كيفكم صبايا ان شاء الله بخير حبيت افيدكم بهذا الموضوع قرأتو باحد المنتديات بتمنى تستفيدو يا حلوين ...............هل شعرتي بأنك بتعملي ماسكات لبشرتك بس مبتجبش نتيجة؟؟
يبقى غالباً بتعملي خطأ من الأخطاء دي في استخدام الماسكات.. تعالي اعرفي الأخطاء دي عشان تتجنبيها بعد كدا وتقدري تحصلي على اقصى استفادة من الماسك.
♥♥♥♥♥♥♥♥♥
الخطأ الأول:
الماسك غير المناسب لبشرتك
استخدام اي ماسك دون التأكد أنه مناسب فعلاً لبشرتك.. مينفعش تستخدمي أي ماسك لمجرد أن صديقتك مدحتلك فيه أو أختك جربته وطلع حلو معاها.. أو الاعلان بتاعه جذاب.. لازم تقرأي وصف الماسك وبيعمل أيه بالتحديد وهل مناسب لنوع بشرتك وللا لاء.
★★★★★★★★
الخطأ الثاني:
عدم قراءة مكونات الماسك
لازم تقرأي المكونات المصنوع منها الماسك كويس قوي.. اتأكدي أن مفيهوش مواد عندك منها حساسية..
*ملحوظة: لو بتستخدمي ماسك طبيعي من مطبخك.. اتأكدي تماماً من كل مكون من مكوناته واعرفي هو بيعمل ايه بالظبط.. عشان تتفادي أنه يضر بشرتك.. يعني مثلا لو بشرتك جافة متستخدميش معاها ماسك من مكوناته مثلاً الترمس.. لأنه هيزيد من جفافها.. وهكذا!
♥♥♥♥♥♥♥♥
الخطأ الثالث:
الكولاجين
استخدام الماسكات (أو أي مستحضرات عموماً) تحتوي على الكولاجين.. وده لأن مادة الكولاجين الموجودة في المستحضرات دي بتفسد انتاج الجسم للكولاجين.. يعني ممكن توقف انتاج بشرتك للكولاجين تماماً.. وتبقي أنتي بتعملي ماسكات وبتصرفي فلوس قد كدا ومبهدلة نفسك والأخر تلاقي بشرتك لسه شاحبة بردو..
*ملحوظة: لو لقيتي مكتوب أنه فيه مواد "بتحفز" انتاج الجسم للكولاجين أو الايلاستين ممكن استخدميه بأمان.
★★★★★★★
الخطأ الرابع:
منطقة ما حول العين
متستخدميش الماساكات حول العيون أبداً.. أياً كان الماسك مغذي أو مرطب أو مكوناته رائعة فهو في الأخر غير مخصص لمنطقة حول العين.. لأن البشرة فيها مختلفة عن باقي الوجه.
*ملحوظة: منطقة حول العين لها طرق ووسائل عناية خاصة وماسكات خاصة هنتكلم فيها في حلقات جاية.
♥♥♥♥♥♥♥♥
الخطأ الخامس:
الجروح والبثور
لازم قبل ما توزعي الماسك على بشرتك تراعي أن البشرة تكون كلها سليمة ومفيهاش أي جروح أو بتنزف..
يعني لو عندك مشكلة في جزء من بشرتك زي مثلاً جرح لسه لم يلتئم.. أو واحدة من حبوب الشباب كبيرة وبتوجع.. أو جزء مشقق من البرد أو الجفاف.. لازم تتجنبي تفردي الماسك على الجزء المصاب ده.. أو يفضل عدم استخدام الماسكات خالص لحد ما الجرح يلتئم.
★★★★★★★
الخطأ السادس:
الرقبة
أي ماسك بتستخدميه للوجه لازم تفرديه كمان على الرقبة.. لأن جلد الرقبة من مكونات جلد الوجه و بيظهر عليه الشحوب والاجهاد والتجاعيد زي جلد الوجه بالظبط
♥♥♥♥♥♥
الخطأ السابع:
الوقت المحدد لكل ماسك
خطأ شائع عند بنات كتير خصوصاً اللي لسه صغيرين.. أنهم يتركوا الماسك على الوجه مدة أطول من اللي مكتوبة على العلبة.. يعني لو مكتوب ربع ساعة يبقى لازم تغسليه بعد ربع ساعة بالظبط.. عشان ميعملش حساسية أو يضر بشرتك.
