مؤخراً كثرت مشاكل العاملات .. أول كانوا يشردون بعدين صاروا يسحرون والآن نسمع قتل،وسواطير!!
بصراحة شي يخوف !! كثرت الجرايم بشكل مروع !! وأتوقع هذا الأمر بيكون له تأثير سلبي!
القصص هذي اللي كل يوم نقراها والجرايم اللي نسمعها ، بتأثر على نفسية ابنائنا وبتأثر على الاسرة كلها !
الا اذا عرفنا نتعامل صح .. !!
بالبدايه احذري ياغالية ان تنقلي لابنائك جرايم العاملات وانتبهي يسمعونك وانت تتكلمين مع احد..
لان الطفل مايتحمل ..! تخيلي عايشه معاكم وحده يتوقع انها في اي لحظة ممكن تقتل !!
فراعي هذي النقطة.. ولا تكوني سبب لاصابة أبنك بلخوف والقلق والامراض النفسية .
طيب ايش الحل بنظركم .. ؟؟ خلاص بلاش منهم ..!! طبعا مستحيل لان فيه اُسر بحاجة المساعدة ..
فيه نقطتين أتوقع انها هي بعد الله سبب التوفيق بالشغالة :
1/الاستخارة ..
2/النية ..
lstkhr
أولا : الاستخارة : مهمة قبل تقدمون على المكاتب ، قبل تحددين حتى جنسيتها ..
استخيري الله ، عشان ربي يصرف الأمور اللي مافيها خير عنكم ، لا تتهاوني بصلاة الاستخارة،
تراها ضرورية في أي أمر بحياتك ,, واللي يجرب الاستخارة ماراح يتركها,,فيها طمأنينة للقلب بشكل عجيب ،
كثير أمور نتردد فيها ونقلق و نخاف من عواقبها ، الحل الاستخارة ، تزيل أي اضطراب تشعرين فيه ..
ثانياً : النية سبب لتوفيقنا بكل شي .. و بـ تفهمون وش اقصد بس كملي الموضوع ..
وتأكدوا ان اللي تخاف الله فيهم ، باذن الله ربي يكفيها واسرتها شرهم ..
اذا وصلت العاملة، فيه عدة أمور ياليت نراعيها ..
_ أول ماتجي ، اشعري فيها وبقلقها ، لا تسمعين للناس وكلامهم عن الشغالات ، انت تعاملي بما يرضي الله
وعشان تتعاملين صح دائما تخيلي نفسك مكانها ، وأي موقف يصير تخيلي انه صار لك ،
يعني هي الآن دوبها واصلة من المطار ,, كيف بيكون إحساسها !! إحساس جدا سيء
أكيد بيكون قلق وخوف بتكون حاسة بغربه شديدة ، قابليها بابتسامة وصافحيها ,,
خليها تشعر بالراحة من أول لقاء لان هذي اللحظة بيكون لها دور كبير على نفسيتها ..
وأنا متأكدة ما راح تنسى هذا الموقف ابداً ..
خليها تشوف غرفتها وأكيد بيكون فيها وجبات خفيفة لأنها مابعد تعودت وتجرأت عليكم ،
فخلي بغرفتها كروسان وعصيرات ومويه وشوكلاته ..
قال صلى الله عليه وسلم :
(لا تحقرن من المعروف شيئا ، ولو أن تلقى أخاك بوجه طلق)
يتبع
،
_ اذا انت عصبيه ، والأمر خارج عن إرادتك ، عوضيها المسكينة في وقت هدوئك ..
خليها تشعر برحمتك لها ، لا تقولون الشدة لازم عشان ما تخرب ، صدقيني ربي يعطيك على نيتك ..
البعض يعاملهم معامله زينه مو رحمه لا عشان خايفة من السحر عشان خايفة على عيالها !!
حتى أطفالها بدل ما تربيهم على الرحمة,,تقول انتبهوا منها لا تزعلونها تراهم مجرمات وممكن يسحرون !!
البعض تلغي الرحمة من قلب أطفالها ، تجعلهم قاسين القلب عديمين الإحساس ..
