طلاقي برسالة جوال

السلام عليكم ورحمة الله وبركاته
ترددت كثير بكتابة مشكلتي ولكني احس ابي انفجر ابي اشكي لأحد أبي مشورتكم
لو ابي اكتب قصتي مع زوجي يبي لها صفحات كثيره
وقفت مع زوجي بمواقف كثيره وكنت له ظهر مساندته ومشجعته لكن بالمقابل ما أخذت منه الا المشاكل اللي دايماً اجي واصالحه عشان تستمر الحياه بينا وعشان عيالي مابي اشتتهم
اهلي بدوله وانا بدوله وزوجي وظيفته بدوله ثانيه ( عرفتو حجم معاناتي )
زوجي كان موظف بدولته بس طبعه طموح واحلامه كثيره قدم بدوله ثانيه واقبلوه راتبها عالي بس بحكم سكنه ومصاريفه ومصاريفنا حنا ماتسوا انه يتغرب ويتركنا لكن هو مايسمع لاحد اللي يبيه يسويه
صبرت على الوضع ثلاث سنين لا أنا عند اهلي اتونس معاهم ولا انا اللي مع زوجي
زوجي لاهو اللي راحمني انا وعيالي الناس تطلع وتمشا وانا وعيالي بالبيت مع ان عندنا سايق بس ممنوع
زوجي خاين وعنده علاقات نسائيه كثيره ويشوف افلام اباحيه
ومن كثر علاقاته مرات يشك فيني ويراقبني بالواتس متى دخلت
يقول انها غيره مو شك هههههه
الخميس عندنا عطله وكنت سهرانه مانمت لبعد صلاة الفجر دخلت الواتس كنت ابي اكلمه لقيته من زمان مو داخل وطلعت
لقيت الصبح رسايله لي
سهرانه لصبح ومهمله عيالك ماقعدتيهم يروحون للمدرسه
ارسلت له قلت له عندنا عطله وسهرانين
وطنشت الموضوع الساعه وحده ونص الفجر يرسل لي انتي مطنشه وماتراسليني مع اني طول اليوم رسايل واتصل فيه دردشة معاه اشوي قالي روحي نامي تصبحين علي خير قلت له انت من اهله
وطلعت وكنت ناويه ما أدخل الواتس عشان المشاكل اشتغلو قروب العايله رسايل وانا اطالع بالتلفون ماابي ادخل رحت صليت الوتر ولما مسكت التلفون احاول اقرا رسايلهم بدون لا افتح الواتس بالاشعارات ولقيت له رسايل مرسله لي انتي مطنشتني وانتي وانتي من الكلام اللي يغث القلب
دخلت الواتس قلت والله ماعرفت لك تقولي لاتدخلين وترسل مع القروب وتوشفت رسايلك وفتحت قعد يهاوش واذلفي انا مابيج والشره علي اني ابي اكلمج يلا باي
قلت له مع السلامه وسكرت الواتس
اشوي وانه مرسل انتي طالق
دخلت قلت له ترا الطلاق بالرسايل يقع والموضوع مايستاهل
قال اي انتي طالق ولا عاد ابيج ولا ابي اكلمج
قلت له جزاك الله خير وسكرت الواتس
اه يابنات والله الموضوع مايستاهل اسم مشكله عشان اتطلق عليه
هو الحين مسافر ويرجع الاثنين ماني عارفه اشلون الوضع راح يكون واشلون حياتي انقلبت مع اني ولله الحمد راضيه بقضاءالله وقدره وصبرت كثير على اشياء والله محد يقدر يتحملها
بس خايفه اذا جا اشراح يسوي وادعي ربي انه يرده لي رداً جميلا
هو من النوع اللي اذا زعل يفجر يعني يقول اشيا مو فيني واشيا قديمه صارت وانتهت يعيدها ولازم الناس كلها تدري بمشاكلنا
وامه وخواته مع انهن يشوفن كل شي ولا يعجبهن تصرفاته الا انه لما يشكي مني تلقاهن يصفن معاه علي ويقون قلبه زياده علي
عطلتنا بعد كم يوم وعلى اساس انه يجي وياخذنا معاه لدوله اللي يشتغل فيها وبعدها نروح لاهلي
الحين الوضع تغير انا مطلقه ومحد يدري بطلاقي الا انا وهو
وهو مجنون ممكن يسوي اي شي عشان يحط الغلط علي
دايما ادعي ربي انه يهديه ويصلحه وواستغفر والوتر ولله الحمد ماخليتها
والحمد لله كل شي ربي كاتبه لي هو خيره لي ومتأكده من هالشي
لكن لما افكر اشراح يصير تضيق فيني الدنيا
ادعوا لي بنات ان الله يهديه