمرينا ثماني شهور ولكن ماجابت نتيجه إلا العكس تزيد من الاعراض وفي الآخير قالت وقفوها دامه مايستفيد منها وعصب زوجي من هالدكتورتين اللي راحت سنه كامله وحنا نطارد وراهم  وماعطونا نتيجه ولا علاج صار الحين عمر ولدي ثلاث سنين وهو مازال يعاني من هالامراض وتأخر في المشي وفي الكلام وصار عنده رأرأه في العين مع انحراف في عينه اليسار وبعد مامشى صار ماعنده توازن وراجعنا فيه عند شيوخ وواحد منهم قال فيه نفس لكن زوجي الله يهديه مايؤمن بالعين وهالخرابيط ع قولته ووقف كراجعتنا للشيخ  وبداء يراجع في مستشفى العسكري بعد موافقه من الامير وبداؤ من جديد تحاليل وقال بنسوي تحليل ونرسه المانيا إذا جت النتيجه سليمه كان بها وإذا جت مش سليمه نحولكم الرياض تعملوا له زراعة نخاع لان عنده نقص مناعه هذا دكتور المناعه اما دكتور الاعصاب فنسب كل امراضه إلى اختلال في المخيخ خلقي مع ان كل الاعراض اللي تدل على المرض مابدأت منذ الولاده وهذا خلا الدكتور مستغرب من النتيجه 
الآن عمر ولدي خمس سنين ومازال يعاني من ارتفاع الحراره والغدد اللمفاويه والخراج والاسهال والنظر اصبح عنده طول نظر ولا يشوف الاشياء السفليه يعني لازم احد يمشي معه ويقوله فيه درج فيه طاوله فيه اي حاجه عند رجوله عشان مايتعنقل فيها ويطيح وماعنده توازن اي احد يمر بجنبه ويدفه لو مو بقوه يطيح على طول 
الحين انا ودي نروح مستشفى فيه دكاترة اطفال كويسين ابغى نعمل له عملية منظار لان يمكن كلام الدكتوره صح يطلع عنده تقرحات وهذي هي السبب في كل الاعراض  بس المشكله زوجي مو راضي وإذا حاولت اغصبه يقولي إذا صار في الولد شي والله ماسامحك وارجع ابطل واسكت ما اكلمه الحين الولد تعبان من عشرين رمضان اسهال وحراره وغدد وخراجات واليوم كلمته مره ثانيه نروح نسوي له المنظار بس انه مو راضي 
ايش رايكم اروح انا واخوي نسوي له منظار وإلا لا اخاف يصبر بالولد مضاعفات ويحملني المسوؤليه انا واخوي 
وإلا قولوا لي كيف اقنعه وإذا اقتنع نروح اي مستشفى 
انا اقول الجامعه الاهليه واخاف مايطلع عندهم إمكانيات ومستشفى صديقه غالي وانا ماعندي فلوس بس عندي كم  قطعه من ذهبي بابيعها واعالجه بثمنها بس اهم شي ابغى دكتور متمكن إشان إذا ماكفى الذهب اتسلف اهم شي يعالج ولدي تخيلوا عمره خمس سنين ووزنه عشره كيلواللي يشوفه يقول عمره سنتين 
اهم شي شوركم اللي عانت مع اطفالها وحصلت دكتور ممتاز تدلني الله يجزاها بالخير 
وادعوا له بالشفاء هو وكل مريض