السلام عليكم ورحمة الله وبركاته
خواتي الغاليات
حبيت أناقش وياكن اليوم مسألة أنا أشوفها حسب نظريه واااايد مهمة
وهي مسألة قيام بعض التاجرات بمحاولة قطع رزق الغير لمجرد قطع الرزق لا أكثر
بتتساءلن كيف يعني؟؟
شوفن خواتي
صرنا نشوف في كل فترة والثانية زبونة تظهر وتذم بضاعة معينة
وأغلبية الزبونات يوافقنها في الراي
وهنيه نتأكد أنها التاجرة فعلاً بضاعتها مب ذاك الزود
لكن الصدمة يوم تكون التاجرة متميزة بمشاركاتها وعروضها
وسمعتها شرات الذهب ماشاء الله
وفي نفس الوقت شغلها أغلب الخوات يمدحنه
لكن اتيج وحدة ولا ثنتين ويرمسن من وراها
بأنهابضاعتها مب شي
أو شغلها مب ذاك الزود
أو تقول لج خسرتي فلوسج على شي ما يرزى
هنيه صدق صدق القهر
يعني شو استفدتي يوم رمستي من ورا هالتاجرة؟؟؟
بتكسبين زباين أكثر؟؟؟
بتخسرين الحرمة وتأثرين على سمعتها؟؟؟
وشو فايدتها الفلوس اللي بتكسبينها بهالطريقة؟؟؟
ما خفتي يوم الحساب والعقاب؟؟؟
خواتي .. في خاطريه واااايد رمسة
ووااااايد سمعت من بعض الخوات عن هالموضوع
أنها تاجرة ترمس من ورا ظهر ختها التاجرة
أو تذم بضاعتها في وقت الكل يمدح بضاعتها وشغلها
وصدقونيه أغلب الخوات خبرنيه عن هالأمور
قالن أنها التاجرة اللي ترمس تطيح من عيننا
لأنها ترمس على ختها في ظهر الغيب
وتذم بضاعتها اللي الغالبية الأكبر يشهدون لها بالتميز
أنا الحمدلله ما قد تعرضت لهالموقف
بس هالشي في الظاهر
شدرانيه إذا في وحدة ثانية سارت ورمست من وراي وذمت شغليه؟؟؟
إذا أنا كل يوم توصلنيه رمسة أنها التاجرة الفلانية رمست على ختها التاجرة الثانية
والتاجرة العلانية ذمت شغل ختها التاجرة العلانية
وبعدين يعني؟؟؟
اتقن رب العالمين قبل لا تشهرن بأي أخت لكن هنيه في المنتدى أو في أي مكان ثاني
خواتي
السموووووحة منكن يميع
لكن كلمة في خاطريه بغيت أظهرها
والساكت عن الحق شيطان أخرس
كل وحدة في خاطرها رمسة تتفضل
باب النقاش مفتوح
والله إنك صادقة لازم الواحدة تحط في بالها يوم الحساب
الدنيا والفلوس فاااااااااااااااانية
ويبقى الــــــــــــــــــــعـــــــــــــــــــــــــــمـــــــــــــــــــــــــــــــــــــل
وكتاب لايغادر صغيرة ولا كبيرة إلا أحصاها