مكر الحريم ودهاءهن ... مواقف

هاذي سالفة قديمة من سواليف الأولين حبيت اونسكم فيها واوريكم وشلون الحريم فيهن مكر ودهاااااء وذكاااء ولو استخدموه للخير كان الدنيا بخير .. كان كسبوا ازواجهن واهل ازواجهم وجيرانهم وكل من حولهم



-------------------------------------------


المهم .... يقولك كان فيه 3 ضرات ...
اخر وحدة منهن هي اصغرهن كانت هي الأجمل فيهن وكان الرجال توه ماله كم شهر متزوجها ...
والثنتين الكبار كانوا يغارون منها لانه زوجهم كله يتغزل فيها وكله يقصد فيها
ومنبهر بجمالها ماغير يسولف عنها وعن ادبها وخلقها وسناعتها وجمالها .....
الضراير انجنووو منها يوم شافوها لاحسة عقله وطاير فيها ..
ضاقت صدورهم وجلسوا يفكرون وشلون نخلي الرجال يكرهها ويرجع لنا ...


راحت وحدة منهن واستشارت امها ... الا تقول لها امها امشي معي لحوش الغنم
ودوري معي " يكرم السامع " بعرة صغيرة ابي اصغر بعرة تلقينها في الحوش ..
البنت استنجست وجلست تتشكى وتتحلطم وتقول لها انا جاية اشاورك
واطلبك العون جاية تقولين لي دوري " بعرة " ..
الا قالت لها انتي مو تبين رجلك يرجعلك ويكره سويرة ؟؟ قالت لها الا هذا مناي ...
قالت لها خلاص سوي اللي اقولك عليه ....
وجلست تفتش بين هلبقر وهلغنم على أصغر بعرة ..
وطاحت لها على بعرة صغيرة ..
وقالت لامها خلاص لقيتها هاذي صغيرة يا الله تنشاف ماتبين ...
قالت لها امها امشي معي ... راحت البنت مع امها وجلست بالحوش تنتظر امها ...
رجعت امها ومعها صندوق ذهبها ... وطلعت من الصندوق ذاك العقد المصفوف اللي يهبل ..
اللولو مصفوف لولو ورى لولو ... وقالت لها شوفي هلعقد هذا تهدينه سويرة هدية زواجها ...
البنت انجنت وعقلها طار ... وصارت تقول لامها الحين انا بنتك ماعمرك هديتيني عقد
وهاذي اللي اكرهها وجايتك طالبة العون عشان زوجي يكرهها تهدينها هلعقد الحلو ...
تبين تقهريني انتي انا بنتك رقبتي خالية تكفين ابيه لي ...
الا تناظرها امها بغضب ممزوج بخيبة امل :mad:
وتقول لها طول عمرك خبلة ماطلعتي لامك ... هاتي البعرة ...



وخذت البعرة ومسكت ابرة وصارت امها تحاول تحشر البعرة الصغيرة بين صف اللولو ...
ويوم حشرته كويس وزبطته واخفته بين حبات اللولو ... عطت العقد لبنتها ..
وقالت لها اهديه لضرتك وقوليلها هاذي هدية زواجها ..
وجلست امها تعلمها وتسولف عليها والحرمة استانست وراحت تنفذ كلام امها..



وراحت واهدت العقد لضرتها ... البنت يوم شافت جمال العقد انلحس مخها ...
راحت جري على المراية لبسته وصارت تناظر حالها والعقد يزين رقبتها ..
وضرتها تناظر فيها وهي ميتة قهر لانه العقد زادها جمال ..
بس بينها وبين نفسها كانت تضحك على اللي بيصيير لسويرة
المهم جت سويرة وتشكرت ضرتها وصارت تسرح وش بيقول رجلها لما يشوفها
وهي متزينة بهلعقد اكيد بيقصد فيها الليلة ... المهم بعد ماشبعت سوالف مع ضرتها
سلموا على بعض وتقوم كل وحدة لغرفتها


شوي وتجي الضرة الكبيرة للضرة الثانية وتقول لها وراك ماجيتي لغرفتي..
حنا متعودات كل ماجت ليلة سويرة نسهر مع بعض نونس بعض عشان ننسى القهر ..
الا تقول لها الثانية اعذريني بروح ازهب فراشي واعطر داري ..
الضرة الكبيرة انهبلت قالت تزهبين فراشك لمنو الليلة ليلة سويرة ...
الا تناظرها بكل ثقة وتقول لها ابو سالم الليلة بيخلي سويرة ويجيني ...
جلست الضرة الكبيرة تضحك عليها وتقول لها بيخلي ليلة هلغزال ويجيك هههههه يازينك وانتي تحلمين ...
قالت لها بتشوفين .. الا تقول لها ضرتها انتي شكلك انخبلتي ...
قالت لها ضرتها الثانية .. ان نام عندي ابو سالم الليلة وش لي ؟
هنا الضرة الكبيرة قالت بكل ثقة وبضحكة استهزاء لك اللي تبين ..
قالت لها خلاص ... ابي ليلتك .. هنا ضرتها سكتت شوي .. وقالت لأ ..
قالت لها ضرتها الثانية توك تقولين ماراح يخلي هلغزال ويجيني وش غير رايك يعني انتي عارفة
انه بيجيني صح ؟! هنا الضرة الكبيرة قالت لها انتي انخبلتي والله ماهوب مخلي الغزال وجايك
وان صارت معجزة وخلاها بيجيني انا انا احلى منك وش يبي فيك انتي ؟ وش فيك زود عني يخليني ويجيك ..
قالت لها خلاص دام انك واثقة ومتأكدة اجل لي ليلتك ان نام عندي ...
قالت لها الضرة الكبيرة لك ماتبين مانيب خسرانة شيء ..
اصلا ماهوب مخلي سوير وجايك الا ان حجت البقر على قرونها ...
هنا الضرة ابتسمت بخبث وفرح ... وقالت لها خلاص أجل روحي لغرفتك
وجيبيلي سراجك .. قالت لها وش تبين فيه ؟
قالت ابيه ضمان .. عشان ان جاني ابو سالم وماوفيتي بوعدك ورفضتي تعطيني ليلتك
اكسرلك سراجك ... وان ماصار شيء أرجعلك سراجك ..
قالت لها الزوجة الأولى على هواك أصلا مانيب محتاجة له ماهيب ليلتي وش له افتح السراج ..
وراحت وجابت السراج وعطته لضرتها .. وكل وحدة منهن راحت لغرفتها ...




