خبرة سنوات في المكياج <==الدخول مجاناً ويمنع اصطحاب الاطفال
صـــبااااااح الخـــير <==للي تدخل الصباح
ومساااااااء الخير <==للي تدخل المسا
كل وحده وحسب دخولها المنتدى :king:
اليوم جايبه لكم موضوع طول جدي (على وزن كبر جدي) فالي عندها شغل ولا ودها تمر على قسم المطبخ تراها مسموحه اذا طلعت لانها اكيد بتدخل المطبخ وتطبخ نص الي في القسم وانا ماخلصت والي فاضيه حياها الله وموضوعي لها ..
وبصراحه من اكثر من سنه وانا ودي اكتبه بس خبركم الزواله وماتسوي
ولله الحمد كتبته بعد جهد جهيد وبعد 4 ساعات من التعديل والتذكر والترتيب >>بتعلمكم انها تعبانه عليه:09:
اول شي موضوعي ماكتبته من فراغ ولامن تجربة احد غيري بالعكس من تجربه شخصيه وبما اني مدمنة ميك أب واعاني من مرض التسوق وخاااصه المكياج والعطور "الله يشفيني والجميع" وبما أني انغشيت مليون مره في الميك أب وجربت محلات واسواق الرياض الزين والشين منها ولاتهون اسواق الشرقيه الشقيقه :tongue:
حبيت اعطيكم نبذه عنــ :
@ ارخص محلات تبيع ميكاج اصلي وجميع الماركات
@ مكياج رخيص وحلو وبنفس جودة المكياج من ماركات غاليه
@ كيف تتعاميلن مع البائع <=== ايوا يافصحى انتي خخخخ
@ الـــــمـــــــحلااااااااااااات@
اول شي بنتكلم عن ارخص المحلات عندكم محل مــــي للعطور الي في سوق الديره وهو مومحل صغير لاااا كبير مرررره يعني زي محلات مفتحه على بعض لايغركم المنطقه او الحي الي هو فيه تراه مرررتب وفيه كل الماركات يعني كل قسم خاص بماركه معينه ومي الي في صحارى فرع له..
يبيع كل شي بس اغلب شي المكياج والعطور طبعا بما انا نحكي عن المكياج فبقولكم خوذوا منه لان مكياجهم روووعه وكل الماركات عندهم بلا استثناء وغير كذا اسعارهم رررخيصه او بلااااش اذا قارنتها مع محلات (وجوه) واخواتها <=== اخواتها يعني باريس غاليري وقزاز وبقشان وطقته
والي بتقولي انه تقليد او اخاف يكون تقليد بقولها لايكثر خخخخخخ
لان هم محل جمله ومحلات المكياج الكبار الي احنا ناخذ منها ياخذون منهم اصلا ويبيعون علينا غالي ..
غير كذا ترى فيه فرق جدا واضح خصوصا في تقليد المكياج يعني ماهو زي تقليد الشنط وفيه درجه اولى ماتقدرين تفرقين بينهم لااااا .. مدري كيف اشرح لكم بس بالنسبه لي احس يبان من شكل العلبه اذا صارت مقلده مثلاً شانيل يجيك احيانا تقليد للبلاشر تبعهم نفس العلبه ونفس الكتابه ونفس اللون حتى القماش المخمل يكون معها بس الفرق الي يمكن الكل مايخذ باله منه ان الاصلي تكون علامة شانيل محفوره لم تتحسينها باليد والتقليد تكون مجرد كتابه مع انها مشابهه لها وبرضو العلامه الي تكون على الفرشاه ...
انا بالنسبه لي صرت ما اخذ مكياجي الا منهم خصوصا اذا كان هديه لان اغلب زميلاتي وقريباتي في زواجاتهم تكون هديتي لهم مكياج العروس كامل واغلب هداياي لهم ماتتعدى الالفين ريال مقابل مكياج عروس كامل <===بالله مو بلاش
وفيه بعد محلات المصباح نفس الشي لكن يضل مــــي اشمل واكبر وفيه كل الماركات واحسه ارخص...
