كيف تستثمرين راتبـــــــــــــــــــــــــك ؟

:26:
السلام عليكم ورحمة الله وبركاته
كنت اتجول في منتدى بناء وقرأت موضوع مميز وهو سؤال من شاب سعودي حكيم لم تخدعة ميول الشباب في البحث عن
السفر والترفية
لازال في بداية حياته العملية (متوظف وراتبة 11 الف ريال) ويطرح سؤال على الرجال من ذوي الخبرة عن كيفية البحث عن أفضل طريقة لاستثمار مايتبقى من هذا الراتب خصوصاً قبل المسؤوليات والأولاد والزوجة
وقد ورد على السؤال
إجابة مميزة نالت استحسان كل من قرأ الموضوع من الرجال الذين عركتهم الحياة بالخبرة والديون والربح والخسارة
وقد رأيت من باب أحب لأخيك ماتحب لنفسك أني أضع هذه الإجابة
هنا في هذا المنتدى لأن هناك الكثيرات هنا خصوصاً الموظفات ورواتبهن جيدة والتزاماتهن قليلة

***
إستثمار (مريض المحبة)
اول شي حاول الانتهاء من الاشياء الصغيره اللي تقدر عليها قبل توفر لمستقبلك ويكبرون الاطفال وتكثر طلباتهم ثم معاد تقدر تلحق علي شي إلا بالاسلاف والديون وانت الان على الشط وكل شي مفتوح قدامك وتشوفه من زاويه واسعه وقبل تضيق عليك وتجبر على طريق ماتبغاه لكنك مجبر تسلكه

عن نفسي غلطاتي ماهي كثيره لكنها كلفتني كثير ،،،،،،،، اول ماتوظفت كنت عزوبي وساكن وآكل مجانا ً وراتبي 7000 ريال واشتريت سياره نوعا ما غاليه وكشخت بها فتره ثم ماذا ؟
لاجديد
ظهرت سيارات افضل مني وانا باقي اقسط لكن السياره كانت ضروره بالنسبه لي وكنت اقدر اشتري ارخص لكن قدر الله وطيش شباب ومادريت ان الوقت بينقلب كذا لكن اذا انت تمتلك سياره فاصبر عليها ولا تفكر تغيرها الان وحاول انك تجعل عندك اصول من ارباحها بعدين تقدر كل سنه تشتري سياره جديده

بعد ما انتهيت من اقساط السياره تحسفت لان سيارتي اللي كانت كشخه الان صارت ولا حاجه ثم تزوجت وكلفني زواجي واستدنت وسددت ديوني واشتريت ارض وقدمت على الصندوق العقاري وهذي غلطه كبيره اني تاخرت والمفروض اقدم اول يوم توظفت لكن ماكان فيه مثل الظروف الحاليه انك تقدر تقدم عن طريق المكاتب ب500 ريال
مشت الامور معي ميسوره اكل راتبي انا وزوجتي واسدد اقساط الارض ثم طلعت علينا طفره الاسهم وهي ماكانت طفره كانت تطفيره وهي القاصمه لي وبدياه اختلال الموازين وتدحرج كره الثلج لانها خدعه لدرجه ان البنوك تتصل يوميا تبغاني اوافق بس وبيعطوني كل التسهيلات وبطاقات تميز وفيزا مجانيه طول العمر وخدمات خاصه بالبيع بالانترنت وانت في البيت او بالتلفون وكل هذا بس اوافق اجيهم واوقع على ورقه القرض لكن انا كنت متسلف وشاري ارض وما انتهت اقساط الارض الا في منتصف فوره الاسهم ويوم ارتحت من الاقساط شفت الزملاء انهبلو بالاسهم ويربحون واقلقو راحتي وقالو انك بتجلس مديون وفقير طول عمرك وهذا انت كنت تقسط واذا مادخلت معنا بتبقى تقسط وهذي منحه من الدوله ان الشعب يكسب ونصير افضل شعب في العالم وفعلا ضعفت ورحت برجولي اخذ قرض طويل الاجل باكثر سيوله لاني ابغى اشتري بيت واخذنا القرض واشتريت اسهم وقفلت الشاشه وقلت اذا وصل راسي مالي مليون بعت وعلى مكتب العقار لكن ماكنت اعرف اني اشتريت في اخر السلم وطااااااااااااااح السوق وطاااااااااااااااااااااااااااااااارت الفلوس وباااااااااااااحت ثم قالو لي السوق بيرجع والامور بتتحسن وبعت الارض ورحت اعدل بقيمه الارض وبعض بطافات الائتمان اللي عندي لاني ابغى ارجع راسي مالي واطلع ( الان بديت افكر صح وطلع اصلا تفكيري خطأ ) وتحملت اكثر مما كنت فيه وطااااااااح السوق مره ثانيه وثالثه ورابعه وخامسه وحلت الايجارات وقمنا نسددهم من المحفظه وصفّر الرصيد وصرنا مديونين وغرقانين ونسدد الدين بالدين حتى كبرت الحفره واستسلمنا ومعاد فيه فلوس والقرض شاد حيله وباقي منه 4 سنوات

