صدمتي بزوجي اليوم لمن رجع من سفرته

يسعدكم صباحكم خواتي



نزلت موضوعي وانا بالحيل مضايقه ومختنقه من اللي صار لي وميته قهر



انا زوجي كل سنه يسافر دبي مره وحده بس طبعا سفرته تكون كورس من العمل

المهم زوجي سافر الجمعه اللي طافت دبي طبعا سافر وحنا متهاوشين مع بعض كالعاده لانه ماخذني معه ورجع اليوم من سفره طبعا من يوم سافر مافكر يدق علي ولايسال عني ولا عن عياله وجالسه بالبيت بروحي

وانا كمان مافكرت ادق عليه لاني زعلانه علي
وطول الوصت احس بضيق وهم وبس ابكي مدري ليه يمكن لاني افكرفيه وخايفه عليه من بنات الحرام لانكم عارفيين دبي انفتاحيه كثير والاجانب كثير فيها والفتن ومهما وثقت الوحده بزوجها ماتثق بالناس اللي حواليه والشيطان مامات

وبرغم زعلانه منه الا قمت نضفت بيتي امس وسويت حلا وكل شئ يحبه وتكشخت ولبست عيالي وجالسه احتريه لمن وصل استقبلته بس باين اني زعلانه عليه وهو لاحظ علي هالشئ المهم طلب مني اسوى عشاء قال بروح اعطي اخوي فلوس يحولها لامي واجي

المهم لمن راح فتشت بجواله الا دخلت على الرسايل المرسله


تخيلو وش لقيت

راسل مسج لصديقه هنا بالسعوديه قبل يومين وهو بدبي كاتب فيها


حنا بديسكو شيرتون ديره شغل مظبوط


مقدرت اتحمل اللي قريته بكيت من القهر حتى رجع البيت وشكلي متغير يبان كنت ابكي

قالي وش فيك تعبانه فيك شئ قلت لا


حطيت العشاء اكل ونام على طول



تكفون بنات وش قصده بالمسج اللي رسله لصاحبه


انا مره تعبانه نفسيا كيف افتح له الموضوع اخاف يقولي وش دخلك تفتحي جوالي

وش الحل نكفون ساعدوني وشلون افاتحه بالموضوع بس بطريقه ثانيه بدون مايعرف اني فتحت جواله


او احلفه بالله اقوله احلف انك مادخلت مراقص ولاسويت شئ غلط واذا فته يلف ويدور بقوله عندي دليل واقوله اني شفت المسج


تكفون ساعدوني اعطوني مشورتكم وش اسوي معه وفسروا لي مقصده من المسج تكفون ارحموا حالي