وكل الي فيه اصلي سواء عطور او مكياج بدليل ان في كثير من المجلات اذا اعلنوا عن منتج وذكروا الشركات الموزعه له يكون المصباح من بينهم <=== حبيت اوضح للي تشك انه تقليد
وفيه محل ثاني يعتبر سري لان مو كل الحريم يعلمون بعض عنه <=== كيدهن عظيم :angry2:
بس انا حبيبه بقولكم <=== ايه هين مالتس كيد انتي خخخخخ
يبيع الاشياء المميزه والنادره والي توها نازله بالسوق مثل بخاخ السيقان ايام ماطلع على طول جابه وبسعر رخيص والواكس تبع الحواجب وبعد عنده عطور مميزه ونادره بس يخبيها عن الهيئه مثل عطر الاغراء الممنوع <=== اشك كل المتزوجات بيتضاربون على الموضوع عشان اسم المحل عشان كذا بخليه في نهاية الموضوع (تسمع بالتشويق)
وعنده بعد كريمات اللمسه المخليه للمتزوجات الي تخلييك تغلطين بين ايدك والحرير لما تلمسينها
وعنده العطور الي على اشكال مجسمات برضو ممنوعه من الهيئه مع اني احسها عاديه
وعندهم المكياجات الغريبه والنادره وبصراحه محلهم مررررتب رغم انه صغير
وفيه بعد محل حلو في نفس جهة مـــي بس نسيت اسمه يهبل صراحه
@ميزات هذي المحلات غير الرخص:
انتس تقدرين تكاسرين_تفاصلين_تطارحين >>وين حنا مطارحه ماعاد بقى الامصارعه :biggrin: اقصد تطلبين منه يطرح من السعر
(كل وحده ولهجتها) يعني ينزل من السعر بعكس محلاتنا الي احنا متعودينا عليها ومافيها مكاسر
يمكن البعض يستحي يكاسر مثلي او يحسه عيب!!! بالعكس والله مافيها شي مدام انه بينزل لي من السعر كثر خيره ... وبما اني جالسه اسولف عليكم بقولكم سالفه....
فاااااصل ونوااااااااصل
(مره كنت في مشغل راقي وتقريبا كل الي فيه هاي كلاس جتهم وحده مشاءالله بنت عز طبعا مبين من شنطتها وساعتها والماركات الي هي لابستها قالوا لها نصبغ شعرك بـ 600 وانهبلت وجلست تكاسرهم وتقول انا ماعمري صبغت شعري بأكثر من 400 وش ذا المبلغ بصراحه مبالغ فيه الخ ) هذا وهي مشاءالله جلست تكاسرهم مهوب انا مالت علي صابغه ذا الشوشه بألف وليته على سنع الا تحوم التسبد... يعني مشاءالله تلاقين الناس الي عندها تحافظ على القرش وحنا يالمهبل نبعزق من ذا الفلوس وعلى غير سنع <== انتهى الفاصل نرجع لموضوعنا
@ صااااااااااحب المــــــحل @
خلصنا من المحلات نجي بالنسبه للبائع على قولتي
نصحيها اسمعيها من اخت اذا دخلتي المحل لاتسمعين كلام البياع لانه بيجلس يمدح ويغريتس وبالنهايه بتطلعين اخذه الاكو والماكو على قولة اخوانا الكويتيين
واخص خواتي العرايس لانهم خلقه ينشبون بحلقتس "هيدا مافي احس منو ....وهيدا ضروري للعروسه....ومابيصير عروسه مابتاخدي مدري وشو ...الخ" عاد خوذوا وخلوا من خرطيهم والله ايام تجهيز اختي دخلنا المحل ومن كماختنا قلنا نبي مكياج عروسه وهم يستلمونا اساساات جميع الماركات وارواج ومحددات جميع الدرجات(قوس قزح) المشكله كل ماقلنا لا ومانحب ذا اللون هبلونا كنا مسوين جريمه مايصلح ولازم هذا ضروري للعروسه ومدي ايش يعني احس اخذنا نص المكياج او ثلاثة ارباعه غصب بس بطريقه غير مباشره يعني جد جد يغرون الواحد وبالنهايه يوم حاسبنا صار المكياج فوق الـ7 الاف اللهم لك الحمد .. عاد هم جلسوا يسوون خصم ويعطونا هدايا <==ايه هين هدايا والله بلاكم خذيتو سعرها وزياده
والله الى اليوم نص المكياج موجود ولا استخدم خصوصا الوان استغفرالله مدري كيف صايره حقت عجز الظاهر جدتي حتى ما تستخدمها ويوم عطينها امي عيت عنها تقول ذي من يحطها <<<يعني بجد يسحرووون
@المطلووووب ؟؟