هذي تجربتي فيها غلطات بدأت صغيره ثم تدحرجت مثل كره الثلج حتى اصبحت السيطره عليها صعبه وكلها غلطات ماكانت محسوسه لانها تمشي بسرعه وحصلت لناس كثير مثلي واللي كانو يقولون ادخل حصل لهم مثل ماحصل لي ويمكن اكثر ولحظتها مافيه احد ينصحنا ويقول هذا خطأ لان الشعب والحكومه كانت تطمنا وكنا مجبرين نصدقهم لاننا نبغى نستيعد راس المال لكن مارجع راس المال وطلع كلام العساف وكل مسؤل عن قوه الاقتصاد والسوق طلع كلامهم كذب وزادت المشكله مشاكل وزادت الديون من كل جهه لاننا بين قروض وبين غلاء فاحش والتزامات وهذا سبب ضرر لكن الضرر يختلف من شخص لشخص حسب وظيفته ومدخراته ووقوف اخوانه او بعض اصحابه ففيه من خرج من الازمه بسرعه وفيه من اللي كل اللي حوله مثله وبقى في دائره الازمه

هذي تجربه احكيها لك لانك في اول مشوار حياتك ويمكن عندك من ينصحك لكن ماعندك من يقص لك قصه حياته عاش فيها خداع من وطن ومن بنوك ويمكن تمر بك مواقف مثل مواقفنا فلا تندفع وتصير عاقبتك وخيمه وضررها ياخذ بك سنوات

نرجع للماضي فيما لو رجع بي والاشياء اللي تمنيت اسويها

كنت اتمنى اني قدمت على القرض العقاري من اول يوم والان فيه مكاتب تعطيهم 500 ريال ويقدمون لك ويعطونك رقم الحجز وهذي لاتفكر انك تفرط فيها وقدم اليوم قبل بكره

اذا تقدر توفر الشهر الاول 6000ريال فأفتح لك حساب في بنك مختلف عن بنك راتبك واشتر باقه من الاسهم الاستثماريه الرابحه اللي تمنح ( بتقول رجعنا للاسهم اقول لك لا مارجعنا مضاربه وخساير لكن رجعنا استثمار مثل ( صافولا وسابك والراجحي والاتصالات السعوديه والانماء واسمنت اليمامه واي شركه ربحانه وتمنح كل سنه اسهم ) بتقول وش الفائده ابقول لك حاول قدر الامكان تشتري في كل سهم منها ب3000 ريال ( تقدر تخليها على دفعات ومش شرط في شهر واحد ) المهم انك تحصل على الباقه هذي باي سعر كان وخلال مده قصيره عشان تقفل عليها وتنساها وانس ان عندك محفظه فيها اسهم لان الاسهم هذي بتشتري اليوم 100 سهم واذا نسيتها بعد 10 سنين بتلقى كل سهم منح ومع مرور 10سنين يمكن يصير عندك من كل شركه 1000 سهم لانها تمنح كل سنه سهم لكل سهمين او سهم لكل 3 اسهم وماعندك مشكله في سعرها ذاك الوقت ان عطاك الله عمر وايضا توك في شبابك ويمكن توك متزوج وماعندك الا طفل او طفلين

