تكفون وصفه للكحه

اول شي ادهني صدره وظهره بفازلين مع شوي فيكس واطراف رجليه ولبسيه شراب وحطي له مع الحليب شوي حلبه مطحونه وشربيه ملعقة زيت السمسم وما يشوف شر

أوشن دريم الشر مايجيك ياقلبي ماقصرتي الله يعطيك العافيه

ادهني رجوله بفيكس لاجا ينام وسخني زيت زيتون مخلوط بشوي زنجبيل مطحون ودهني صدره ومايشوف الاالعافية مجربه ومضمونه هالطريقة بس بشرط وقت النوم عشان يتغطى كويس ومايجيه هواء

هلا أختى : انا عندى وصفة مجربة ورائعة ومناسبه لكل الاعمار لكن مهم ثلاث ايام تستخدم وبعدها او قبل بمشيئة الله تروح عنه اولا عسل مقدار كأس الجبن الصغير مع ملعقتين طعام زيت السمسم وملعقة صغيرة رشاد وملعقة حبة سوداء وتخلطبنهم مع بعض وتضيعنها بعليه بالثلاجه وكل يوم بالصباح على الريق ملعقة وقبل النوم بالليل ملعقة

لكن ثلاث ايام

يووووووووووووووه ذكرتيني بايااام مضت

والله اني حااسه فيك انا مريت بهالحاله قبل شهرين وولدي جنني من هالكحه..لدرجة وانت والقارئات بكرامه انه يستفرغ الحليب من قو الكحة ولا ينام ولا يرتاح منها وصدره امتلا بلغم وصار مكتوم

والحين يالله لك الحمد والشكر مابه الا العافيه..

وكانت فيه اشياء مهملته والوالده نبهتني لهاا

1-دفي صدره زين ولبسيه صديريه عشان سعبولته مااتنزل على صدره او بقايا الماء اذا شرب يعني ملابسه اللي من جهة الصدر لازم تكون جااافه
2- دهني صدره وسرته وظهره بزيت زيتون مع فلفل اسود ولازم يكون داافي وبعده لبسيه لبس ثقيل عشان البراد
3- وهذا اهم شيابعدي العطورات والبخور ومزيلات العرق وكل شي فيه ريحهلانه هذا اللي زاد الكحه هو الشمم
4-عندنا الوالده الله يسلمها تسوي زيت الخوا جوا ويكون مخلوط فيه دوا الشمم المره والمحلب والاظفر والحبه السودا وتسخدم للشمم دايماا تدهن ولدي فيها
5- عطيه مغلي ورق الجوافه سويه كاس ماء مع شوية من ورق الجوافه والله ينظف صدره من البلغم مرتين باليوم بدون سكر ويااحبذا يكون قبل الرضاااعه او بعدهاا بوقت كااافي لانه يستفرغ كل اللي بصدره وتشوفين البلغم كيف ينزل مثل الخيوط((على فكره تراني سالت دكتور حرب الهرف المشهور حق الصدريه عنه وقالي استمري عليه لانه مفيد
6- انا عرضت ولدي على دكتور حرب الهرف الاخصائي المشهور وصرف لولدي فنتولين مع حاجه زي الفنتولين يقول انها موسعه للشعب الهوائيه تجي بعلب بلاستيكيه على شكل خماسي وصرف له كمان مذيب للبلغم بس ما استمريت عليه وعطاني شي مع الاكل بودره مدة شهر والحين مشاء الله لاحول ولاقوة الا بالله ولدي طيب من فضل ربي

شوفي يااقلبي النقاط من ا الى 5 مهمه جداا تراني لاحظت على ولدي تحسن فبل لاوديه للدكتور لكن تحسنت حالته اسرع بعد علاج الدكتور

والله يشفي ولدك يااارب