والله حسافة يا بنات حتى كلمة ......

السلام عليكم ورحمة الله وبركاته

حبيت اكتب هالكلام اللي فعلا مضايقني وايد ومتعبني وما توقعته من البنات

انا يا بنات ابيع الشدو المخملي وبسعر حلو والتوصيل مجاني وين ما كانت البنت والله محد مثلي

من التاجرات (اسمحولي يا التاجرات ) يوصل ببلاش لاصار ولا استوى مثل هالشي

يعني انا اللي ادفع رسوم الأرامكس ويوصلها للبنت اللي تبي الشدو واخرتها تتصل وتقول

ما وصلني ومتى بييني وليش تأخر شو ذنبي انا عالأقل كلمة حلوة ما سمعتها منها حتى

مشكورة وتسلمين ما سمعتها ولا حتى حطت موضوع وشكرتني فيه والله مستغربة

حتى كلمة يعطيج العافية ما سمعتها ابدا ليش وين ساروا بنات البلاد وشو اللي استوى فيكم

والا ناس وناس ترى ناس عن ناس تفرق مو كل نجمة في السما تبرق

وليش هذا جزاة المعروف انا خلاص بترك هالشغلة لأني فعلا تعبت وايد وتعبت زوجي عندي

المسكين ما خلا مكان ما طرشته لين ما قالي والله ما تسوى علينا هالشغلة صدق بهدلة

وغير بنات الخليج اللي حجزوا عندي وسرت اييبه واللي قالت لي خلاص ما اريده

واللي للحين كل يوم تقولي بكره بدفع وانا يالسة اترياهم صدق ما عندي سالفة

واللي توصلها تقولي مكسورة واللي تذمر واللي تشتكي من التأخير يعني اذا كان عن طريق

الشحن وانكسر شو اسوي وشو بيدي كيف اقدر اعوضج وشو الحل

انا موقاعدة اشحت من حد انا اترزق الله حالي حالكم بس ليش هالتعامل اللي يلوع الجبد

والتعامل الجاف هذا اللي بغيت اقوله وسلامتكم انا ما اقصد حد معين انا اقصد البعض

مكنم لكن الشكوى لغير الله مذلة بس الله يسامحهم ...