*ملحوظة: لو مكتوب أن "الماسك يترك حتى يجف" مينفعش لما ينشف شوية أروح ابلله بالماء عشان يقعد على بشرتي وقت أطول.
*ملحوظة كمان: الوصفات الطبيعية يفضل تكوني قرأتي أو متأكدة من الوقت اللي نتركه على البشرة.
★★★★★★
الخطأ الثامن:
استخدام الماسك بدون تجربة
لو أول مرة تستخدمي الماسك يبقى تجربيه على منطقة صغيرة من جلد داخل ذراعك.. لأن المنطقة دي حساسة للمكونات اللي بشرتك بتتحسس منها.. يعني لو حصل التهاب او حسيتي بحكّة وهرش وقت التجربة يبقى اوعي تستخدمي الماسك على وشك طبعاً.
♥♥♥♥♥♥♥♥♥
الخطأ التاسع:
كثرة استخدام الماسكات
لازم تسيبي مسافات زمنية بين كل ماسك والتاني مش اقل من يوم.. عشان البشرة تاخد راحتها وتلحق تستفيد من الماسك السابق.. وكمان لان كثرة الماسكات بيأثر على كمية الماء الموجود في البشرة وممكن يؤدي لنتيجة عكسية ويسبب جفاف وشحوب البشرة.
*ملحوظة: الكلام ده يطبق على كل الماسكات ختى لو ماسكات طبيعية.
*ملحوظة كمان: مفيش حاجة اسمها ماسك كل يوم.. ده تدمير للبشرة واستنزاف لنضارتها وحيويتها.
★★★★★★
الخطأ العاشر:
الكريمات والماسكات
استخدام الماسكات لا يغني أبداً عن كريمات لتغذية البشرة أو ترطيبها لأن أسلوب عمل الماسك على البشرة غير اسلوب عمل الكريم على البشرة.
♥♥♥♥♥♥♥
الخطأ الحادي عشر:
عدم الاستمرار.. طالما بدأتي تستخدمي ماسك معين.. تابعي في استخدامه بانتظام زي ما هو مكتوب عليه.. وبلاش تستخدميه مرة كل كام شهر وخلاص.. لأن البشرة في المرة الأولى بتكون استعدت للمتابعة مع مكونات الماسك وبتكون مستعدة عشان كل مرة تجدد من نفسها.. لكن عدم الاستمرار بيشتت استعداد البشرة ده وبيأخر تاثير الماسك.
★★★★★★★
الخطأ الثاني عشر:
تعدد أنواع الماسكات
استخدام أكثر من نوع من الماسكات على التوازي ممكن يعمل تأثير سلبي على البشرة.. ويفضل يكونوا على التوالي.. لما تخلصي كورس مع الماسك الأول ابدأي كورس مع الماسك التاني.
★★★★★★
الخطأ الثالث عشر:
الترطيب
مهما كان الماسك مرطب للبشرة فهو يعمل على فقد كمية من ماء البشرة.. فيجب بعد كل ماسك ترطيب البشرة بكريم مناسب لبشرتك.. كمان كريم الترطيب بيعمل طبقة خفيفة بتساعد على احتفاظ بشرتك بالماء المكتسب بعد غسل الماسك من البشرة.
♥♥♥♥♥♥♥♥
الخطأ الرابع عشر:
الماسك والأكل والنوم!
ودي أهم حاجة.. الماسكات مهما كانت فيها مواد فعالة ومفيدة للبشرة هتفضل بردو مجرد مواد خارجية.. لكن الاهتمام الحقيقي بالبشرة بيجي من داخل الجسم.. يعني مينفعش تكوني بتسهري ومبتشربيش ماء كفاية ومبتكليش أكل مغذي أو بتاخدي أدوية بدون استشارة الطبيب.. وتيجي تقولي الماسك ده وحش.. ومش بيعالج الشحوب أو مش بيضيف تضارة لوجهي.. لأن النضارة بتيجي من الأكل والغذاء والماء
★★★★★★★★
نصيحتي الأخيرة لكِ.. خصصي من وقتك جزء ولو بسيط مرة كل يومين عشان تعتني ببشرة وجهك وببشرة جسمك كله.. وتشوفي حالها ايه ومحتاجة ايه قبل ما تتضرر أو تتجعد.. لأن تفادي حدوث المشكلة أفضل من المعاناة في حلها بعد حدوثها!
●●●●●●●●●●●●●
يلزم عليك تسجيل الدخول أولًا لكتابة تعليق.
التذكرة
•
رفع
الصفحة الأخيرة