1-اذا كنتي عروس لاتصيرين كمخه مثل اختي وتقولين ابي اتقضى مكياج عروس لانه ببساطه بضرب لتس بالسعر وبيعطيتس الضروري والي مهوب ضروري يعني بيخليتس تحملين المحل وغير انه ماراح يخفض لتس اذا كاسرتي>>اقصد بالتخفيض محلات مي والي ذكرتها...لانتس عروس وبتدفعين اي شي ومعتس ميزانيه <==هذا من وجة نظره... يعني تقدرين تقولين ابي مجوعة مكياج بسيطه تكون هديه <==ليش هديه لان دايم الهديه يكون سعرها مناسب اما اذا كان لك فبيضربون السعر
2- اذا قدرتي تستغنين عن صاحب المحل الي بيجلس يقولتس معلقات مدح في بضاعتهم يكون احسن.. يعني مثلا تكونين حاطه في بالتس كذا شي معين وتدورينهم بنفستس..يعني مثلا قولي له مشكور اقدر اخدم نفسي او ما احب احد يوقف على راسي وانا اشتري <===والله ما ينفع لهم الا كذا بالوجه
3- اذا نشب لتس وجلس يعرض عليتس ويطلع من الخرابيط الي ماتحتاجينها >>وهذا الاكيد .. قولي ليه لو سمحت انا عندي ميزانيه معينه وما ابي اتجاوزها
بتقولون حشى وش ذا التشدد والتعليمات والله لو داخلين حرب بقولكم هذي التعليمات للكمخات امثالي والي يستحون يردون على راعي المحل الي في النهايه يجلس يمدح في الشي لين يحسستس انتس سبهه وماعندتس خبره في المكياج عاد تقومين تاخذين كل الي مدحه
والله يابنات اني اكبر ضحيه لاصحاب المحلات ادخل ابي قلوس مايتعدى الـ100ريال واطلع صاكه اللالفين والثلاثه وكلهم اشياء ما ابيهم ولا احتاجهم بس يجلسون يمدحون ويقنعون وبالنهايه اطلع وانا قاشه كل المحل من زود الكماخه "اللهم لك احمد"
عاد دام اني اسولف عليكم بقولكم سالفة على الطاير <=== اسلوب شنبات خخخخ هذي سلمكم الله وحده من زميلاتي ياحوبي لها اذا شافتهم كذا يجلسون يعرضون منتاجاتهم ويمدحون قالت اوكي انا ما ابيه بس اذا كنت مصر اني اخذه ببلاش <==احسن اجل ليش يجلس يغصبنا على الشي ..
ولا مره تقول ابلشني راعي المحل يمدح مجموعه عندهم واقوله لا شكرا ما ابيها ابي كذا>>الي هي جايه عشانه ... ويقولها لا معليش ياانسه جربيه حلو ومدري ايش .. وكل ماصرفته ورجع نفس الكلام ابد كنه حالف يمين الا تشتريه غصب عاد هي في النهايه عصبت قالت :"انا ما اعجبني اشتريه عشان عاجبك ؟؟" عاد هو تفشل وانحاش وجلست تتقضى على كيفها وبدون زن <===تعجبني وربي اجل غصب ناخذ كل الي عندهم
عاد انا بصراحه استحي اقول لا ولا اهاوش عشان كذا دايم اصير ضحيه واجلس اقش لين تخلص فلوسي .. وبعدين صرت اذا قالوا لي نفس الحكي قلت لو سمحت انا عندي مبلغ معين وابي فيه اشياء معينه ما ابي زياده>>>مسويه قويه
@ مايستفاد من القصه :
* اذا سمعتي كلامهم بتاخذين اشياء تحتاجينها واشياء ما تحتاجينها
* من كثر المدح بتنخدعين بالشي الي اخذتيه وبالنهايه يمكن يكون مو حلو او ما يناسبتس او سيء وما تستخدمينه اصلا
@ الــــــــميك أبــــــــــ @
نجي للاشياء الي جربتها وكانت حلوووه وتستاهل سعرها..
ومقابلها اشياء نفس جودتها تقريبا بسعر ارخص وبرضو جربتها ..
وقبل ما ابدى حبيت اعطكيم معنى لبعض المصطلحات >>>احس انكم متوقيعن انها مصطلحات المكياج
لااااااا هذي مصطلحاتي انا عشان تفهمون حكيي :
@البطران >> معناتها الغالي والكشخه بزياده
@السياحي >>معناتها الرخيص او الشي التافه
<==== يحلفون اخوانها يكتبون بدالها :arb:
><الاساس><
:: البطران ::
تقريبا كل الانواع جربتها نينا رتشي حلو وتغطيته رهيبه اظن بـ 120..كلينك تغطيته حلوه وهادي نوعا ما بــ120 او 130.. فور ايفر الكل يمدحه واعجبني اكثر يوم شفت جويل تستخدمه وعلى طول جبته صحيح تغطيته حلوه بس ما اعجبني يمكن لان درجته مو مناسبه لي سعره اتوقع بحدود 140 او اقل..
:: السياحي ::
اخيرا استخدمت الديرما كول طبعا كلكم عارفينه وعارفين سعره ..
