في بيتنا نفساااااء( صورة وجه موب عاجبه الوضع)

<< تحسون اني داخله وريحتي حلبه صح؟؟ :twirl:

بس تراني من يوم طبت اختي البيت وانا مسيكينه أكلي كله متلخبط :crap:
اخاف امي تسوي فيها منصحه وتختلنا وتحطها لنا بالأكل :icon29:
انها ذي عوايدتس يا ام عبدالله مغير تلعبين علينا على بالتس الحلبه زينه
وتغشينا تخلينا ندق بذا المرقه وذا المرقوق وأمي مستااانسه
كننا اول مره ناكل بحياتنا
وحنا ياغافلين لكم الله ناكل وحنا مستغربين :icon19:
انا ( وانا داقتن في ذا المرقه وش زينها والله) : يمه وش فيتس فاقتن خشتس الله يهديتس ترانا تونا متغدين قبل كم ساعه؟
امي : هاه.. ولا فاقه خشتي ولا شي بس انتي كلي من ذا المرقه تراها زينه مووووووووووب انا اللي مصلحتها .!!!!( صورة وجه مسيلمه الكذاب)
انا : والله وش زينها فيها طعم غريب وشو؟ :confused-
امي وهي تدز علي خبزه ثانيه : ولا غريب ولا شي بس كلي كلي رمي عظمتس وانا امتس
انا : الحمد لله اللهم دمها نعمه الله يخليتس لي يا اميمتي
امي : قضيتي ؟
انا : ايه الحمد لله
امي:ايييييه بالعافيه + ابتسامه صفرااء خبيثه
انا : يمممااه ؟
امي وهي تطأطئ راسها : اقول ورا ما تذلفين تجيبين لي كاس ما احس اني بشرق عقب شوي
انا : يمااااااه ؟؟
امي مسويه نفسها شرقانه : كح كح كح احم احم كح كح ( تكح وتناظرني بنص عين تشوفني سجيت ولا الى اللحين ماسكه الخط) :icon29:انا : يماااااااااااه ؟
امي : ايه ايه فيها حلبه وش عندتس ؟؟؟( صورة وجه غلطان ويكابر)
انا : لااااااا ليه حرام عليتس ليييه ليييه ؟؟؟؟؟؟؟
امي : متزاينتن صحتس انتي وخشتس.؟؟ :7_5_131:
انا : ما يخالف طززززززززززز في صحتي في ستييييين داااااهيه
بس ما ابي تصير ريحتي عجوز عمرها مية سنه حراام عليتس ( صورة وجه ميييت من الصياااااح)
امي : اقووووول هذاي من يوم دخلت اختس البيت وانا اكلها وما قد شميتوا فيني ريح حلبه :D
انا : هاه .. ايه صح ما فيتس ريحة حلبه ( صورة وجه يصرف) بس انا مااااابي مااااااااااااااااااابي

عااااااااد امي هوايتها الغش في الاكل يعني مرره شفتها في المطبخ
تحمي للمقروده حليب ويوم قام يقلب الفوح
وتقوم عليه امي وتصلّه في كوب يعني بالقليل بالقليل يشل لتر لتر ونص هاه تسذا يعني..
همن تاخذ لها مغرفة عسل وتحله في ذا الحليب
ومن ثم تفقش عليه بيضتين نيه ( صوره وجه وده يجيب غدا أمس )
ومن زود الاتقان ما يحطون البضه كلها يحطون الصفار بس واتسبديييييييييييييييه
وتجيب ملعقة حلبه مطحونه وتذوبها فيها يا سلااااااااااااااااااااااااااام

-------------------------------للعلم فقط----------------------------
ترا الحلبه لها انواع للنفاس
يعني ممكن تشربها مع الحليب
او يحطونها بالمرقوق
او ياكلونها حب مسلوق
او ممكن مطحونه في مرقة
-------------------------قضى للعلم فقط-------------------------

همن تجي تدنجر بتوديه للمقروده
وانا تابعها بعيوني وكلي دهشتن من خلطة الساحرات الثلاث
امي : خذي اشربي ذا الحليب يدفيتس
المقروده : يامال العافيه
المقروده بعد اول جغمه: يمه وش حاطه فيه
امي وهي تسفط مهاد الصغيره : ابد مغير مفوحته مع سكر نبات
انا تووووي بحتسي ابقول أ....
امي تصمخني بزمزميه الشاهي : قومي صلحي لنا شاهي + وجه يغمزّ وقطع براطمه من العضعضه


