هذا السمن اخذت طريقته من الوالده الله يعافيها
وعمري ماشريت سمن من برى
اصلحه بنفسي ..
وحبيت اليوم اقولكم على الطريقه
اولا
تجيبين زبده .. مثلا انا جبت زبده من الحجم الكبير
4 حبات .. زبده
وحطيتهم على نار هاديه حتى يذوبون تماما وتبدا تسخن
الحين ركزوا معاي ..
الطحين اللي بعرض لكم صورته ..
هو طحين بر..
يوضع بقدر تيفال له غطاء محكم
ونجيب نوع من انواع الحجر عندنا ناخذها من الجبال
نحمي هالحجر بين الجمر حتى يصير لونها احمر من كثر ماهي حاميه
نشيل الحجر من بين الفحم
ونضعه على الطحين بالقدر ونصكره بسرعه ..
ونجلس نرج القدر واحنا ماسكين الغطا عشان لاينفتح
وعشان تتقلب الحجر داخل الطحين
واذا حسينا انها بردت
نكرر العمليه هذي اكثر من مرّه حتى يصير لون الطحين بني
...
وهذي صورته
الخطوه الثانيه :
نقوم بوضع 2 ملعقه ط من الطحين المحموس على الزبده
ونتركها على نار هاديه حتى تغلي
اذا بدت تغلي راح تتكون عندنا رغوه بيضاء
بعد ضهور الرغوه خلي السمن يغلي لمدة خمس دقايق بعدها اطفئي النار
اتركي السمن على جنب وبدون تحريك ..
حتى يركد الطحين في اسفل القدر ..
اذا اصبح دافي .. صبي السمن وبهدوء في وعائه
واتركيه يبرد بدون لاتغطينه
اذا برد سيكون هذا شكله
وهذي اذا برد تماما ..
وبالعافيه عليكم
كنت ظن انه من البن بس شكلي مخبطه