--------- فــــــــــــــــــــاصل ------

يقولكم كان فيه عجوز تمشي ومعها اربع حمير ... الا يمرون عليها شباب وحبوا يستظرفون كعادة التماسيح يموتون ان مالمزوا الحريم وارفعوا ضغطهم .... الا يقولون لها صبحك الله بالخير يا ام الحمير !! الا بسرعة بديهة ومكر النساء المعتاد ردت عليهم العجوز صبحكم الله بالنور يا أولادي !! خخخخخخ


--------------------------------------

نرجع للضرات :


المهم راحت الزوجة الثانية وهي مستانسة لغرفتها تزهب فرشها وتطيبه وتعطره وتنوم عيالها ...
ويوم أظلمت الدنيا فتحت سراجها وجلست في غرفتها قدام المراية
تونس حالها بالقصيد وتهبط بشوشتها وتلبس اساورها ..
واما صاحبتنا سويرة فجالسة قدام المراية تناظر برقبتها
وجمال رقبتها اللي زاده العقد جمال فوق جمالها ..
وتقول لحالها الله يعين ابو سالم ..عز الله ان شافني كذا انه بيطب ساكت وشلون بيتحمل هلجمال ..
ياحظه فيني بس ..




ويجي البطل :arb: ويدخل البيت عند سارة ...
وتسولف معه ذيك السوالف اللي ترد الروح ..
وتعطيه كم بيت وكم سالفة والبطل ساااااااايح مع جمالها وحلاوة لسانها وظرافة سوالفها ...
الا يوم يشتد سواد الليل وبعد كم ساعة من السواليف والقصايد
خلص الزيت وطفى السراج .. يعني انتهى وقت السواليف وصار وقت النوم
ويجي ابو سالم يقرب من سارة :35: ...


وبنفس الوقت اللي طفى فيه سراج سويرة ... طفى سراج الزوجة الثانية
عاد هي يوم طفى راحت بسرعة وفتحت السراج اللي خذته من ضرتها
وجلست على فراشها تقاوم النوم وتونس حالها بالقصيد ...

..






نرجع لسارة ورجلها ... الرجال مامداه يقرب من سويرة الا تهف عليه ذيك الريحة اللي كنها ريحة بعر " تكرمون" ..
وكل شوي يبعد ويرجع يقرب لحد ما تأكد ان الريحة من حرمته ...
حاول يسد خشمه ماقدر .. كل ماقرب منها دخلت الريحة مخه وطلعت مع مخيخه :11: ..
يحاول منيييي مناااااك مافيه .. الريحة قوية ماهو قادر ...
نفر من الحرمة وبعد عنها .. وهي كل مابعد تجيه تقرب منه لحد ماوصلت معه وانقرف مرة ..
واستأذن منها وخرج من غرفته لانه ماعاد يتحمل يقرب منها نفر منها ومن ريحتها ..


وأول ماخرج فكر واحتار وين يروح وحريمة نايمات وكل وحدة مسكرة على روحها غرفتها..
طلع للحوش ويطالع في غرف حريمه الا يشوف سراج حرمته الثانية مفتوح وغرفتها تضوي ... :S_45:
عرف انها صاحية توها مانامت ... قل دام ان سراجها مفتوح يعني صاحية ..
وان ضربت الباب بتفتحه لي .. خلني اروح لها اريح عندها ..
ومامداه ضرب الباب ضربتين الا تفزله الحرمة وتفتح الباب
وتهلي فيه وترحب وتستقبله أحسن استقبال ..
ويشم عندها الريح الزين والطيب اللي يرد الروح وينام عندها ...



يوم جاء الصبح الا الملقوفة الضرة الكبيرة تضرب الباب على ضرتها الثانية
ومن فتح الباب ؟ :arb: ايه البطل ....
هي يوم شافته عندها انجنت وطار عقلها .. :icon810:



الرجال طلع للحوش يبي يروح للمغسل عشان يغتسل وصار ينادي على حرمته الثانية ويصيح
يبيها تصب عليه الماي .. وهي جت وراه تتمشي وتتمقط وتتدلع قدام ضرتها الكبيرة
وقدام سويرة ... وهن صافات بالحوش مزهبات الفطور ينتظرون الرجال يجي يتفطر...
وسويرة يوم شافته طالع من عندها ماتت قهر :icon33: واااانجنت ..


وطبعا البطل نام اليوم اللي وراه عند الزوجة الثانية بعد لانها ليلتها ...
ونام الليلة الثالثة " ليلة الضرة الكبيرة" بعد عندها حسب اتفاق الضرة معها ..
وبكذا نام عندها رجلها 3 أيام ورى بعض :wink2:







------------- يالله بنات كل وحدة عندها سالفة عن مكر الحريم تقول لنا