شوفى طريقتى
3 ك دقيق
1 ك ماء دافى
نص ك ماء دافىء و علية ملعقة خميرة و ملعقة سكر
3 ملاعق نيدو و معلقتين زيت زيتون
ملعقة ملح و معلقتين سكر
و ممكن معلقتين بيكنح بودر و تخلطيهم على الدقيق
المهم تجيبى الخلاط و تحطى الماء و الخميرة و الزيت و السكر و الملح و النيدو و تضربيهم كويس و بعدين حطى عليهم كوب دقيق و اضربيهم تانى كويس
و حطى الخليط فى حاجة غويطة و تحطى الدقيق بالراحة ممكن يحتاج ربع ك دقيق تانى بس متستعجليش اعجنى الاول بالتلاتة لحد ما تبقى العجينة حلوة و طرية و تخمريها ساعة و تكونى مغطياها بكيس بلاستيك و ممكن تستعمل للبيتزا او الفطاير المحشية
لو للبيتزا سوى العجينة و لما تستوى طلعيها من الفلرن و غطيها بفوطة و بعد 7 دقائق حطى الكاتشب و اللى تحبى تزوقى بية
و الفطاير برضو غطيها بفوطة
و بالهنا
ادعيلى ان ربنا يعوضنى اللى خسرتو و يرزقنى الزوج الصالح لو العجينة عجبتك

اللهم صلى و سلم و بارك على سيدنا محمد و على اله و صحبة اجمعين و لله الحمد
13-09-1428 هـ, 07:21 صباحاً
 
حبيت اقول فكرتك حلوه اوي
وانا سعوديه بمصر بس ياريت اعرف من فين الاقي القشطه بتعت القطايف
13-09-1428 هـ, 08:11 صباحاً
 
اختى اولا كل سنة وانتى طيبة ورمضان كريم عليكى وعلينا يا رب بصى يا حبيبة قلبى الفطار عندى بيكون اساسى شوربة لسان عصفور والسلطة الخضراء اساسى وبعد كدة لحمة او فراخ او سمك اى نوع من التلاتة فى الوجبة مش بعمل طبيخ خالص فى رمضان ممكن اعمل خضار سوتية او كوسة بالباشميل مثلا صنية جلاش بالمفروم صنية مكرونة باشاميل او محاشى كرنب ورق عنب او كوسة وفلفل وبازنجان يعنى كل النواشف بانواعها اما السحور معروف متهيالى فول جبنة بيض مقلى وخيار وزبادى هوة دى فطارنا وسحورنا اما العصاير مانجو فراولة جوافة عرق سوس خروب تمر هندى اى مشروب متوفر والحمد الله وكل سنة وانتى طيبة حبيبتى ورمضان كريم
16-09-1428 هـ, 12:38 صباحاً
 
يا مساء الفل ........ اولا كل سنة وانتو طيبين و رمضان كريم و****لله السنة دى عليكو كلها خير وبركة .....
ثانيا رمضان السنة دى عندى مختلف لان جاى بحاجات كتير منها دخول ابنى كى جى ون وبنتى هتم السنة الاولى 1/10 الجاى وكمان بعد ريجيم من شهر 2 خسيت فيهم من 97 ك الى 73 ك والحمدلله وبعد رمضان هاكمل بس رغم المجاعة اللى انا فيها واحساسى بالحرمان شهور ريجيم بس معدتى صغرت ووزنى مازادش وكمان حاجة عمرى معملتها فى حياتى بعمل شغل مهلك فى البيت مخلينى سعيدة بالصيام وموش حاسة بيه واللى باكله بيتحرق علطول ...... نيجى للآكل جوزى لاول مرة يغيب عنى بقالو سنه مسافر ولوحدى لظروف ابنى مقضياها فى الاختراعات اللى شفتها فى منتدى حواء اللى الواحد يخاف يعملها لما تعجبش عملت صينية الهمبرجر وكفته الحمص بتوع رونى ربنا يكرمها بيبقى الفطار عبارة عن عصير مانجو او برتقال فريش او عصير تمرهندى على كركديه او ليمون باللبن

وشوربة فراخ بلسان عصفوراو كريمة فراخ او الشوربة المقدسة اللى هى شوربة البطاطس بس بطريقتى ..... والاكل كميات بسيطة من الرز والخضار او المكرونة وسمبوسة الجبن بعشقها بس موش اكتر من قطعتين او فطار العيش اللى بعتبره احلى حاجة فى رمضان فطار الفول والطعمية والباذنجان مع السمبوسات ...... سحورى مايه فقط لان موش بستحمل اكتر من كدة ...... بس الافكار كتير والتجديد حلو معاكو فكرة بفكرة اساعدكو وتساعدونى ورمضان كريم يا حلوين
16-09-1428 هـ, 03:10 صباحاً
 
كل سنة وانتوا طيبين

الموضوع اكثر من رائع فع وبأذن الله كلنا نستفيد

اولا بالنسبة لى الفطار لازم شوربة سواء لسان عصفور او كريمة فراخ او بطاطس فى مرات قليلة

وسبموسك لحمة او جبنة

قطايف بالجبنة البيضاء (حادقة يعنى)

ورز وخضار ولحمة أو فراخ وطبعا دول فيهم تنوعيات كثير

او لازانيا

أو محشى وكبة بطاطس

أو صينية مكرونة بالفراخ

أو مقولبة أو كبسة ........الخ

المهم تقريبا الأكل العادى وطبعا فيه خشاف
وكنافة او قطايف حلوة

بالنسبة للسحور متنوع مره فطائر او بيتزا او فول او صينية البطاطس بالخضار والبيض

بصوا هاحط لكم رابط عليه موضوع عن السحور لنا نتشارك فيه علشان نعمل حاجات جديدة


http://forum.hawaaworld.com/showthread.php?t=979520
16-09-1428 هـ, 04:07 مساءً
 


الساعة الآن 07:50 .