اذا انتهيت من كل هذا حاول تحط لك مبلغ 7 الاف او 8 الاف في صندوق استثماري في احد البنوك اللي تتعامل بشرعيه في المضاربات في سوق الاسهم بتقول وش قصتك مع الاسهم اقول لك لا تسألني لكن حط مثل المبلغ البسيط في صندوق شرعي وانسها مع نسيانك للمحفظه وياحبذا لو تكون المحفظه حقتك والصندوق اللي مشترك فيه في بنك واحد ويفضل البنوك القويه

الان قدرنا نقدم على الصندوق العقاري ب 500 ريال او 1000 ريال وحجزنا اسم وقدرنا نمتلك باقه استثماريه في محفظه هدفها طويل الاجل ب10 الاف او 12 الف ريال تقريبا ونسيناها للابد وقدرنا نشترك في صندوق مضاربات قد ينمو مع الزمن وقد يخسر ولكنه بمبلغ رمزي جداً

هذا كله سويناه من اول 3 او 4 رواتب باجمالي (1000 حجز اسم في العقاري + 12 الف محفظه اسهم + 7 الاف صندوق مضاربات استثماري ) المجموع 20 الف من 30 الف اجمالي راتبك في 3 شهور بحيث انك صرفت على نفسك كل شهر 3300 ريال والباقي تم تشغيله

خلصنا الان من 3 رواتب

طيب وش بقى عندنا
باقي عندنا كيف ندبر قيمه ارض نبني عليها اذا طلع اسمك بعد 10 سنين وكيف ندبر فلوس زواج بعد 4 او 5 او حتى 7 سنين والراتب مايكون عليه اقساط طيب كيف اوفر الاشياء هذي ؟

الطريقه
اما عمل جمعيه مع زملاء لك ثقات او تتسلف من شخص قادر وتسدده او قرض قصير الاجل بحدود سنه لا تتجاوزها والفائده لاتذكر
نبحث عن ارض في منطقتك ولا ادري وين انت ساكن وكيف اسعار الاراضي لكن لنفترض 70 الف ولاتشتري في منطقه واصلتها الخدمات وغاليه لكن اشتر في مكان على اطراف مدينتك في مكان ماوصلت له الخدمات ويكون شمال او شرق فقط لان التطور في كل مكان يتجه شمالا وشرقا وماتراه اليوم خاليا تراه بعد 10 سنين مأهولاً

انتهت السنه الاولى ومعنا ارض رخيصه وعندنا اسم محجوز في الصندوق العقاري ماكلفنا شي وعندي محفظه فيها باقه استثماريه يمكن تحقق لي 250 الف بعد 10 سنين ويمكن تبقى كما هي وماكلفتني شي من الاساس ونسيت اصلا اني حاجز فيها مبلغ لاني صرفت على نفسي ومابخلت عليها يوم كنت اشتري وعندي صندوق يضارب نفسه بنفسه وان لقح صندوقنا خلال مده استثماريه طويله او ماضره الجمل

الان زملاك قامو يتزوجون وكلن يسألك متى تتزوج وانت بديت تتضايق من اسئلتهم لكن عندك جمعيه عشان الارض اللي شريتها او قرض قصير الاجل ( والقروض في الارض او في الزواج ماهي عيب ولا خساره ) لكن لاتغامر بقرض مدته اكثر من سنتين لاننا نبغاك اذ خلصت قرض او سلفه الارض وصار راتبك كامل تجلس وتحط يديك ورا راسك وتقول الحمد لله رب العالمين وكل ريال صرفته في وناسه روحات وجيات بتنساه ولاتحرم نفسك المتعه وتبخل على اهلك واللي حولك
لكن نبغاك توصل للمرحله هذي اللي انت راضي فيها عن نفسك واللي حولك راضين عنك ثم تقول وش بقى ؟
نقول باقي حاجتين
ياتختار الزواج اللي الناس ازعجوك عليه وهم اساسا مالهم مصلحه من زواجك او جلوسك لكن لقافه او تختار عماره استثماريه