ومن عقب ذاك المنكح وانا مقضيتن ال40 يوم سندوشتات بيض وجبن

بعدين حرام والله حرام
اخت النفااس هذي انسانه مظلومه
انسانه كل شي فوق راسها
انسانه مستغله من جميع الجهات كلن يأمرها مع كل جهه
خاصه اذا صارت الاخت الوسطانيه اللي اوب اسمها كوكي ولا ملسونه ( صورة وجه يقول عساهم يفهمون من اقصد)
يعني مثلا اذا جا ضيوف من يقوم يصب القهوه ويرتز مثل الجني غيرها؟؟
مغير أوايتز على فناجيل ذا الحريم لا تفضى بس << ترا ذا من زود الكرم

بعدين توني ادري ان بعض الضيوف نجوووووووس نجووووووووس بشكل لا يوصف
يعني صدز ما يقدرون شعور اخت النفاس؟؟؟
كل من جانا جاب معه أطااااااايب التشوكلات والحلويااااااااات
وصواني وزبرقه وحركااااااااااات تجيب الصيااااااااااااح
حرراااام عليهم ليه كذا لييييه؟
وش ذنب اخت النفاس كل يومين زايده 3 -4 كيلوا ليييييييييه ليييييييه؟
يعني ما يعرفون ان اخت النفاس الوسطانيه اللي اوب اسمها كوكي ولا ملسونه مهيب ناقصه؟؟؟؟
والله بعد من زين الضيوف بالله شوفوا معي ذا الموقف ذا:
قاعده انا على كمبيوتري اسولف مع حصيصه بنت خالتي نتناقر في الماسن
وتجيني امي طاااايره : هييييييييييييييييييييء << شهقه << ياناااااااس يا سعدكم بي صدز
انا : هييييييييئين وش فيتس ؟؟
امي: انتي قاعدتن فيذا وام سليّم تحت ؟؟ وام صويلح بعد تحت هي وبنتها غزيل ؟؟ مير يا جسرتس يا وجه بن فهره ..
انا : وش علي منهم ذولا تراي منيب احبهم .. خاصه ام سليّم مغير تعذرب فيني وفي لبسي منيب اواطنها ..
ولا عاد بنت ام صويلح غزيل تراها قروييه مااااره ومهيب من ستايلي فرجائن رجائن لا تلزقونها فيني على بالكم اننا بنات مع بعض بنقد نسولف لاااااااااا تراي اعلمتس من اللحين منيب مسولفه معها تراها للحين تحسب الماسنجر اسم سكروب ( وجه بنت فهره)..

ما امداني اخلص الجمله ذي الا القى روحي بوسط المجلس وخشتي على دمجة ام صويلح اسلم عليها << جارتّها امها مع علباها

واسلم ويبدا مشوار القهوه والحلا لعنبوا بليسهم ذا الحريم ما يشبعون
تدخل الزمزميه مليانه عشر دقايق الا هي مرجعه المطبخ عشان يعبونها افففففف
واذا ربي حن على اخت النفاس وخلصوا الحريم من ذا القهوه تمد ام سليّم الفنجال وتقول : بس يا عمري شكلي غثيتس..
انا : بدري يا ام الشباب ورا ما اسوي لتس دبة قهوه احتياط موب ازين ؟
ومن ثم جيني كف حلاااقه يحبه قلبك .. من الوالده طبعاً..

