زوجي ماله راي صرت مااتحمله وابيه يطلقني وانا اعشقه واموت فيه

السلام عليكم ورحمة الله وبركاته


ابقولككم قصتي كلها تكفون مالي غيركم اصارحه لان انا ماحب اقول قصتي لااحد يعرفني حتى لو كانت امي او اختي







اول شي
انا لما كنت فالثانوي امي تزوجت طبعا" هي مطلقه من الوالد وتزوجت واحد مجرم خرب حياتنا لدرجة انه صار يناظرني انا واختي نظرات تخوف بأختصار نظرات جنسيه وانا رحت اعيش عند ابوي اللي ماقد نمت عنده ولاليله من وعيت على الدنيا كل هذا بسبب خوفي على نفسي من زوج امي

طبعا" رحت لحياة جديده غير الحياة اللي اعتدتها عند امي رحت لمكان الناس اللي فيه متربين غير التربيه اللي تربيتها عند امي المحافظه الملتزمه علمتنا نخاف على نفسنا ونخاف من الله واهم شي فالحياة الصلاة ونبعد عن الخرابيط لدرجة اني عند امي ماتمريت بسن مراهقه كنت خوافه من الشي الخطاء عشان ماازعل امي

المهم لما انارحت لاابوي
ابوي واهله ناس متفتحين بشكل مو طبيعي الحلال عندهم حلال والحرام عندهم حلال
مافي شي ببيتهم حرام
لقيت عندهم بنات عماتي اللي كنت اشوفهم بالسنه مره بس بعيد الفطر
ماكنت اعرف اهل ابوي حتى عماتي ماكنت اعرفهم كلهم



المهم جلست عندهم 3 شهو كانو بنات عمتي يتهربون مني
لان كل وحده ماسكه طريق خطاء
وحده حقت بنات والثانيه عندهت حبيب وعماتي عادي عندهم ينظرون ان المكالمات شي عادي فتره وتعقل البنت من نفسها



خلاصة الموضوع في نفس اليوم اللي قالوا فيه البنات انهم يكلمون انا قلت صعبه اجلس الحالي مع الصغار ولامع اخوي اللي اصغر مني بسنه

عشان هم يسوون خطاء انا وش دخلني فيهم
المهم مع الايام قالولي انهم يكلمون وقالوا انتي مالك دخل ولوقلتي شي ياويلك وقتها توني مخلصه ثانوي توي ناجحه
واشوفهم يكلمون ويضحكون وانا اتفرج عليهم
جا ذاك اليوم المشؤوم
خذت بنت عمتي رقم من الجريده
وكلمت واحد واستهبلت معه
وقالت خذي جربي وسعي صدرك دايم عايشه بهم
كلميه يومين واتركيه كل ماضاق صدرك كلميه
طبعا" انا الغبيه كلمته هذا الشخص اللي خذت رقمه من الجريده

وهو يكلمني على اساس ان انا بنت عمتي
ماعرف يفرق يحسب اننا وحده
ومع الايام قلت له
استمريت معه
وسألني قاالي انتي قد كلمتي شباب


انا سألت بنت عمتي قلت انه سألني
قالت قوليله ايه قد كلمت
قالت لي لاتبينين انك ماتعرفين مكالمات وخرابيط عشان مايتلكع عليك
قلت له ايه قد كلمت استهبل واقفل
وانا ماقد سويتها بس ابي اسوي نفسي فاهمه والين اليوم وهو حاط براسه اني قد كلمت


المهم هذا اللي كلمته حبيته عشقته اموت بمواطي رجوله وهو حبني موت موت موت


وتزوجنابعد سنتين من المكالمات
واللي يدلكم اني خوافه ماقد قابلته قبل مايتزوجني
كان يطلب مني اقابله وكنت اقول لا
شافني بس شوفه شرعيه وبعدها تزوجنا



من هنا تبدى مشكلتي


انا كنت نحيفه وجسمي رويان على نحف وحلو
سمنت سمنه مفاجأه خلال ثلاث شهور سمنت 15 كيلو
وتغير شكلي حتى لوني غمق من السمنه انا لما انحف افتح
المهم ان
الكل استغرب من تغيري المفاجيء
صار سبب سمنتي الغده عندي بطيئه في حرق السعرات


طبعا" زوجي اللي كان حبيبي قد سألني عن جسمي وقلت له انه حلو ومن ها الحكي
وكان مقتنع بجسمي


وانا خرب جسمي قبل الشوفه الشرعيه والله ان زواجي كأنه عقوبه من تزوجت وانا كارهه نفسي


المهم جاء وشافني وهو اهم شي عنده ان زوجته تكون رشيقه
جاء شافني وانصدم انا قلت له اني سمنت بس ماقلت اني زايده كل هذي الكيلوات
ووافق علي بعد ماوعدته اني اسوي دايت وانحف وادخل عليه نحيفه