والعجيب اذا كبروا وعانت منهم الجفاء وعدم الإحساس ، صارت تشتكي قسوت قلوبهم !!!
معروف ياغاليات أننا بـ نجني ما زرعنا ..
وبالمقابل فيه اللي تعاملها برحمة وتخاف الله فيها .. عاد كل وحدة ربي بـ يعطيها على قد نيتها ..
_ وفيه شغلات بسيطة لها تأثير ايجابي مثلا احتياجاتها الخاصة مثل الشامبو والصابون والفرشة والمعجون ...
لو وفرتيها لشغالتك من حسابك واحتسبي الأجر ، اعتقد بتكسبي قلبها ..
وبرضوا تنظمين لها مكالمات لأهلها ، لا تحرمينها سماع أصواتهم ، لانها مثلنا أكيد تشتاق لهم ..
وأطفالك اذا راحوا البقاله مع ابوهم يشترون خرابيط قولي لهم خربطوا معكم للشغالة :42:
تراهم مساكين يفرحون بأي شي ..
_ تذكري دائماً انك جبتيها للمساعدة ، فنظمي الشغل بينكم ، لا
تحرمي زوجك وابناءك من خدمتك ،
لازم يشعر الزوج ان زوجته متحمله بعض من المسئولية..واطفالك من اهم مسؤلياتك ياغاليه ،
لا تعتمدي عليها ، حتى ان وفقتي بعاملة رحيمة تخاف الله .
وبرضوا يجب تعويد الابناء مايأمرونها ، تلاقينها مسيكينة كل شوي تاركه شغلها وتنفذ اوامرهم اللي ماتنتهي ..
وجود الشغالة في البيت لا يلغي مسؤليات باقي افراد العائلة ..
_ جعل وقت مخصص لراحتها ، وتعويد الجميع ان يحترموا هذا الوقت ..
_ لا تتغاظي عن اخطاء ابنائك .. اذا بنتك او ولدك غلط عليها، هاوشيهم قدامها ،
لا تقولين هم صغار وهي كبيره ، لا الصغير لازم يعرف يحترم الكبير ،
وهذي الحركة تقوي العلاقه بينكم وبتصير تحب عيالك ، ومن تجربه ،
ياما امي هزئتني اذا غلطت على الشغالة و قدامها ، والنتيجه يوم زواجي كانت تبكي
من قلب وكأن بنتها اللي بتتزوج !!
_ نعاملهم مثل مانحب الناس تعاملنا، العاملة انسانة لازم نرحمها ونقدر تعبها ..
هي مثلنا بالضبط ممكن يجيها اوقات تتعب نفسيتها ، قبل الدوره مثلا او اذا اشتاقت لعيالها واهلها ،
لازم نقدرهذا الامر..
اكرر اخلصي النيه لله بتعاملك معاها وماراح تخرب بالعكس بتشوفين الخير والبركه في بيتك ..
_ قال صلى الله عليه وسلم : (تهادوا تحابوا)
لاتنسينها من الهديه ، مره منك ومره من عيالك ، اقصد اذا صغار ، واللي عيالها شنبات لا الله يعافيها :22:
واخيرا لا تتهاوني بحجابها ولبسها الفضفاض بأكمام طويلة ، احرصي على تطبيق اوامر الشرع..
فلا تتركينها تتعامل براحتها مع زوجك وابنائك الشباب وتقولين انا واثقه فيهم ..!!
تذكري قوله عليه الصلاة والسلام : ( احفظ الله يحفظك )
وقدمي لها النصيحة في صلاتها وعباداتها .. واهديها كتيبات بلغتها عن البدع وعن الطهاره..
اذا تعاملتي معاها بهذا الاسلوب ، بـ تشعر برحمتك وبـ تشعربحبك الصادق ..
وماراح تزعل من تدقيقك عليها بالنظافه واتقان الاشغال المطلوبة منها .
هذا كله مع الدعاء ، باذن الله يكون سبب لتلافي كثير من مشاكل العاملات ..