مادري أوافق على هالخطبة ولا لا؟ والله محتارة وأبي رايكم

بنات والله إني أثق فيكم ثقة كبيرة ، ويعلم الله إني أفضي لكم بأشياء ماأقولها لأقرب الناس

القصة ومافيها إحنا طريقتنا في الخطبة إنه تتصل أم العريس أولا وتطلب تحديد موعد تجي فيه وتشوف العروس ، ثم تتم الموافقة وتبدأ بقية المراسيم


من كم يوم اتصلت وحدة وقالت (نبي بنتكم لكن ما ندري كيف شكلها ؟ لأن ولدي يبي طول وبيااااااااااض)
بصراحة أنا عادية جدا وأميل للسمار
المشكلة إن أهلي ما قالوا لها إن البنت عادية وما تنطبق عليها المواصفات اللي يبي ولدك
سسكتوا وقالوا أنتم تعالوا وشوفوها

وإلى الآن ما حددنا موعد لزيارتهم
وبصراحة أفكر أكنسلهم من البداية (حفظا لماء الوجه)
ولأن النتيجة معروفة سلفا يعني بيجون ويتمقلون فيني وكأني جاية من المريخ
وفي الأخير يسحبون قواتهم ويروحون
وما تتصورون يا بنات قد إيش هالحركة تسبب لي إحباط وإحراج قدام أهلي
خاصة أنا خجولة وعندي كبرياء زايد وعزة نفس ، يعني ما أرضاها على نفسي
لذلك يوم أقول كنسليهم وألزم ما عليك كرامتك
وليش تتفشلين ..وتعب ..ولبس ..وهم وفي الأخير بيعطونك مقفاهم ويتوكلون
ويوم أقول ما تدرين وش بيصير يمكن يعجبون بأخلاقك(مع العلم بأن الأخلاق آخر شي يفكرون فيه الناس)
ويمكن لو ماصلحتي لهم يذكرونك لناس ثانين ، وجربي ولانتي خسرانة شي
بس ترجع عزة النفس مرة ثانية وأتخيل شكلي وأنا داخلة عليهم وشوي وأقول لله يا محسنين
وأتخيل شكلهم وهم مصدومين لأنهم ما حصلوا المواصفات اللي يبغونها
فأقول ريحي نفسك واختصري الطريق واتغدي فيهم قبل لا يتعشوا فيك :angry2:
واللي يشجعني على هذا القرار إني أصلا ما ارتحت لهم أحس بانقباض من ناحيتهم
أهلي ما يمدحون أمه يوم كلمت يقولون مرجوجة ولا تحكي زين :42: (اللهم لا شماته)

والحين يابنات ودي برايكم ومشورتكم .. فوالله إنكم نفعتوني واستفدت من مشورتكم في موضوعات ثانية.. اللهم يكتب لكم أجر تفريج الكربات