المفروض العروس تهدي زوجها شي و الا انا بخيلة؟

السلام عليكم ورحمة الله و بركاته

اولا احب اشكركم على هذا المنتدى الرائع اللي ما لي و لا لأي وحده غنى عنه و ان شالله موفقين بكل خطوه..

انا عندي استفسار صغير بنات..اتمنى ماتبخلون علي باجابته و ادري ان ظني فيكم ماراح يخيب ان شالله..

ترا الموضوع صار هاجس بالنسبه لي..

ابي اسألكم,الحين الوحده اذا تزوجت,ثاني يوم بعد العرس لازم تهدي زوجها هدية؟ انا صراحه ما هديته رغم انه عطاني هدية فخمه..و بعدها و من اول احتكاك صار بيننا عيرني باني بخيله لاني ما يبت له هديه..انا و الله العظيم مو بخيله بس احنا مو من عاداتنا, انا من الكويت و هو بعد بس هو بدوي و انا اهلي حضر..ياليت يابنات تفيدوني والله يوفقكم..

علما باني اهديته مره بعدها نظاره ماركه بس عطاها اخوه, و اهديته بعد تي شيرت و جنز و نعال كلهم ماركات بس قال لي بلامبالاه انهم ماعجبوه و لا حتى قال لي شكرا و لا حتى لبسهم,مع اني حطيتهم مع كرت جدام خرانه ملابسه على اساس انها مفاجاه بس ما لاحظ, و بعدين يبتهم و حطيتهم جدامه و معاهم كرت فيه كلام حلو و قلت له هذي عشان يوم ميلادك اتمنى يعجبونك,ما فتحهم حتى, بعدين فتحهم و حتى بدون ما يقيسهم قال لي انا مو ذوقي جذي مع العلم انهم حلوين و ما يختلفون عن ملابسه اللي هو يشتريهم حق نفسه..

الحين بنات اتمنى تجاوبوني على سؤالي الاول,المفروض العروس تهدي زوجها ثاني يوم و الا لا؟ترا نفسيتي متحطمة:(