اكثر شي عجبني فيه تغطيته فضيعه مايحتاج معه لابيس ولاكنسلير ولاغيره
صحيح هو حق سهرات بس انا صرت استخدمه غالبا للعزايم العاديه والطلعات الي بحط فيها اساس بس بشرط اني اخففه لدرجه كبيره مع ان عندي غيره مايخليني افتتح مشغل بتسريحتي خخخخخ ومن ضمنها الي ذكرت قبل شوي وحقات طلعات عاديه بس هو يعجبني لان مثل ماقلت مايحتاج احط بيس واخواته
يعني الي بتاخذ اساس وميزانيتها ماتسمح تاخذ اكثر من نوع احسه يكفي يعني صحيح قوي وحق سهرات غالبا لكن تقدرين تستخدمينه في العزايم العاديه والطلعات بشرط انتس تخففينه مرررره وتخلطين مع اي كريم مرطب عشان يخففه ويخليه هااادي ومناسب
وفيه اساس ميبي لين الموس حق بيت ينفع يجي منه درجات كثيره ويصير هادي على الوجه مره يعني يالله يعطيك تغطيه بسيطه انا احسه ماينفع لغير البيت بحدود الـ45
><الكــحـــل><
×الساااااائــــل والمـــــائي×
:: البطران ::
بصراحه السائل ما استخدمه نهائي .. استخدم بداله المائي من شانيل روووعه شويه عليه يجي مقسوم لونين كحلي واسود .. والحلو فيه ان فرشاته سهله وتقدرين تتحكمين بالرسم فيها بعكس السايل الي اذا تغير خط لطخ الدنيا .. ماني متذكره سعره بالظبط لكن بحدود 150 مايتعداها ..وبصراحه سعره فيه يعني اقتصادي على كثر ما الطخ منه واحط الا انه له كم سنه عندي يعني عمره طويل ولو يطيح مليون مره ما يتكسر او يتفتت ..
:: السياحي ::
وفيه كحل مائي ماركة vov للامانه ماجربته ولاادري عن جودته بس اشوف وحده من زميلاتي تستخدمه وهو يشبه شانيل ورررخيص فرق عن شانيل اتوقع بـ30 ريال
ايه نسيت الي يحبون الكحل السايل فيه محمود سعيد اشوف امي وخالاتي يستخدمونه ويمدحووونه وسعره بلاااااش اظن بـ15 ريال
×الــــقـــــلـــــم×
:: البطران ::
نجي عاد لكحل القلم انا من ايام الجامعه>>>يامعمره انتي خخخ ...استخدم جيفنشي احسن كحل قلم بالنسبه لي ..صحيح سواده عادي يعني مو مره فاحم .. لكنه اكثر كحل جاف يطول في السهره ماساح جربت ديور وبودي شوب وكثيررر كثيررر مالقيت مثل جيفنشي بصراحه صرت اسميه كل العائله لان انا وامي وخواتي نستخدمه وكل من سألني عنه وجربه ارتاح عليه وصار يستخدمه ..انا كنت اخذه من وجوه بـ65 وبعدين صرت اخذه من مي بحدووود الـ45-50
:: السياحي ::
جربت كحل رخيص مقارب لجفنشي وحلو لقيت لورانس كحلهم رهيب بس احسه مايطول مثل جيفنشي يسيح شوي لكن مو مره بـ 10 ريال من عند مي وفيه الوان اخضر وازرق وتركواز <=== للي يحبون كحل اللالوان خوذوا منها واحد احسها حلوه في بعض الاوقات وسعرها حلو خصوصا انتس ماراح تستخدمينه دائم مثل الاسود فمو لازم يكون غالي
><المسكرا><
:: البطران ::
عندي مسكر ا جيفنشي بس من زود الخبال ومن كثر المساكر الي عندي ماعمري جربتها مدري ليش ناسيتها يمكن لان شكلها مايشجع بالنسبه للي عندي او لاني ماعمري سمعت احد يمدحها <=== وانتي مع الخيل ياشقرا اذا مدحوا الشي طرتي به خخخخخخ
مالكم بالطويله اكتشفتها في العيد وجربتها صراحه رووووعه حت راسها مدري فرشاتها غريب شكلها ... سعرها بصراحه ما اتذكره بس الاكيد انها ماتقل عن الـ 60
وعندي بعد ذيك المسكره الي تصير راسين ابيض زي الطحين تحيطن منه وبعدين اسود تحطينه فوقها من مكياجي للحين عندي ما استخدمها كثير ما اعجبتني وسعرها بصراحه ما اتذكره بالظبط بس يمكن بحدود الـ 50 او 60
