فضفضه لا اكثر

ماتوقعت في يوم بكتب هنا انا بطبيعتي الحمد لله مااحب اشتكي ..لكن والله وصلت مرحله مااقدر اصبر
خليني احكي شوي عن وضعي يمكن يرتاح قلبي ولو اني متأكده راح اختصر لان فيه احداث كثيره ماابي اتذكرها
قبل اي شي انا ماني صغيره ولا مراهقه متزوجه وعندي اطفال الحمد لله ووضعي مع زوجي مو مستقر لكن مضطره اتحمل والسبب الرئيسي اهلي
اهلي ناس غريبين يمكن لو اكتب عن كل تصرفاتهم ماتصدقوني ناس قاسين جافين بشكل ماينوصف قبل مااتزوج كنت انضرب ضرب مو طبيعي من امي وابوي على الصغيره والكبيره على اي شي لدرجه ان جسمي يتلون كدمات زرقاء وخضراء ضرب والله ماينوصف الى الان احس بألمه والله انا البنت الكبيره لهم وبزعم بيربوني وبيخوفون خواتي فيني حتى مايغلطن وسبحان الله ولا وحده فيهن كانت تنضرب بحجه انهن صغار وانتي مراهقه هذا الشي خلا خواتي الاصغر مني وعددهن اربع يتمادن علي مثل اهلي الاحترام صار معدوم حتى قدام الناس طبعا الفرق مو كبير بيني وبينهن اكبر وحده فيهن بيننا سنتين يعني مفروض نصير صديقات لكن صار العكس والسبب الرئيسي معامله اهلي

ومهما كنت اشتكي لامي واحاول اوضح لها مشاعري ماكانت تسمعني على طول صراخ ثم انطق بعدها هالشي خلاني اتمسك باول واحد طق الباب اللي هو زوجي وفرحت انه بمنطقه ثانيه
الان لي سبع سنوات متزوجه اهلي ماازورهم الا كل ثمان شهور تقريبا اجلس عندهم اسبوعين اشوف الذل فيها بس هالمره من خواتي صحيح ماانضرب لكن فيه قله ادب واحترام واهانات على الطالعه والنازله حاولت اتقرب لهن بالكلام الحلو وبالهدايا مانفع ..سويت كل اللي يخطر في البال لكن مافيه نتيجه الاقي نفسي لحالي من اول يوم يتجمعن بغرفه وحده ويسكرن الباب عليهن وهالكلام حتى قبل لااجيب اطفال ..اذا راحن للسوق يدارن اغراضهن عني برغم اني مااخبي اي شي عنهن تدرون اني قبل فتره انصدمت لما سمعت من الناس ان زواج اختي مابقى عليه الا شهر.قبل مده سويت حساب في الانستقرام وارسلت على جوالاتهن اضيفوني مااحد ضافني يعني مصرين مايبوني
نسيت اقول تمر علي الافراح والاحزان القى نفسي لحالي مااحد يعايدني حتى ولو كلمت ماردن..مستحيل انسى لما كنت بكريه ولدت ولاده مبكره وكنت لحالي اترجاهم يجون يساعدوني مااحد حن علي
امي كبرت الله يشفيها ويعافيها ويرفع عنها لكن لازالت جااااافه ماترد على مكالماتي الا مره وحده في الشهر وتكلمني برسميه لا احد يقول اتصلي عليها اكثر من مره لاني احيانا احرق التلفون وماترد تقولي ليش ارد ماامداك مكلمه من اسبوعين
اتمنى والله احس باللي يقوله البنات امهم وخواتهم يشتاقون لهم ويفرحون فيهم والله احس بحرقه لي فتره مو قادره انام حاسه بحنين والم وقهر ومشاعر ماتنوصف كلمت اهلي بالطيب وبالزعل وبواسطات بعض الاهل لكن الجاف يبقى جاف انا بين نارين نار اهلي ونار زوجي