وانا قاعده اصب القهوه الا تناديني المقروده النفاس من بعيد ووجها متحمممممممممس عندها علم
وانا اناظرها من بعيد وعجزانه اقول لها ضفي وجهتس
وهي مصصصصصصصصره عندها علم
انا يوم جيتها : خير وش تبين يا مرت بباي وش عندتس؟
مرت بباي : اقووول تعرفين ام سليّم؟؟
انا : الحولا ؟؟ << هي يعني ميب حولا بس انها اذا ناظرت قدام تصير عينها اليمين تناظر شرق واليسار تناظر غرب << مهيب تخر بس فيها شقيق
مرت بباي ( وهي تصر على ضروسها) : قصري حستس لا تسمعنا ..
انا : طيب هي اللحين تناظرنا ( صورة ثنتين يبي يكتشفون وين تناظر ام سليّم)
مرت بباي : هاه.. مدري اصبري << تمد لسانها وتسوي حركات غبيه بوجهها
ام سليم يا جبل ما يهزك ريح مهيب لمناااا ابد
انا : اللحين انتي بتقولين لي وش عندتس ولا أغولتس بمقاط بنتس؟<< المقاط هو الحبل اللي يلفون به البزر اذا مهدوه << يانااااااااااااااااااااااااس ياسعدكم بي للمره الثانيه
مرت بباي: اقول انزلعي هذا وانا كنت بقولتس ان ام سليّم تدور لولدها المزيون الطيّار عروس كش عليتس منيب معلمتس طسي فيذاك !!
انا اقولب الحتسي في راسي : هاه تقولينه صادزه؟؟ ... ام سليّم وراتس ما تقهويي يا حافظ عسى بس ما جازت لتس قهوتنا + ابتسامه شاقه الوجه عشان تبان ضروسي الزينه ..
ام سليّم وهي زامتن خشيشتها ناقده علي عشاني لابستن تنوره جنز ميدي : لا يا عردزي قهوتكم زينه + نظرات فااااااحصه على السيقان اللؤلؤيه..
عاد انا يوم اكتشفت علتها واقوم على بالي برقعها : ههههاهاهاهههاهاهاهه الله يخسها ذا الشغاله مير تخم تنورتي ذي وانا توي شاريتها وتنقعها في ما وملح وما اصبح عليها الصبح الاهي شامره هههاهاهاهاههاهه ولا هي من اول طووييييييله تسحب تسحب هاه عرفتي طويييييله عاد قلت ابلبسها لو مره عشان ما تروح فلوسها علي هااههههاهاهاهاههه << على بالي اضرب حجرين بعصاة يعنني تراني متستره ومنيب مسرفه
ام سليّم ولا تزال زامتن خشتها وناااااااااقده : اييييه ما يخالف ما يخاالف ..
مير وافقد الأمل منها واقوم واخررررررررررررربها وامد لها الفنجال باليسار يالله بالطقااااااااااااااق..


عاد عقب كمن برهه من الزمنااات جا وقت الرفايع من الحريم!!

تعريف الرفايع :هي عادة منذ قديم الازل تتلخص بان الحريم اللي يزورون النفاس يجيبون معهم قروش (دراهم) ويلفونهن بمنديل ويحطونها في ذا وشسمه ايه ..( صورة وجه توهق بكم يالعيال)
همن عقب يطلعون من عند النفاس يسلمون عليها ويسلمون عالرضيع وطلعون الفلوس من ذا وشيسمونه ( توهقت بكم مرتن اخرى) ويلفزونها في مهاد الطفل ..
يعني اذا فيه يوم زاخر بالضيوف يمكن على نهاية الدوام .. اااه اقصد نهاية اليوم تلقى مهاد البزر فيه حول ثلات الاف اربعه يعني تسذا .. تف ماشاء الله علينا ضيوفنا كااااشاااات ( صورة وجه يقول ايه من جنبه كاااشات )
المهم يوم حلت اللحظه الحاسمه لحظه اللي بيرفون الحريم وانا يحول مدري شسالفه اجمع الفناجيل الفاضيه احطها في الطوفريه وام سليّم وام صويلح يسلمون عالصغيره واشوف
امي من بعيد تقول بهمس : هش هش هيه يالعوبا !! تعالي فيذا يا مال الدقم
انا : وراه وش بلاكم تصددون عنهم؟؟
امي: دهن الله اصلن جابتس يالثوره تعاااااااااااااااالي !!!!
انا : وشو وش فيه ؟؟؟ والله شكل ام سلّم قاعده تلغم البنت يمه اللحقي مدري وش دسوا في البنت اخاف انه سحر ولا شي تعالي ناظري!!
امي تسوي بمقاط البنت حبل الكاوبوي وتجرني مع حلتزي
الحمد لله ما مت ولا جاني شي بس ان المقاط ناشبن بي يتدودل كنه كرفته..
يوم جو الحريم يطلعون واناظر رجلين ام سليّم واقول : ام سليّم نعالتس منكوسه (صورة وجه كاتم الضحكه)ام سليم : لا يا بنيتي انا رجليني تسذا ..
انا : خخخخخخخخخخخخخ ما يكفي عيونتس متخولفات بعد رجلينتس خخخخخخخخخخخخخخ
( صوت امي وراي تعشق الشوزن اللي بتثوره فيني)
وانا اللي اركب رجيلاتي وانحااااااااااااااش
ارقى لغريفتي واويتز مع الدريشه على ولد ام سلّم المزيون الطيار
والله يا هو صدز مزيووووووووووووووووووووووون
بس ما يخالف على قولة المصاريه القواز إسمه ونصيب (صورة وجه يتسذب على روحه )

وراحوا بسلامتهم وقضت سالفتي ..
عساكم رحمتوا اخت النفاس اللي اوب اسمها كوكي ولا ملسونه ؟؟؟


منقول <<<<لتوسيع الصدر الضااااائق

واللي مهي متضايقه رجاااااااء تنسى اللي قرته وتعتبر نفسها ماقرت شي ورجااااء حار لاتضحك