احراجات الاطفال اللي ماتخلص

بسم الله الرحمن الرحيم
موضوعي اكيد مر على اغلب الامهات وهو احراجات الاطفال خاصة امام الناس
اللي خلاني اكتب الموضوع جاتني رساله ع الواتس عنوانها اشهر عشره كذبات عند الحريم ووحده من هالكذبات ولدي ماياكل وهو ياكل الاخضر واليابس
والله من واقع تجربتي ومن كثر ماانحطيت بمواقف محرجه طلعت ماهي كذبه واللي صنفها من ضمن الكذبات واحد ماجرب وكتبها من راسه
من هالمواقف وحده من بناتي ماتحب الاكل الشعبي يعني عصيده قرصان حاجات زي هذه عندي في البيت ماتاكلها واذا حطيتها ماتاكلها وتدور اكل ثاني ومو مره ولااثنين اكثر من مره واحيانا ام زوجي ترسل مايعجبها كانت لسه صغيره بحدود اربع خمس سنوات وكل مره احاول فيها تاكل ماترضى واضطر اسوي لها شي ثاني مكرونه او ساندويشه ومره تجمعنا ببيت اهل زوجي وحاطين سفره اغلبها اكل شعبي بحكم انه اغلب الحاضرات لام زوجي كبيرات سن ولما جلسنا كنت اغرف لبنتي حاجات ممكن تاكلها يعني كيكه او بسبوسه وام زوجي تقول ليه ماتعطي البنت عصيده قلت ماتاكلها شويه الا بنتي تاكل عادي حتى القرصان اكلت لقمتين ثلاثه المهم في النهايه اكلت وانا قدام الحريم اقول ماتحبها بس مدري ليه بنتي هناك اكلت وبالبيت مايدخل فمها احرجتني يحسبوني ماابغى اعطيها😭😭
موقف ثاني لولدي مايحب اللحوم بكل انواعها لحم دجاج تونه سمك ماياكلها واذا عملت كبسه اغرف له رز فقط ولو بالغلط جات لحمه بفمه يخرجها ويرميها ويطالعني معصب ويقول انا ماقلت لك لاتحطي لي لحمه في اكلي طيب يابابا بالغلط جات وبعدها يقعد يفتش الرز لايكون فيه لحمه وعلى هالحال عمره خمس سنوات وبيوم انعزمنا ببيت اهلي وامي غرفت له في صحن رز ودجاج وانا جنبه قمت اخذت الدجاجه من صحنه ورجعتها وبقيت الرز وامي زعلت ليه ماتخلي الولد ياكل قلت لها هذا مايحب اللحوم يبغى رز لحاله بدون شي قام ولدي قال الا ابغى دجاجه😳😳 وامي تحسبني ماابغاه ياكل ورجعت الدجاجه لصحنه وجلس ياكل الرز والدجاجه اكل قطعه صغيره وماكمل ماعجبته وامي انتبهت له قالت كمل الدجاجه قال مااحبها طيب ليه تقول ابغى والظاهر قالها لما شاف اولاد اخواتي ياكلو عادي
من بعد هالمواقف بطلت قدام احد اقول ولدي مايعجبه او ماياكله وبنتي ماتاكل او مايعجبها احسهم برا غير وبالبيت غير مانكسب الا الاحراج
وحده تحكي عن ولدها نحييييف تقول تعبني ماياكل واكله قليل احط السفره ياكل لقمه ويقوم وانا ماغير الاحقه بالصحن الا ياكل مايرضى ولما نروح لناس يقولو ليه ولدك نحيف تقولهم مايرضى ياكل وبالغصب يجلس على السفره تقول اول ماحطو الناس السفره ولدي تربع اول واحد وبس ياكل ماوقف تقول كأنه محبوس وانفك احرجي قدام الحريم ووحده تقول هذا اللي ماياكل وهي تحلف انه في البيت مو كذا لدرجة صارت تقول لولدها قوم العب برا مع الاولاد يقول جيعان بااكل ولما رجعنا البيت رجع لنفس طبعه بس احرجني وطلعني كذابه😭




انتو مع اطفالكم كذا ؟؟ تعرضتوا لمثل هالمواقف ؟؟