لسواد الرقبة ...والركب

شدني الموضوع فنقلته وابغى دعوة حلوة بالزوج الصالح التقي النقي العفيف لي ولخواتي فديتهم


حبيت اعرض تجربتي مع تفتيح البشرة و والله العظيم اني صادقه في كل الي اقولو
انا لوني قمحي فاتح جداً الحمدلله , بس عندي ختم الجودة السعوديه
"السود" في رقبتي واصابع يدي ورجلي و منطقة الابط <<< عارفه ماخليت محل
هدا الشيء فيا من وقت ماعرفت نفسي مااعرف ايش سببه ,
وجربت كل انواع الخلطات والكريمات والتقشير وكل الي يجي في بالكم
بس الحمد لله ربنا من عليا بإكتشاف فضيييييييييع ,
والله يابنات اني من كتر الدهشه كل شويه قدام المرايه من النتيجه الي حصلتلي ,
امانه قولو ماشاء الله تبارك الله
سواد رقبتي خف تقريباً بنسبة 60% من ثالث استخدام , انا استخدمته يوم بعد يوم
وسواد اصابع يدي ورجلي خف تقريباً بنسبة 40% من تاني استخدام
انا استخدمت علاجين بوصفه طبيه مو من راسي طبعاً




اولاً انا سويت تقشير اميلا للوجه فقط , عند الدكتوره مي النقيب في العيادات المثاليه
ماشاء الله عليها مره شاطره وفاهمه شغلها
وكتبتلي على كريم وغسول استخدمه وقالتلي استخدمه يوم بعد يوم لمدة عشرة ايام , عشان تتعود البشرة عليه
وبعد كدا استخدمه يومياً لغاية مااشوف السواد او اثار الحبوب اختفت , قالت تقريباً حأحتاج 6 اسابيع
بالإضافه انها كتبتلي على كريمين للرقبه اخلطهم مع بعض على راحة يدي وبعدين ادهنهم على الرقبه

بس الصراحه لان ملكتي قريب ان شاء الله انا مره مستعجله وماعندي وقت انتظر الين ما الكريمات تجيب مفعولها فعملت الاتي ::
انا استخدمت الكريم حسب تعليماتها بالنسبه للوجه
لكني حطيتة كمان على رقبتي لانها مره غامقه واحس الجلد فيها سميك مره مشوهتني
طبعاً لازم حيحمر وحيتقشر وحينعم كتير وكل مااستخدمت الغسول كل ماخرجت القشور اسرع
بمعنى ان الرقبه يوم احطها كريم اميلان المقشر , واليوم الثاني احط تركيبة الكريمات الي اعطتني هيا للرقبه

ماشاء الله تبارك الرحمن والله من فرحتي كل شويه عند المرايه اشوف رقبتي الحمدلله مرررررره فتحت كتير
اسم كريم التقشير :: كريم اميلان مكتوب على كرتونته DERMAMELAN TREATMENT
بس تراه مره غالي سعره 800 , بس والله يستاهل , انا اشتريته من صيدلية الوزير الي في التحليه مول
والغسول اسمه :: HIDRAVEN
سعره اعتقد 100 وحاجه
صدقوني الي حتجربه حتدعيلي بإذن الله تعالى



ثانياً :: اضطريت اروح عند كتورة تانيه دلتني عليها قريبتي , لان الدكتورة مي عليها زحمه مو طبيعيه وعشان اخد منها موعد ماحيكون قبل شهر
المهم الدكتورة التانيه اسمها حنان في مستشفى سليمان فقيه
دكتورة عسل ومره فاهمه وشاطرة
وريتها السواد الي في ركبي واصابع يدي ورجلي والابط , قالتلي الجلد عندك جداً سميك يعني مهما استخدمت كريمات مستحيل تجيب نتيجه
فكتبتلي على كريم استخدمه لمدة اسبوع , وبعدها حتسويلي جلسة تقشير لنفس المناطق
قالتلي هدا الكريم فائدته انه يقلل من سمك طبقة الجلد السوووودة وبالتالي حيقل السواد , ومع التقشير حتكون النتيجه افضل
بس الي لاحضته ماشاء الله اني من اول مااستخدمت الكريم اني فتحت كتيييييييير الحمدلله
اسم الكريم :: اليكاسال ELICASAL لونه اصفر مع ازرق
سعرة 25 ريال سعودي , واتوقع تلقوة في اي صيدليه

ونصيحه يابنات جدة محد يغلط ويسوي تقشير عند عيادات الطبابه الحراميه حسبي الله عليهم
والله ضحكو عليا دفعت 2000 ريال قيمة جلستين تقشير لكل الجسم , بس والله اني ندماااااااااااااااااانه على فلوسي لانه ماسوالي ولا شيء حتى تقشير مااتقشر !!!
كاانهم كبو بس مويه على جسمي
اتمنى تستفيدو من تجربتي , لاني والله ماخليت شيء ماجربته خلطات وكريمات
وكلو ضياع فلوس على الفاضي , الحمد لله بس
رجاءً الي تقرا كلامي تفتكرني بدعوة حلوة , واهم شيء اني اتوفق في زواجي , ويسير لي قبول عند زوجي واهله

بالتوفيق للجميع ان شاء الله








منقووووووووووووووووول