لدرجة ان اخته تقول لاتاخذها البنت سمينه
الين اليوم اخته هذي ماتحبني عشانه اخذني وانا سمينه
وترمي علي كلام واحيانا" اقوله واحيانا" مااقول له كل شي
اقول له نص الكلام اللي هي تقوله ماابي اكدر خاطره كثير
واللي قاهرني انه هو مايهتم من خاطري
وهو رجال متعلم ومثقف بس متأثر بجهل اهله كل شي يقول اهلي اهلي صغر في عيني بسبب كلمة اهلي
صرت ماعاد احترمه ابي اتقبله مااقدر اكره كلمة اهلي يحسسني انه مو رجال والله اني مااحس برجولته من كثر مايقول اهلي كذا واهلي كذا
اللي اعرفه ان الواحد يحاول يثقف نفسه مايدهور نفسه الازوجي يسمع لخواته وهم جاهلات مايعرفون فالحياة الاالمطبخ
وفوق هذا متكاثرين ولدهم علي مع اني احلى من خواته وبشهادة الجميع
صديقاتي يقولون وش وداك لهذولي مره مو حلوين
بس اقول هذا نصيب لدرجة ان وحده من صديقاتي تقول جعلك ماتجيبين بنات عشان مايجون على اهلهم هذا وهم شايفينهم بمكياج اجل لو شافوهم بدون انا مااحب اتهزا والله بس هم كرهوني فيهم وكرهوني بزوجي وببيتي
صاروا يمدحون اختي عنده عشان يحسسونه انه ماخذ وحده موحلوه مع اني اجمل من اختي بكثير بس قصدهم يكرهونه فيني


ومع انه يوم الشوفه اخته تقول ملامحها حلوه وشعرها حلو بس جسمها سمين

بس مااقول الا
حسبي الله ونعم الوكيل على من بيدمر بيتي الله يشغل اللي بيخرب بيتي في نفسه وعياله بمرض مايشفى منه

المهم


تزوجنا وانا سمينه والرجال موراضي ودايم مشاكلنا بسبب سمنتي رحت مستوصف الرثويه من وراه
وقالت لي عندك الغده بطيئه بالمره
ولازم تاكلين حبوب وقتها كنت حامل
والحين انا توني والده من 3 شهور و 16 يوم



مشكلتي الان زوجي كرهته والله كرهته ماعاد اتحمله من كثر مايقولي بيتزوج وحده ثانيه وبشتري بيت ملك وبسكنك تحت وهي فوق ويقول نسبنا مااعجبه
ويقول انه موراضي عن حياته معي
وانه متحسف انه تزوجني
مع العلم هو مايشك فيني لاتقولون هذا بسبب مكالمتنا قبل الزواج زوجي يدري اني اموت فيه ومستحيل اسوي الخطاء
الحين انا افكر بالطلاق لان انا مستحيل اشوفه مع وحده غيري تقاسمني في حبيبي اللي ماعشقت فالدنيا غيره
تقاسمني نومه وجسمه ودلعه وحضنه مااتخيل ابد ابد ابد

الله ياخذني ولاياخذه قبل ذا اليوم
ان كان ناوي يتزوج وانا على ذمته لانه لو سواها سويت جريمه وقتلته ولاانتحرت وافتكيت
لاتقولون هذا كلام عشان غيرتك انا اذا احد يجرحني ماانسى انا تركت اشخاص اغلى من زوجي عشانهم بس جرحوني

ابي اخذ رايكم
تنصحوني بالطلاق مع العلم ان عدي ولد صغير مابيه يشوفنا مع بعض ونتطلق ويتعقد ابيه يفتح عيونه على وضع واحد يانكون مفترقين او مع بعض انا مجربه اثار الطلاق والله ان الموت اهون بس اني دايم اتحمل واقوي اعصابي واصبر
والمشكله

مافي شي يخليني اضيع عمري على واحد انا مالقيت في حياتي معه لاامان ولااستقرار
يحسسني اني بفقده ويحسسني انه قد حب وحده قبلي ومانساها وانه دخلني بحياته عشان ينساها ويحسسني بحاجات تعور قلبي مااحط راسي بالمخده الا وذابحني التفكير ومع هذا هو مايخوني ابد بس يحسسني بأنه له ماضي ومانساه


والله اني حاطه كل ملابسي بالشنطه متحسفه ارجعها للدولاب
احس اني ماعاد ابيه واللي ذابحني اكثر اني معليه شانه عند اهلي مخليته احسن رجال فالكون ماارضى احد يتكلم ولااذمه عند اهلي وحتى اخته اللي مجننتني ماقد ذميتها عند احد
مدري انا احس ان حياتي مع هذا الانسان ماتحتمل مايقدر يخلي يوم كامل يمر بدون مايجرحني

هو يحسسني ان خسارته على الزواج وولدي هو السبب اللي مخليه يعيش معي
تكفون كل وحده تحط نفسها بمكاني وترد تنصحوني بالطلاق
مابي عمري يضيع

مالي غيركم تكفون انصحوني ولاادعوا ان زوجي يتغير ولايفكني من حياته

لوسمحتوا لااحد يعلق على زواجنا انه عن حب ترى حياتنا مافيهاشك وزوجي للحين اموت فيه بس العيب بأسلوبه وانه يقول بيتزوج علي والمشاكل اللي بيننا تحصل بين حتى اللي زواجهم تقليدي
واللي ماخذه زوجها عن حب وزوجها يشك هذا مايدل الا على رداه وانه هو الخبيث انا زوجي مايشك لانه يعرف وش كثر حبيته
وعلى فكره اهله مايدرون عن زواجنا انه عن حب ولو دروا عادي لان اخوه متزوج عن حب ويحبون زوجة اخوه ومتقبلين وضع زواج عن حب