قرر ثم علمنا

تبغى الزواج تزوج ودبر عمرك ومعك مهله سنه او سنتين تنهي جميع التزاماتك الماليه بسبب الزواج
بتقول لا الزواج مؤجل وتوني صغير
بنقول لك اقترض من بنك واشتر لك عماره استثماريه قيمتها 350 او 400 الف ومن دخلها سنتين تقريبا ( 30 الف او 35 الف كل سنه ) بتكون جمعت مهر الزواج ومعه شويات من توفير راتبك واصبح عندك اصل مملوك يدر عليك سنويا مبلغ بسيط تقدر تستثمره في اراضي على اطراف منطقتك الرخيصه جداً وتصير شخص يحب يجمع صكوك الاراضي وهذي بتشوف اثرها بعدين (واسأل اللي حولك عن اسعار الاراضي في بعض المناطق قبل 10 سنين واسعارها الان ) او من دخلا تفتح محلات تجاريه وتشغلها وتدر عليك ارباح ايضا مع دخل العماره
واذا انتهى القسط تقدر تاخذ قسط ثاني وتشتري عماره ثانيه وبينزل اسمك ان شاء الله وتبني بيت ملك وطبعا راح يكون معك سيوله لانك تمشي من بداياتك على تخطيط معتدل ومابخلت على نفسك وتمشي بطريقه تكفل لك حياه سعيده بتوفيق الله

كل هذا وراتبك زين لان الاقساط اللي تدفعها للبنك ماتأثر في راتبك والقرض اساسا ماراح هباء منثورا او في شي ماله نتيجه لان في قرض عقاري قصير الاجل لشراء عقار يدر اموال ولكن لاتربط نفسك بقرض عقاري طويل من بدايه زواجك عشان تشري فيلا وتجلس فيها ويروح نص عمرك تسدد

الفيلا خططنا عليها من البدايه بحجز اسم في القرض العقاري وشرينا ارض نقدر نبي عليها او نبيعها اذا طلع اسمك في القرض العقاري ونشتري في مكان اقرب ولكن الهدف من القروض العقاريه هو امتلاك اصول تدر عليك دخل اضافي يحرك السيوله في يدك حتى لو سكنت مستاجر كم سنه لانك قادر تدفع الاجار بحكم راتبك ماشاء الله تبارك الله


كل ماسبق كان في قبضه يدي وسهل جداً الحصول عليه بدون شقى وتعب حتى لو تصاعبت اخي قراءته الان لان الخلل عندي بدأ مع فوره الاسهم لكن انت جنبك الله نكبتها وقادر على تطبيق مافاتنا الان بكل يسر وسهوله اما انا فلم يكن هناك من يوجهني وقبل كل هذا ماكتب الله لي ذلك والحمد لله على كل حال ومااكثر الآلاف التي صرفناها في اوقات كثيره والحمد لله اننا لم نبخل على انفسنا ولا على من نعولهم ولكن لم نكن نعلم مايخبي لنا الوقت ونحمد الله ونشكره على كل حال


واخيرا الصدقه لها فضل عظيم في البركه وفي تجنيبك مايسوءك ولاتمنع يدك من البذل
وثاني شي امك وابوك لاتنساهم من الهدايا والسؤال عن نواقصهم او مد مبلغ وهم يتصرفون فيه
وثالثا خواتك عازبات او متزوجات لاتحرمهم عطاياك حتى لو 100 ريال لان ال100 ريال في كل مره تجيب اكسسوارات والمره الثانيه تجيب ادوات تجميل والثالثه تجيب لها بلوزه او تنوره تغير بها وتكشخ بها
واذا تزوجت لاتنسى زوجتك من عطاياك

والله يبارك لك في مالك وفي وظيفتك ويطول عمرك على طاعته ورضاه ويزوجك من ترضى دينها وخلقها وترزق بالذريه الصالحه

واعذرونا على الاطاله
بس يانا فضفضت خلوني اروح اكل احس اني اليوم ارتحت خخخخخخخخخخخخخ