وعندي بعد المسكرا الزرقا مدري السماويه شريتها من مكياجي في علبه معدنيه فيها مجموعه كحل قلم وسايل ومسكرا وروج وعلبة شدو صغيره كلها سماويه تجي بعلبه باااااايخه احس انهم جايبين علبة الهندسه وباخينها بازرق استغفرالله مدري كيف شريتها والله ماتسوى غبيه بمعنى الكلمه وغاليه اخر شي رميتها كلها بالي فيها والكحل فرغته وصرت ارسم بريشته على المناكير اذا صرت بصلح مناكير الوان وورد زي المشاغل >>وش رايكم انزل لكم موضوع عن المناكير والرسم عليها <=== تحسون مشتيهه تكتب مواضيع >>كملي موضوعتس وبلامصاله
:: السياحي ::
على كثر ماجربت مالقيت احسن من ماكس فكتر بجد تلعب بالرمش لعب وتغير ابوه <===ترى هذي مدحه مهيب سبه
وسعرها منيح اتوقع ماتتعدى 40 بس بالظبط كم ناسيه
فيه كثير يمدحووون لانكوم وانا شخصيا جربتها كذا مره بس حولت على مكس فاكتور لسببين :
: لانكووووم سمعت كثير انها ماركه يهوديه <===ماعاد بقى الا ندعم اليهود
: لانكوووم بـ 90 او 95 وماكس فكتور بنص سعرها وبالنهايه كلهم نفس الجوده بالعكس احس ان ماكس احلى بكثير
وعندي بعد مسكرا من ديبورا تهبل صراحه وتعطي شكل عجيب للرمش اخذتها بـ 20 من مي
><البلاشر><
:: البطران ::
جربت كثير بس احسن شي شانيل رووووعه والوانها تهلك حتى وانتي تمدينها على البشره تساعد ما تكبب زي الماركات الثانيه ولاتطلع مثل الطحين لاتتغير اذا طولت على الوجه لو تخلينها يوم كامل وميزتها انها جدا اقتصاديه مثل كحلهم تطول يعني انا مثلا اخذت من زمان 4 الوان زهر وبرونز و اورنج واحمر الواحد بـ 150 وعليكم الحساب عاد
بس مازالوا عندي للحين استخدمهم ولاتغيروا مع ان لهم اكثر من سنتين ...وفوق هذا يطيحون ويلعبون فيها بزارين خلق الله وماتتكسر او تتكبب ..
:: السياحي ::
بلاشر ديبورا عن تجربه رووووعه وسعرها بلااااش وفيه منها الوان (زهر_مشمشي_برونز_احمر..موف ..الخ)
انا بصراحه كنت اخذ شانيل صحيح شانيل ماركه توب وماعليها كلام بس جربت ديبورا ماحسيتها تفرق عنها كثير نفس الامتزاج على البشره ونفس تقريبا النوعيه وماتتغير لما تطول ع الوجه بس شانيل بـ150 ريال وديبورا بـ ب50 شوفي الفرق عاد .. وانتي كاسريه بعطيتس اياها بـ25 او 30
وعلى طاري الرخيص فيه ناس يمدحون برجوا جربتها استغفر الله كني كابه طحين احمر على وجهي يعني الي تبي تاخذ رخيص ونوعيته حلوه تاخذ ديبورا لاني ما اتوقع فيه ارخص واحسن منه
><القلوسااات><
ماراح احكي عن كل واحد استخدمته لاني جربت كثير واغلبها بصراحه تهــلك بس نصحيه مني شوفوا قلوسات ريميل تجنن وسعرها رخيص اظن بـ 25 وفيها منها الوان واشكال خصوصا لون كان عندي كل من شافه انهبل عليه وحلاته برونزي مايبين انتس حاطه شي واضح مررره لونه زهرعلى لحمي بصراحه مدري كيف كان لونه بس بجد روووعه
وبعد شوفوا القلوسات الي من الماركات الثانيه غير ريميل (اقصد الماركات العاديه والرخيصه ترى عندهم اشياء حلوه) اما شانيل ونينا رتشي والطقه ذي ابعدي عن قلوساتهم لان الواحد بـ 100 وفوووق واحسها ماتفرق كثير عن الماركات الثانيه بستثناء قولس واحد من شانيل لونه بينك وفيه زي اللمعه <===اكيد عرفتوه احسه انتشر من حلاته وتقريبا بــ100
>< قـــلم الحواجب><
:: البطران ::
جربت كل الماركات تقريبا نينا رتشي اخذت البني الغامق مره بحيث مايطلع اسود ويبين اني راسمه وبحيث مايطلع بني فاتح ويبين برضو لكن ما اعجبني ابـــــد حسيته مبين ودرجته بايخه
جربت من ديور و مادخل مزاجي
جربت من شانيل وما عجبني
واخيرا جربت اف سان لوران <=== صحيح ذا الماركه مايعجبني مكياجهم واحسه خايس لكن مو شرط الي يعجبني من ماركه معينه تصير كل اشيائهم توب ومو شرط ماركه ماتعجبني اشيائهم يكون كل الي عندهم سيء
يعني بصراحه وعن ثقه وتجارب مو تجربه ارشح قلمهم افضل قلم حواجب في عالم المكياج وكثير الي سألوني عنه وعجبهم لما استخدموه وكثير اهديتهم اياه من ظمن هدية مكياج وعجبهم وصاروا ما يرضون بغيره
ميزته :
:لونه مررره رايق ومايطلع بني واضح انه مرسوم ولا اسود غامق
:يعطي شكل طبيعي ومرتب للحاجب
الي محتاره في قلم حواجب معين ولا مالقت الي يعجبها تاخذ اف سان لوران على ضمانتي وقولوا ماقالته شموخ لان بصراحه مو انا الي اعجبني لااااا كل من جربه عجبه
للامانه ما ادري عندهم منه الوان ولا لون واحد الي استخدمه ولا ادري عن الاسود والالوان الثانيه هل هي نفس الجوده ولا لا ... بس الي استخدمه بني ولون القلم من برى مو بني غاااامق مره ولا فاتح مره وسط
بس اتوقع ماعندهم بني الا ذا الدرجه لاني دائم اطلبه ويعطوني اياه
:: السياحي ::
فيه قم حواجب من ريميل جربته حلو ماعليه لونه بني بـ 10
حلو ومقارب نوعا ما لاف سان لوران لكن يضل سان لوران الافضل عندي وكل وحده عاد تشوف ميزانيتها
><المحددات><
اكتشفت ان المحدادت الغاليه والمحددات الرخيصه ماتفرق عن بعض يعني مثلا اغلب محدداتي ماركات وبـ 80 و 100 استخدم احيانا محددات زميلاتي بـ20 و10 احسها نفس الشي بالعكس الماركات العاديه عندهم الوان ودرجات متنوعه وتقدرين تنوعين بما انها رخيصه وكلها نفس الجوده
شوفوا لورانس محدداتهم بـ 10 وحلووووه مره
وبرضو محددات سمايلنج نفس السعر والجوده
><الارواج><
:: البطران ::
اغلب الي عندي كلارنس احسها حلوه وامتزاجها على الشفايف وتوزيعه حلو.. سعرها تقريبا بحدود الـ 80 اذا ماخانتين الذاكره
وجربت نينا رتشي ازين مافيها علبتها خخخخخخ ولاهي استغفرالله تحوووم التسبد الا الوان ولا لمعه حلوه ولا شي وفوق هذا غاليه كنت اخذها بحدود الـ 100 والحين زادة مع زيادة الاسعار
جيفنشي جربت منهم كذا لون حلوين مررره وارواجهم ثابته نوعاً ما وما تطبع على الفناجل ولا الخدود <=== للي يبوسون البزراين امثالي :p
ماني متذكره سعرها بالظبط بس برضو بحدود الـ 90
ديور للامانه ماجربت ارواجهم من زمااان فناسيتها بس امي تستخدمها دائم وبصراحه ما اقدر احكم عليها لان الوان امي ماتعجبني واتوقع سعرها غااااالي
:: السياحي ::
يمدحون ارواج ماكس فاكتر واشوف زميلاتي يستخدمونها بس ماجربتها ولاعندي فكره عن سعرها بس اتوقع انها رخيصه <====على كيفتس انتي
ديبورا جربت اللون الاحمر الصارخ من عندهم لان قلت حرام اخذ من شانيل ولا ديور بحدود الميه وانا ماراح استخدمه الا مره ولامرتين فجربت كذا لون في المحل وعجبني ديبورا لونه وسعره كان رخيص بس والله ماني متذكره يمكن 30 او 40 والغريب اني لما حطيت منه في الجامعه كل البنات يسألون عنه ومن اي ماركه لانهم جربزا ماركات غاليه وماهي مثل درجته الي كانت روعه..
عاد ترى ماجرت منهم الا الاحمر بس اتوقع باقي ارواجهم حلوه قياساً على الي عندي
ااامممممم وش بعد وش بعد ؟؟؟ <=== تفتش ابواك وشنط مكياجها و تتذكر :confused:
>< الارواج السايله ><
:: البطران ::
ارواج فو ايفر السايله اكيد تعرفونها الي تقريبا 5 الوان مع بعض في علبه مستطيله ويجي معها فرشاه طويله
احس العالم كلهم طارو بها <=== انتي اولهم خخخخخ ... جد ما اشوف بنت الامعها ذا الارواج صحيح حلوه والوانها رايقه وبناتيه بس سعرها غالي ماني متذكره بس الاكيد انه 100 وفوووق
:: السياحي ::
رخيصه ومقابله لها (لورانس) نفس العلبه تقريبا وخمس الوان فيها الزهر الفاتح والغامق واللحمي والاحمر المطفي واحسها ماتفرق كثير عن فور ايفر اللهم بالسعر <===ترى فيه فرق بس مو ذاك الزود يعني لورانس حليوه وثابته ماعليها والوانها حلوه سعرها 45 - 50 ما يتعدها
><الاضائات><
×الاضائه السايله او اضائه الوجه×
:: البطران ::
اضائة الوجه جربت من فور ايفر تجي علبه زي العصار بس عريضه شوي وغطاها اسود بصراحه رووووووعه شويه عليها سعرها 140 اذا ماني غلطانه
وفيه منها لونين على ذهبي <==احسها حلوه وتعطي طله برونزيه
وعلى فضي مدري كيف صاير مو فضي فضي كنه لؤلؤي <==احسها احلى من الذهبي تجنن صرت استخدمها وسحبت ع الذهبي خخخخخخ
:: السياحي ::
جربت وحده حلو من لورانس تجي في علبه سايله وفيه منها لونين فضي وزهر ماعليها حليوه وسعرها 35 من عند مي
اما اضائة تحت الحاجب ماعجبني شي للحين <=== ذوقها صعب
فيه اضائه مدري لمعه من بودي شوب تجنن تجي على شكل انبوبه عريضه اممممم او على شكل قلم بس عريضه ولها فرشاه تطلع اذا ضعتي من فوق >>ان شاءالله واضح الوصف
المهم انه تهلك ذا الاضائه انا ما استغني عنها احط منها تحت العيون على العضمه الي تحت العين وبالنسبه لسعرها ماني متذكره بس الاكيد انها بحدود الـ100
اما اللمعه الي تنحط على الصدر والجسم واليدين >>حقت الزواجات
جربت وحده رووووعه ماهي من ماركه معينه بس خذيتها من محل بوتيغا فيردي الي في غرناطه بالدور الاول اذا تعرفونه يبيع مكياج وكريمات عنايه اظن اسمه كذا (bottega verda) والله ماني متذكره
بس جلس يمدحها لي وجربتها على ايدي وعلى طول عجبتني وحلاتها انها مرررره طبيعيه ولما تحطين منها ماتعطي لمعه اوفر بس تعطي شكل واااااو
وعلبتها بيضا ويجي لها غطا لما تنفتحين ماتشوفين اللمعه على طول لاااا فيه زي الاسفنجه ثابته تضغطين على الجسم بشويش او تمررينها وتوزع اللمعه بدون كبكبه وبشكل حلووو والجهه السفليه منها مرايه سعرها 100 ريال بس عليها القيمه واتذكر خذيت منهم ارواج سايله نفس نظام فوايفر خمس الوان في علبه مستطيله بس الوانهم خرافيه وارواجهم حلوووه مره خذيتها بــ 75 ريال
وخذت بعد من عندهم شدو يصير عندهم عينات دوائر متوسطه وانتي تختارين كل لون بـ25 ويحطونها لك في علبه انا خذيت لونين بينك جاي على لمعه ينفع حق سهرات ولون ثاني فضي يهبل بصراحه انا صرت استخدمه لمعهة تحت حاجب اكثر من شدو وحطها لي في علبه تبع محلهم مع فرشاه بـ50
وعندهم مسكرا مجدده ومكثفه مع فيتامين هـ وبروتينات الحرير الي يجي لها رأسين ابيض واسود بس للامانه مافكرت اخذها لان عندي مساكر تكفيني عشر سنين قدام خخخخخخ
ارواجهم الوانها رايقه وتشهي ودي اكلها من حلاتها وطراوتها>>عزالله خخخخخ
عندهم نوعين نوعيه علبتها بني ومكتوب عليها اسم محلهم بالذهبي وتجي على كريمي مع فيتامين هـ وزيت جنين القمح سعرها بـ 55 وفيه منها الوان >>> ترى ماجربتها بس حبيت اعطيكم نبذه عنها <=== ما اقدر انا على نبذه
والنوعيه الثانيه تجي علبتها على زهر مطفي تقريبا وكريميه ومعها زيت اللوز الحلو بـ 65 وفيه منها الوان <===برضو ماجربتها
على فكره بنات هذا المحل منتجاته كلها طبيعيه وتحتوي على اعشاب وفيتامينات حتى مكياجهم كله طبيعي وصناعته كلها ايطاليه ولهم فروع في اطاليا وتقريبا مافتح عندنا الا قبل سنتين فيه في غرناطه الي اخذت منه مكياجي واظن في مجمع العيلا والرمال وبرضو في جده في مجمع روشان مدري روشانا وعزيز مول على ما اظن وفي ابها
عاد انا يوم دخلت محلهم تنحت ودي اخذ كل شي خصوصا ان اشيائهم طبيعيه بس ماجربت كثير من عندهم مع ان عندهم كريمات عنايه شخصيه وعنايه بالشعر ومضاداة تجاعيد ومنتجات شد ومط خخخخخخ وعنايه بالرجلين والايدي وكل شي بالاضافه الى المكياج والمناكير والعطور الخ ... واسعارهم بالنسبه لي اشوفها رخيصه
<<< لو يدرون عني عطوني حق الدعايه خخخخخخخ
:: السياحي ::
بالنسبه للمعه في لمعه من لورانس علبتها دائريه كبيره تفتحينها وتلاقين غطا في زي الفتحات واسفنجه توزيعن فيها مررره حلوه واحسها مقاربه لحقت بوتيغا فيه منها على فضي وعلى ذهبي سعرها 35 من عند مي
بنات ترى اكتشفت ان لورانس عندهم اشياء كثيره حليوه واسعارهم بلاش شوفوا عاد الي يصلح لكم
انتهينت عن المكياج وتجاربي فيه ان شاءالله انزل لكم موضوع عن العطور وتجاربي فيها وفي محلاتها <== يبي لتس سنتين عشان تنزلين موضوع :cool:
:27:
@ ملحوووووظات @
:: كان ودي ادعم الموضوع بالصور بس على كذا يبي لي سنه عشان اخلص الموضوع وصعبه اصور كل الي عندي وارفعه الخ ...
:: للامانه يابنات ترى كل الي كتبته وجهة نظري الشخصيه وذوقي يمكن مايعجبكم او يختلف عن ذوقكم...وفيه بعض الاشياء كتبت عنها وقلت ان زميلاتي او خواتي مجربينها يعني كتبت بناء على الي شفته وبناء على مدحهم حسب ماذكرت والي ماجربته وضحت اني ماجربته ... فالي مايعجبها ذوقي او شي ذكرته لاتدعي علي تكفون بس حبيت افيدكم من خبرتي وتجاربي الطويله في المكياج ..
:: مو مهم تردون ولاتشكرون المهم تستفيدون من موضوعي والي تستفيد تدعي للوالد بالرحمه والمغفره وان الله يسكنه جنان الخلد والي ماتبي تدعي ترى ما اجبرها ولاهوب لازم <=== اكره اسطوانت لا احلل من تدخل الموضوع ولا ترد ولا ماتدعي لي وسأقف امام الله انا وياها ...الخ (وين حنا عايشين ترا موضوع مهوب دم وقطع ارقاب عشان احلل وما احلل)
:: الي مايعجبها الموضوع وتحس انها ما استفدت او انه غلط ماله داعي ترد فيه موجود ايقونه ترجعك للخلف وتصفحي الي يعجبك <=== تعقدت من الهوشات في المنتدى
:: واخيراً ان اصبت فمن الله وان اخطئت فمن نفسي والشيطان وسامحوني اذا كان فيه قصور او خلل
411
89K
يلزم عليك تسجيل الدخول أولًا لكتابة تعليق.
الكريبه
•
الله يعطيك الف عاقيه بس ماقلتي اسم المحل الي عنده اشياء حلوه
الله يسعدك يااارب
موضوع رووووعة
بس ياريت البنات اللي بجدة يفيدونا وين القى لورنس بصرااحة انا سااكنة بالرياض لكن ابو الشباب لدخلنا محل المكياااج مايرضى يخليني اجرب المكياج على يديني يقول مو ناقص الا
تجلسين وتتمكيجين بالمحل احسن بدل يدينك
اااااااااااااااه ابي اعرف وين بجدة القاها يصير اروح مع هلي واخد رااحتي
خخخخخخخخخخخخخخ مادرى عني
موضوع رووووعة
بس ياريت البنات اللي بجدة يفيدونا وين القى لورنس بصرااحة انا سااكنة بالرياض لكن ابو الشباب لدخلنا محل المكياااج مايرضى يخليني اجرب المكياج على يديني يقول مو ناقص الا
تجلسين وتتمكيجين بالمحل احسن بدل يدينك
اااااااااااااااه ابي اعرف وين بجدة القاها يصير اروح مع هلي واخد رااحتي
خخخخخخخخخخخخخخ مادرى عني
r1ksa
•
احس اني بموقع الإقلاع
ايام التحشيشات حقتهم
يختي عربجيه كيوووووووته <<< يعني تهبلين
سرد يجنن
بروح الرياض عشان اتفرج على المحلات اللي قلتي عنها
تعالي هاوشيهم معاي عشاني اكمخ منك
اذا عصبت عطيت البياع نظره يعني اني خوفته
واذا قال لي بيلبأ لك .. قلت ل اوكي حطه بالسله <<<< وربي مو تكانه
ايام التحشيشات حقتهم
يختي عربجيه كيوووووووته <<< يعني تهبلين
سرد يجنن
بروح الرياض عشان اتفرج على المحلات اللي قلتي عنها
تعالي هاوشيهم معاي عشاني اكمخ منك
اذا عصبت عطيت البياع نظره يعني اني خوفته
واذا قال لي بيلبأ لك .. قلت ل اوكي حطه بالسله <<<< وربي مو تكانه
الصفحة الأخيرة