اليوم كنت قاعده احوس بالمنتدي ادور على شي اسويه على الغدا لقيت اشياء كثيره بس للاسف اغلب المقادير ماهي متوفره تعرفون اخر الشهر <<<تحب ذا اليوم عشان تروح تقضي هههههههه
وقلت اقوم اسوي انا من راسي قمت اخذت نصف دجاجه على قدنا وقطعتها ارباع وبعدين اخذت عصير نصف ليمونه وفص ثوم مهروس ونصف ملعقه تقريبا معجون طماطم وزيها كتشب وشويه صلصة صويا حلوه وبهارات مشكله وكمون وكركم واللي يحبه قلبك وملح قليل شويه لاتكثرين وذوقي وشوفي وشويه مويه عشان ماتصير الخلطه ثقيله تقريبافنجال شاهي ...
واخذت خضار (بطاطس-جزر-فلفل اخضر -وحبه طماطم صفيره-)هذا اللي كان عندي وانتي حطي الخضار الموجود واللي تحبيه
قطعتها مكعبات وحطيتها على الدجاج واخذت الخلطه وصبيتها على الدجاج والخضار وخلطتها وبعدين حطيتها في الصينيه ورتبت الدجاج فيها طبعا انا خليت الجلد عليها وحطيت عليها قصدير ودخلتها الفرن من تحت بس تقريبا اخذت ساعه وانتي شوفي بعدين شلت القصدير ومسحت الدجاج بشويه زيت زيتون وخليتها تتحمر بس انتبهي لا تنشف المويه كثيرلانها مره طعمه وبس وقدمتها مع رز ابيض
معليش التصوير مو قد كذا لاني ماكنت ناويه اصور بس لما عجبتني قلت لازم تشوفونها لاني استفدت منكم كثيررررر الله يجزاكم خير
هذي صورتها
سويت تعديل لاني نسيت اقولكم انه لذيذ وصحي لان مافيه زيوت غير زيت الزيتون