زوجي الاستهتار ذااابحه .. مر عليكم كذا؟

حوائيات حبيباتي ..
ابغى المشورة لاني عجزت واحترت كثير
زوجي طيب متسامح حنون ، عصبي بس يرجع يندم

مشكلتي معاه من يوم تزوجنا لنا 4 سنوات الاستهتار والاهمال
ابدا ابدا ماله صلاح في اي شي ، شي اتكسر في البيت مادخله ، انبوبه غاز خلصت، طلبات البيت، مرضت ولا بنتي ماله صلاح .. ما يبغى يسوي شي ما يبى يتحرك، ما بيخرج من البيت ، مابيقضي ، ما يتمشى ولا يودي مستشفى .. ماله صلاح في اي شي ..
عشان لا احد يستغرب ، زوجي هو الطفل المدلل عند امه من صغره، ما كانو يكلفونه باي مسئوليات ما كان يودي ولا يجيب احد ، ولا يقضي اي شي في بيتهم ، يا ابوه ، يااخوانه الصغار ..
كلمت اهله : يا جماعه مايسير .. انا ما عندي احد غيره يوديني ويقضي لي ويودي عيالي المستشفى الا هو ، اخواني الله يستر عليهم كل واحد في ديره وابوي رجال كبير ويادوب مع اخواتي الخمسه وامي .. ماعندي الا هو ونحن في مجتمع مايسمح اني اركب مع تاكسي او امشي في الشارع للبقاله ..
رد الاب بكل بساطة: هو من يومه كذا ، طبعه كذا، اخوانه احسن منه، اصبري وشوية شوية يرجع!
صار لي اربع سنوات ما تغير شي الا زاد الكسل والخمول وما عاد صار يستحي لمن ابوي يجيب لي الخبز والخضار .. ما يستحي اخرج و هو قاعد على التلفزيون وانا اودي بنتي حرارتها مرتفعه جدا مع اخوه ..

حاليا انا حامل في الثامن وعندي فقر دم شديد ودوخه على طول ، وبنتي مصفره من قلة الاكل في بيتنا من جد ماعندي شي اطبخه ولا ناكله وصرت استحي اكلم امه او امي اننا ماعندنا شي ناكله ، تقولي وهو كيف ياكل؟ اذا حس بالجوع راح جاب لوزين او صامولي مع جبنه كيري وخلاص كلوا معايا!! بالله هذه عيشه؟

ذحين جاء البرد، انا عندي ملابس قديمة البسها ، بنتي والله ما عندها شي ادفيها به، ملابسها حقت العام كلها قصرت وصغرت ولا بيتحرك يوديني اقضي لها ( العام الماضي قضيت مع واحد اخواني جاء الويك اند ونزلني السوق )..

الخروج نتمشي ولا اشوف الشارع فقدت الامل ولا عاد صرت اتكلم ولا ادور لاني اعرف الرد!!

طفشت من الموتان ( حالة الموت ) اللي هو فيه ..
اش اشوي بالله؟ اروح لاهلي عشان الاكل والاستهتار في العلاج والمقاضي ؟ ولا اشحت من امه وامي من مطابخهم بصل و زيت وملح وتايد وحليب ودقيق !!

حلوني بالله .. كيف التصرف مع الزوج الحي الميت !!