الحقووووووووووووووووووووووووووووووووووني مؤمن راح الحضانة
ماليش دعوة انا عايزة ابني
اليكم اليوم من أوله
انا أخدت مؤمن بتاكسي و رحنا علي الحضانة و طبعا من مبارح بالليل و احنا قاعدين نرقص و نسقف و فرحانين بالحضانة لأن الحضانة عند مؤمن هي المراجيح
هههههههههههههههههه
المهم رحنا و طبعا مؤمن ابني هو أحلي عيل في الحضانة
( علي رأي ماما خنفسة شافت بنتها علي الحيط قالت ايه ده لولية مربوطة في خيط؟)
هههههههههههههههههههههههههههههههههه
المهم
دخلت معاه و ركبته المراجيح و ابتديت مهمتي في السؤال عن المس بتاعة البيبي كلاس ليه؟
عشان أعلمها شغلها هههههههههههههههههههههههههههه
المهم الناس بتيجي تجيب ولادها و تمشي و انا قاعدة مع مؤمن ابني أصوره فيديو بالموبايل و امرجحه و أصالح الولاد اللي بيعيطوا انا و مؤمن
لما شوية و كانوا هيشغلوني معاهم
و كل الناس روحت و سابت ولادها و انا موجودة أسيب ابني و امشي بسهولة كده؟
المهم كل اللي رايح و اللي جاي يقول لي يا مدام اتفضلي حضرتك و ماتخافيش عليه هو في عينينا
بس بيكلموا مين؟
أخيرا شرفت المس بتاعة البيبي كلاس
و قعدت بقي أقولها مؤمن لما يحب يروح التواليت يقول بوتي
طبعا فتحت بقها و عينيها و استغربت و قالت لي : بوتي؟
قلت لها ايوة (أهلا دي مش عارفة يعني ايه بوتي باين مؤمن اللي هيعلمهم)
قلت لها بوتي يعني قصرية بس بالانجليزي
قالت زي أم العريف : ايوة ايوة انا عارفة
المهم قلت لها هو كل حاجاته معاه في الشنطة السندويتشات و الكوباية و المناديل و العصير
قالت حاضر ( و طبعا عايزة تولع فيا لأن هما اللي قايلين لي اجيب معاه ايه مش فتاكة يعني و لا اختراع)
قلت لها خليه يفطر معاهم هو مش بياكل خالص قالت طيب
اخيرا لجأوا لمديرة الحضانة عشان تطردني هي
لقيتها جات و عرفتني بنفسها
و قالت لي اتفضلي حضرتك و ماتخافيش عليه هو في عينينا قلت لها هيعيط لما أمشي قالت ماتقلقيش احنا متوقعين ده طبعا و لينا اساليبنا و ما تخافيش
قلت لها طيب الباص هيجيبه؟(مع ان انا عارفة الكلام ده و دفعت مصاريف الباص من شهر)
قلت لها طيب هو عارف البيت؟
قالت وهي هتتشل ايوة معاه العنوان (للعلم انا اتعرفت علي سائق الباص يوم ما كنت باقدم و عرفته علي مؤمن و عرفته البيت و طلع عارفه لأن فيه في عمارتنا ناس في الحضانة دي)
بس ابني يا ناس
ههههههههههههههههههههههههههه
قالت ايوة
المهم شوية و كانت هترميني في الشارع قالت لي اتفضلي بقي عشان ندخله الكلاس مع زمايله
المهم انقذتها مني و مشيت
بس ايه وقفت برة شوية علي الباب عشان أسمع هيعيط و الا لأ عشان لو عيط أدخل أجيبه بس قلت لنفسي كده هتضريه مش هتنفعيه فمشيت جري عشان مش أسمع صوته لو عيط
اتصلت بحسام في شغله في دمياط
رد عليا : ايوة يا عبير
قلت له : ماليش دعوة انا عايزة ابني تعالي هاته مش عايزة أوديه حضانات
و طبعا رد عليا بكل رقة و تفهم للوضع : هو ده وقته يا عبير اقفلي و هأبقي أكلمك تاني مش فاضي باي
كلمت ماما لقيتها يا حبيبتي بتعيط عشان مؤمن صعبان عليها قلت حلو عيطت معاها شوية علي الموبايل و قفلت و جيت علي البيت أحكي لكم
أما بالنسبة للأستاذ مؤمن بقي
هو طلع جذاب زي ابوه
البنات اتلمت عليه و بقي راكب في المرجيحة و معاه 3 بنات بيتاشكلوا مين يقعد جنبه هههههههههههههههههههههه وهو بقي يتأمر علي دي و يشخط في دي بلغته الروسية الجميلة
و مشيت وهو في المرجيحة مع البنات
ماليش دعوة انا عايزة ابني
أم مؤمن2006 @am_momn2006
عضوة فعالة
يلزم عليك تسجيل الدخول أولًا لكتابة تعليق.
الصفحة الأخيرة
وانت استودعيه كل صباح والله الحافظ... وصدقيني لو تعود راح يكره الغياب وقعدت البيت.....