انا كتبت موضوعي ووايد بنات فهموني غلط وماراعو شعوري لانه محد حاس بمعاناتي

السلام عليكم

انا قبل هل مره كتبت موضوع وهذا الرابط حقه


http://forum.hawaaworld.com/showthread.php?t=1734712




بس في وايد بنات جرحوني بكلامهم


انا لو ما احب زوجي مانطرت للحين معاه لي 4 سنوات متزوجه وتعبانه ولا احد حاس باحساسي


اول شي حرمان من اهلي لاني بالغربه و24 ساعه قاعده لاشغله ولا عمله يعني شغل البيت ساعه ياخذ والطبخ ماياخذ وقت وباقي اليوم شنو اسوي قاعده مجابله زوجي


انا تعبت وابي يهال اتسلى فيهم انا صج عمري صغير بزوجي عمره اكبر من عمري وعنده عيال انا ماظلمت عياله ولاعمري قلت لهم كلمه تجرحهم وربي يشهد في حريم يضايقون عيال زوجهم بس انا والله معاملتهم مثل اخواني الصغار واحبهم ماعمري كرهتهم صج بقلبي غيره منهم لانه مريت بنفسمعاناتهم حرمان من الابو انتو هل شي ماحسبتو حسابه

انا انحرمت من ابوي ولمن شفت عيال زوجي وشلون زوجي يعاملهم صج صرت اغار لانه لقيت الي يعوضني عن ابوي لدرجه مرات يقولي انا عندي 3 عيال مو 2 يقولي انتي الثالثه

انا مالي ذنب بطلاق امهم وابوهم هذا ذنب يتحمله ابوهم وامهم انا مجرد دشيت على حياتهم ومع هذا ماحاولت اجرحهم بكلمه


انا لمن كتبت الموضوع ماحطيت وايد شغلات عشان جذي البنات فهمو اغلب كلامي غلط


انا احب زوجي وهو بعد صج مرات اعصب واغلط ومرات انهار مره وحده لدرجه اكسر اي شي بالبيت بس انا تعبانه


وزوجي عارف هل شي وعارف شكثر ودي يكون عندي عيال بس موبيدي وصج انا كنت بعديه عن ربي بس لي فتره شهر تقريبا التزمت بصلاتي اكثر والتزمت بصلاه الفجر بالاخص ولي 5 ايام قاعده اقهر الشيطان واقرا سورة البقره كامله وراح استمر عليه ومستمره على الاستغفار


وربي اكتب لكم والحين عندي الفجر وصارت الصلاه اقسم بالله اني ميته من القهر من كلام البنات صج في بنات ردو علي وصبروني على مصيبتني ونصحوني وفي بنات لا كسرو فيني وخلوني وحده راعيه مشاكل وخلوني وحده تكره عيال زوحها وماتحبهم وتغار منهم حيل انا قلت كم مره اني ما اكرهم احبهم ولو ما احبهم جان ماطلبو كل مايجون عندي اسوي لهم حلويات وكانو يدقون علي يقولون لي نبي مثلا كيك اواي شي حلو يبحونه اسويه لهم حتى الغدا يقولون لي قبل بيوم اي شي مشتهينه والله واسويه وانا مستانسه


انا ما اكرهم وربي ولاعمري كرهتهم يمكن ببدايه زواجي انصدمت فيهم وهم بعد لانه امهم كانت تترس راسهم بالكلام وكانت تكرهم فيني بس انا حاولت مع الوقت اكسبهم لصفي


وبعدين اللي يقول انه الدول الاجنبيه فيها طق هذا غلطان

لانه من يكونون العيال باولى روضه يلعمونهم اغنيه انه لو امك او ابوك طقوك تدق على الرقم 121 وتقولهم انهم طقوك ويجون يسحبون الطفل من بيت امه وهي ماتقدر تسوي شي واتحدى احد يقول شي غير هل شي وعروف قانون السويد

الاخت الي قالت رفيجتها تضرب عيالها اقولها غلطانه هني الاهل يخافون من عيالهم عشان مايشتكون عليهم


عشان جذي زوجي موقادر على عياله ولا يقدر يقولهم هذا غلط وهذا ماينفع بالاخير العيال هني يسوون اللي يبونه


والله انا تعبت وانا اكتب لو بكتب مني لي باجر ماراح تفهموني وتعذروني

طليقته ورتني الويل وهي اصلا الحين متزوجه بس مع هذا مومخليتني بحالي منكده علي عيشتي


والي تقولي انتي غيرتج موطبيعيه طبيعي كل وحده تغار على زوجها يعني شنو اصير عديمه احساس واصير مثل الطوفه وما اغار على زوجي


اللي تحب زوجها صج تغار عليه حتى من اهله لانها تحبه


الله يسامح كل وحده فهمتني غلط وخلتني ابجي صج لانه احس انه كل شي على راسي يوم كتبت الموضوع كنت متامله خير تدعون لي وتنصحوني بس مولدرجه انه تحملوني الغلط


انا صج غلطت على زوجي وتهاوشت معاه وكل وحده تصير معاها هل شغلات انا مو ملاك انا بشر يعني اغلط


وزوجي مراعي شعوري ومراعي الضغط اللي انا فيه ولمن تكلمت تكلمت لانه ماعندي احد اشكي له ولا شي


عموما كل وحده ردت على موضوعي مشكوره وماقصرت



واللي عندها نصيحه تكتبها واللي ماعندها وتبي تكتب كلام تجرحني فيه الاحسن لاتكتب لانه نفسيتي مومتحمله انا قلت ودي خوات يشجعوني وينصحوني وفي منهم نصحوني وقالو لي الاستغفار وسورة البقره وانا ادعي واصلي لربي انه يرحمني من غيرتي ويرحم ضعفي ويرحم حالي ويساعدني ويغفر لي كل الي سويته مع زوجي :44: واني بيوم كدرت خاطره


اقسم بالله اكتب وماني شايفه الكيبودر من دموعي مشكورين ماقصرتووووو:44::44::44: