اخواتي حبيباتي
أذكرلكم تجربة وحده نزلت اكثر من ربع وزنها
وكانت تتكلم عن تجربتها وعجبني كلامها قلت
انقله لكم
هي تكلمت عن أشياء كثيره بس أنقل لكم
التغيير الي حصل لها من ناحية زوجها
تقول كان عادي عنده قبل انحف إني اروح مع أي أحد من الأقارب مثل اخوانه وحريمهم أو خاله او او او حتى سواق اهله أنا وعيالي
الحين صار يرفض إنها تروح مع أحد ويصر إنها تستناه يخلص شغله ويوديها
قبل ماكان يحب السواليف كثير ولا الضحك
الحين صار حتى نكتي البايخه يضحك عليها بالعربي يستحلي منها كل شيئ
قبل ماكان يركز على لبسها ولا عمره علق عليه
الحين صار يختلس النظر لها اذا مشت من حوله وهي صارت تدلع بس صار لايق عليها
قبل كان مايشيك عليها ولا يعطيها أي تعليمات قبل ماتروح اى عزيمه
الحين صار يعطيها محاضره عن الستر وإنها ماتقوم من مكانها علشان مايشوفها احد بالصدفه
قبل تقول ماكان يحط يده على يدى أبدا وكنت اعتقد إن الحركة هذي بس فى التلفزيونات
الحين صار كل شوى يلتفت علي ويتذكر ان لي ايدين وإنها بعد ناعمه
قبل كان فى السوق يمشي قدامي الحين يمشي معي ويطالع فى الرجال إذا هم يطالعوني أو أنا اطالع فى احد
قبل تقول كان لو اشيل دبة الغاز مايهتم الحين صار لو يشوفها
تبي تشيل ولدها الي عمره 4 سنوات من الصاله إذا هو نايم ------يقول صحيه خليه يمشي
قبل تنحف بطلوع الروح يوديها للسوق وإذا تكرم ووداها يستناها عند باب المحل وإذا حبت تاخذ رايه في شى يقول لها زين زين بس عجلي اطلعي
الحين صار يدخل معها ويقول لها إنت اختاري وخليني أنا اأفاهم مع الرجال
قبل النحف كان شعرها جميل بس ماعمر انتبه له الحين صار يقول وش مسويه بشعرك عطينا من الي تحطين--------- عاد بسم الله علينا هو اصلع من ابو لمعه
قبل تقول كنت إذا جت وحده جسمها حلو في التلفزيون اغيره على طول
الحين تقول صار اذا جاء مذيع في التلفزين صار هو يقول ترا هذولي مايطلعون الا بعد مايتعبون على انفسهم ويحطون مكياج
قبل كان إذا سافر سفره يجيب لها عطر من الطياره أو بالكثير شنطه
لانه يقول مااعرف مقاسك خفت اجيبلك شى مايجي قدك
الحين عرف مقاسها -------------سبحان الله ---------- وصارت هداياه قمصان نوم ولانجري
قبل كان إذا يبغى يمزح معها يقول لها إنت حسوده -------------وش يضرك لو زوجتينى
بعد الرشاقة معاد جاب ذي السيره
تقول الأخت:
أنا عني صرت وحده ثانيه حتي فى مشاعري وأحاسيسىي صرت أحب الحياة والناس
كانت الناس تفرح بالعزايم وأنا يركبني هم مايعلمه الا الله من يعزمني احد
مالاقي في السوق مقاسي واشتري حتى لو موعلى ذوقي بس المهم يدخل فيني
وعلشان اضمن إني ماارجعه احرص يكون سترتش الي يزيد الطينة بله
ويشوه جسمى اكثر من ماهو مشوه
أما الفترينه هذي حلمي إني الاقي شي ينفع لى فيها ودائما أسأل البائع عندك مقاس كبير من هذا
وأشوف البنات فى المحل يختارون وعلى طول يطلبون المقاس اما أنا لازم ابعد شوي علشان أشبر الصدر لأتاكد انه مقاسي
كان معظم شرائي قمصان بيت ووصل بي الأمر إني أزور أهلي فيها --------على أساس إنها اريح اما البيت فهذا لبسي المفضل وحتى لو لبست تنوره او شي ضيق حدي دقائق وافسخها
:39: يارب انحف:39:
حرف لام @hrf_lam
عضوة نشيطة
يلزم عليك تسجيل الدخول أولًا لكتابة تعليق.
الصفحة الأخيرة
بعد الرشاقه تقول صرت أفرح بأي عزيمه حتى عزايم أهلى صرت اروح لها بالعربي صارت تحب الترزز
وبدال نظرة الإشفاق صارت نظرة إعجاب من الجميع ليس بسبب جسمي بل بسبب قوة إرادتي وصارو الحريم الي انحف مني وكنت أسمع منهم الاسطوانة المشروخة
الي تقول -------------حبيبتى ليش ماتنحفين توك صغيره لازم تملين عين زوجك
او الي تقولي عندي لك برنامج حلو اخذته من وحده علشانك وكأني السمينه الوحيده فى العالم
صارو الي تقول ماشاء الله إرادتك قويه والي تقول تكفين وش سويتى وصرتى كذا
أما عن الذوق فى اللبس كنت اتحسر مرتين مره يوم ألبس شي موعلى مزاجى ومره لما اطالع البنات الأنيقات ودي اقول لهم والله أن ذوقي أحسن منكم بس حكم الجسم
الحين ألبس الي نفسي فيه ويافرحتي إذا جبت شي للبيت ولقيته واسع ------لأنها بصراحه صارت عقدة----------- مايهمني إني ارجعه قد مايهمني إني اقول لرجلي ما جا قدي واسع
المرونة إلي احسها بجسمي خلت الدلال وحركات الدلع لايقة علي
وصرت بس ادور وش يقولون عن الرومانسية علشان اسويها-------واكتشفت ان فيه أشياء ماكنت اسويها لم اتركها من ---- الحياء لا -----بس كنت حاسه إنها ما تناسبني
بإختصار حسيت بأنوثتي أكثر
وانعكس هذا على تصرفاتي وبدلت أشياء كثيره فيني من غير مااحس
وشفت فرق فى تصرفات الي حولى بدايه بزوجي ثم اهله الي كنت اشوف في وجوههم الشفقه على اخوهم والتحسف على إنى مخذه واحد وسيم والكل يتمناه
والحين خالتى ((((قصدها ام زوجها )))) ولأول مرة تناديني دونا عن الباقين لما جاها ناس يشوفون بنتها ليش لأني بصراحه صرت أشيك وحده فى عائلتهم
مع إني كنت اسنع وحده بس هذا ماشفع لي عندهم
الحين أنافي بيتي ومع زوجي حسيت إني صغرت عشرين سنة
بعد ماكنت احس إني أم موبس لعيالي والله إني أحيانا احس إني أم حتى لزوجي
صرت احس إني عروس وصرت اأثر نعومة ورقة
وانعكس هذا على تصرفات زوجى معي
لما كنت ازعل منه انا الي اجي اراضيه ايا كان السبب لأنى بعد مااهدى ومن قلة الثقه في النفس أقول من زينك عاد لا شكل ولا أخلاق روحي راضيه
كنت لما اروح مع زوجى لمطعم أو مكان عام كل مره زوجي يشوف وحده مع زوجها بس علشانها نحيفه ومامعها أطفال يقول هذولي عرسان عاد أنا أموت من القهر واقول في نفسي تلقينه يقول في نفسه ياحظه بهل العروس
الحين ماعاد صارو يلفتون انتباهه كثير------------صار تركيزه على أكثر
كنت لو شفت بنات يمرون من جنبنا احاول ألهيه بالكلام عن إنه يطالعهم والحين اكتشفت إني تخلصت من هذي العادة بدون ماادري
كنت احس لما البنات يقابلونا ويطالعون في زوجي على طول يطالعوني وكأنهم يقولون ياخسارته عليها لأني فعلا فى العباية شكلي أمه
يمكن هذا شعوري بس لأني حساسه مرة وعاطفيه بس كل هذا كان مدفون بين الشحوم
وأنا كان المهم عندي اعرف وش الي صح ضميرها وغير تفكيرها
تقول فى يوم كنت لحالي فى البيت عيالي راحو مع ابوهم لبيت اهله
وجلست اتابع تمثيليه في التلفزيون وجايبه باقي الغداء انقنق فيه---بعد ماكفاها الي كلته في الغداء
بعد كذا رحت لغرفتي وجلست اطالع روحى فى المرايه
قلت فى نفسى هذا جسم وحده في العشرين اجل إذا صرت فى الأربعين وشلون بصير
لو مهوب علشان شكلي على الاقل علشان صحتى
لو عشان نفسيتي الي صارت زفت من الي اشوفه ومن خوفى على زوجي لايطير مني
فكرت سنين وانا آكل كل الي نفسي فيه وش حصلت كلها متعه مؤقته تعبت ولازم احط حد لمعاناتي
بس وشلون
هل هو رجيم او دواء اواو؟
قالت أول شي الدعاء ومع الدعاء جتني قوة إراده غريبه
ثاني شي عدم اليأس دائما ادور على حل وماأمل أبدا ومقتنعه ان كل شي له حل بس نواصل البحث إلى أن نجده
أما عن الرجيم تقول استخدمت وجربت كل شي
فطلعت بفلسفه
إنها لما تنقص عشرة كيلو وتخبص وترجع حتى لو نصفها كانت تقول الحمد لله
لازال عندي النصف الثاني مارجعته فى الوقت الي غذيت جسمي بكل الي نقص عليه
يعني لازلت ربحانه
وظلت على هذا التفكير الى ان انتصرت فى الأخير يعني كانت تجمع ربح على ربح
وماتبكي على الخساره (وهذي الصراحة فلسفة اعجبتني كثير)
ماكانت تهتم إنها تنزل فى أسبوع أو شهر كانت تقول حتى لو مانزلت فى الشهر غير ثلاثة كيلو بركه مع الوقت بيكثرون وحتى لو اجلس سنة
والشى المهم قالت نصيحه لأي وحده تسوي رجيم انها تشغل نفسها فى شى ثاني مثل تعلم هوايات جديده او لغة وتعتني بكل الجسم من شعر الى بشره وغيره حتى إذا نحفت تكون مكمله أشياء كثيره وهذا يبي يشغلها من التفكير فى الأكل
وتقول أن الشعور الجميل فى الجسم وفى النفسية يفوق أي وصف------------------- لما كانت سمينة كانت ودها تنحف بس علشان شكل الجسم والتمتع باللبس بس أكتشفت أشياء أهم ماكانت داريه عنها تفوق موضوع اللبس ---------مايكتشفها غير الي نحفو من بعد ماكانو سمان
حتى النحيفات مايعرفونها ----------------------شى يستاهل كل التعب لانها اكتشفت ان الحرمان من العادات الغذائية الغلط أسهل بكثير من الحرمان من المكاسب الثانيه الي عرفتها بعد النحف وان مافية اكله مهما كان طعمها تستاهل إنها تهدم هذا الشعور الجميل
الشى الثاني والأجمل إنها اكتشفت إن الذي كان ينقصها ليست الإراده بل
شيأين الأول عدم إدراك الفائده الحقيقيه من الرشاقه من نواحي كثيره
والثاني هو الوعي الكامل بالأمور الغذائيه وأثرها
اما الإراده فهي تتكون تدريجيا من زيادة مستوى القناعه عند الشخص
بأهمية الشي
وعلى موضوع الرجيم
تقول في البدايه كنت كل مره اسمع عن رجيم كان تركيزي بس كم ينحف
وعلى طول على السوق أجيب الطلبات الي كثيرا ما انرمت لأنها
تستخدم يوم أو يومين هذا اقصى حد
اما الأجهزة عاد هذى قصة
كانت تعتقد إذا سمعت عن جهاز إنها مابينها وبين الرشاقة غير إحضار هذا الجهاز للبيت
وانه لو كان عندها كان صارت رشيقة من زمان
وينتهي الجهاز معلاق للملابس في الغرفة لحد ماتمل منه وتبيعه بنصف ثمنه
قررت إنها تاكل أكل البيت الموجود وتركض في مكانها بدون جهاز
على الاقل أهون من الفشيله من رجلها كل يوم وين رايحه ابي اروح اشتري أغراض الرجيم
ولا شاف شي المسيكين
كل الرجيمات جربتهامن الكيماوى الى البروتين الى رجيم السعرات الى الشوربة الحارقه
بس أفضل شى نزلت عليه هو ترك العشاء +مشي نصف ساعة فى نفس مكانها + تمارين لشد الجسم +تخفيف +فى نهاية الاسبوع يوم واحد تاكل غدوه حلوه
موضوع منقول من كاتبته بمنتدى اخر اسم الكاتبه بنت الجزيرة
منقول للتشجيع فقط