السلام عليكم ورحمة الله وبركاته
اسمحولي خواتي أنا أول مرة أشارك بموضوع في هذا المنتدى , لكني أقرأ فيه دائماً وأقرأ تجارب الأخوات بالريجيمات , وحتى من سنتين خذيت ريجيم من هذا المنتدى لطالب الشمري ونقصت 6 كيلوات وبان علي حيل حتى لما سافرت الكل يقولي ضعفانة حيل , لكن للأسف هذا عيب الريجيم إلي ينحف بسرعة يرجّع بسرعة , عشان جذي يا بنات لازم نفكر في بعدين إذا الله كتب لنا عمر, ملينا من الريجيمات نسوي ألف ريجيم بالسنة , ننقص وبعدين نرجع تعبت والله .
عشان جذي بقولكم شنو سويت , سبحان الله دايماً أدعي بالرشاقة وأتمناها لما فتح الله على قلبي له الحمد والفضل سبحانه , عاد رحت لدكتور ريجيم وقلت بمشي مع إلي يقوله لي وبلتزم ,
أول شي سوولي تحليل عن نسبة الدهون والماء فكان الماء أكثر بحمد الله , وعطاني ريجيم شكله للي مثل حالتي لأن إلي دهون أكثر من الماء ريجيمها غير , المهم بديت بالضبط من 5 شهور صج إني تعبت أول أسبوع لكن بفضل الله استمريت ونقصت مع أنه ماعطاني يوم راحة لأنه يدري أنا مخبصة مخبصة سمحلي أو لأ ( يعرف الحريّم) , عاد أستمر أسبوعين بالضبط على الريجيم وأعطي نفسي وجبة مجانية لو كنت ماشية صح مع الريجيم : )
طبعاً من غير ما أسال الدكتور شسوي تعبت ,( إلي يبي الدح ما يقول أح )
المهم مرات أتمنى أخبص لكني أتذكر الدكتور أخاف يعصب علي فأتراجع , والحمدلله الحين صج مانقصت إلي أبيه لكن والله يا بنات أخبص أبو التخبص لأني ماقدر أروح للدكتور هالفترة( فرحانة الأخت)
لكني ما زدت كيلو واحد مثل الريجيمات إلي كنت أسويها قبل كنت بسرعة أرجع الكيلوات , لكن الحين يثبت وزني ولا أزيد , المهم نسيت أقولكم إن الدكتور ما يكتفي بقياس وزني العادي , لا يقيس وزن الدهون إلي نقصتها بعد , مرات يكون وزني العادي نقص لكن الدهون ما نقص يزعل ويعصب علي , تدرون ليش؟ يقول لأنك خسرتي ماء والماء راح يرجع فلا تفرحين ( يافرحة ماتمت) , وقالي بعد بوصل الدهون عندك ل 27% عشان لو تزوجتي وجبتي عيال ما ترجعلك الدهون , فهمتوا شي !!!
من رحت للدكتور الله يجزاه خير , عرفت إن فيه ريجيمات كيميائية صج تنقص وبسرعة , لكن ترجع بسرعة , أنا مرة قريت لوحدة يمكن هني بالمنتدى ما أذكر والله لكن تقول الدهون إلي تراكمت بسنين مستحيل تروح بأيام , فقلت إي والله ليش حنا مستعجلات ننقص لو كنا نبي الرشاقة صج ندور على ريجيم :
1-أول شي يكون صحي وفيه كل المجموعات الغذائية .
2- وثاني شيء نلتزم فيه قدر الإمكان وما يمنع نعطي نفسنا وجبة أوف , ترى قلت وجبة مو يوم كامل كل أسبوعين على الأقل.
3- وثالث شيء الدعاء .
4- نلتزم بكثرة شرب الماء. ( بصراحة ما التزمت)
5- شرب كوبين على الأقل شاي أخضر.
6- على الريق (كوب ماء دافي + عصير نص ليمونة + ملعقة كمون مطحون ) رهيييييييييب
7- المشي إلي تقدرين عليه.
8- يمنع الأكل بعد الساعة 10 بالليل وإلي تسهر مثلي تاكل هوا : ) قصدي تتصبر أو تطبق تاسعاً.
9- في حالة الجوع بين الوجبات يُسمح الأكل من هذي الأصناف ( خس - خيار مع روب قليل الدسم -برتقالة - تفاحة - كيوي - شرائح أناناس )
10- يُسمح شرب الشاي والقهوة بدون تحديد الكمية لكن بشرط بدون سكر أو سكر قليل جداً(هذا من عندي) , وتجنبوا سكر الريجيم إلي اسمه الكاندريل خطير جداً ,يسبب مرض السكر والكلى وبلاوي زرقا ثانية , الله يحمينا وإياكم.
طبعاً إلي تقدر تروح دكتور أو دكتورة بس أهم شي يكون عصبي عشان تخافون منه (مثل حالتي) يكون أحسن : )
آسفة على الإطالة
(الريجيم إلي عطاني الدكتور)
(أولاً: الفطور)
2توست أسمر+ جبنة واحدة سلوفايد أو ملعقتين لبنة قليلة الدسم + كوب حليب قليل الدسم
(ثانياً: الضحى)
كوب شاي أخضر
(ثالثاً الغداء)
نص صدر دجاجة مشوية منزوعة الجلد أو 2 همبورغر مشوي مع خس+ خيار مع روب قليل الدسم مع قليل من بذرة الكتان (رهيبة) + عصير أناناس
(رابعاً: المغرب)
3تمرات أو 2 حلو قهوة + قهوة بدون تحديد الكمية
(خامساً: العشاء)
ربع خبزة سمراء + بيضة مسلوقة أو 2 ملعقة فول أو جبنة سلوفايد أو ملعقة لبنة قليلة الدسم + خيارة + عصير أناناس
دعواااااااااااااااتكم لي ومن ودها تبدأ معاي بريجيم صحي ؟؟؟؟
:26: :26: :26:
فرشي التراب @frshy_altrab
عضوة فعالة
يلزم عليك تسجيل الدخول أولًا لكتابة تعليق.
رومنسية ومنسيه
•
مشكوره رجيم حلو وتجربه حلوه
جزاكى الله الف خيرا غاليتي على نصائحك المفيدة وبالفعل الى ينزل بسرررررررررررعة يرد بسرررررررررررعة
مشكورة وما قصرررررررررتي
مشكورة وما قصرررررررررتي
مشكوره على موضوعك وبالفعل انا زيك انزل بسرعه واطلع بسرعه الله ينولنا مرادنا جميعا ونصبح رشيقات ..
الصفحة الأخيرة