عزيزاتي الأمهات

السلام عليكم ورحمة الله وبركاته

بصراحة فعلا جيتوا على الوتر الحساس على قولة أختي المعتصمة بالله..

أنا عانيت من هذه المشكلة لدرجة ما تتصورونها.. من يوم كان ولدي عمره سنة و3 أشهر وأنا أحاول معاه بس على فترات متقطعة وفي هذي الفترات كان أحيانا لما أخليه فترة طويلة في الحمام ممكن يسوي الكبيرة..

وبعد ما صار عمره تقريبا سنة ونص زادت هذه المحاولات.. يعني كنت أوديه الحمام كل نص ساعة أو ساعة بإلا ربع
ومع ذلك كانت معظم محاولاتي فاشلة يعني كان يسويها إما عقب ماأطلعه من الحمام أو إنه يكون سواها قبل ما أوديه..وصار بعد من سابع المستحيلات إن يسوي الكبيرة في الحمام!!!!!!!!!! تعرفون وين طبعا!!
واستمرت هذه المحاولات على قدم وساق.. وكانت أمي دايما تقول لي إن احنا عيالها خلاص أول ما نكمل سنة و8 شهور ما كانت تلبسنا الحفاظة!

المهم إن استمرت محاولاتي من أول ما يقوم من النوم اخليه من غير حفاظة وأوديه الحمام على فترات متباعدة إذا ما كان شارب سوائل كثيرة وعلى فترات متقاربة إذا كان شارب سوائل..وكنت طبعا ما أخلي قصة ما أقولها له وهو في الحمام... وارش عليه ماي دافي..و اسوي مثل أختي تيمة أقول له جات جات يللا شاطر حبيبي.. وأصفق له.. ومع ذلك كان يسويها أحينا في الحمام وأحياااااااااااااانا بره الحمام..

والحين بعد ما صار عمره سنتين و3 شهور قلت كثيرااااااااا ولله الحمد المرات اللي يسويها في نفسه يعني حتى لو أخليه فترة طويلة ما أوديه الحمام الحمدلله يتحكم في نفسه.. حتى إذا آخذه معاي مكان بره البيت ما ألبسه الحفاظة خلاص..
وأنومه من غيرها بعد.. لأني صرت أعطيه الحليب في كوب قبل موعد النوم بحوالي ساعة أو ساعة ونص وأوديه بعدها الحمام مرتين..وبعدين أنومه..

المهم هذي هي كل القصة وأتمنى إنكم تستفيدون منها.. ونصيحة واااااااايد مهمة:
إن كل ما كان الطفل أصغر كل ما كان أحسن إنج تعلمينه


وكل حبي لكم وتمنياتي بالتوفيق

السلام عليكم :

ماشاء الله وايد في ردود حلوة ومفيدة .... أنا مازلت مواصلة مع بنتي عشان تقطع الحفاظ وماشاء الله يوم تستجيب ويوم تنسى إنها مولابسة حفاظ المهم إني قاعدة أواصل معاها .... أخذت أسبوعين إجازة من الدوام ومجابلتها في البيت..... وقالتلي وحدة من صديقاتي لم تودين الطفل الحمام (وإنتو بكرامة) فتحو ماي الحنفية وخلي الطفل إشوف الماي وعلطول راح إسويها وجربت الحركة هذي ونفعت معاي وحتى إختي جربتها مع ولدها..... (يعني يمكن من 10 مرات ... مرة وحدة ما تسويها) بس قالتلي صديقتي لا تكتير على الطفل ماي علشان يتبول .... لأن هذي الحركة ما تساعده إن يتبول ..... ,اتمنى إني أفيدكم في هذه المعلومة....:27:

آآآآآآآه من هاذي المشكله اللي مالقيت لها حل بس تدرون بنتي عمرها ثلاث سنين وتسعه شهور ماخليت شي علشان اعلمه قريت كتب قبل ماابدا (الكتب تشير انه مافيه عمر معين للتعليم انما هو استعداد) تشجيع وشكولاته قطع صغيره قريت لها قصص في الحمام انا وابوها ,,,,وهي متنحه ..فتحنا المويه,,, جبنا صور لاطفال مسوين بوله على انفسهم زي اللي في العيادات ..دخلناها معنا ومع اخوانها اثناء الحما م ,,,وبرضه متنحه تدروون ...فصخنا الحفاض صار لنا شهور ونستخدم بانتي هقيز في الطلعه ,,,اما في البيت فشغالين تنظيف ويا قلبي لاتحزن....

وجدتهاااااااااااااااااا
قوي قلبك وسوي زي ماقلت افصخي له كل الملابس ولبسيهم ولد او بنت قطعه وحده واسعه مثل الدراعه يعني وخليهم فيها اسبوع بالكثير ويتعلم لانه مافيه شي يتشرب المصايب فينعفس مره مرتين ينبهر يتادب بس خلي بيتك سيراميك وغطي الاثاث بنايلون في البدايه انتي وديهم للحمام وبعدين لو حدث هيكون درس مظبوط:27:

سلام يا الغاليات, موضوع حلو و كمان اجتهادات الامهات لحل ها الموضوع احلى, و خصوصا مشاركة ام نرمين. تعرفون يا حبايبي وش اهم شي المفروض الام تحط ببالها هو متى تدرب طفلها يروح للحمام, و تهيئاه لدخول الحمام و الاستغناء عن الحفاظ. العمليه يبغالها طولة بال وما هي بيوم و ليله تقدرين تعلمينه الحمام. ركزوا يا امهات على الكلام اللي ابقوله, عملية تعويد الطفل على الحمام تحتاج تدريب ثم تدريب ثم تدريب................................. لين بكره و انا بقول تدريب. الام الذكيه هي اللي تحاول تعلم و تدرب طفلها يروح للحمام وهو تقريبا بعمر السنه او اكثر, طيب بتقولون كيف ووشلون, انا اقول لكم كيف, عن طريق اللعب و الالعاب اشتري عروسه ( فيه نوع من العرايس تجي طقم كامل معاها حليب و رضاعه و حفاضات و صحن و ملعقه, و العروسه لما تشرب مويه تنزل منها مويه يعني فيها فتحات, و معها يجي قيصريه صغيره علشان العروسه لما تبغى حمام تكون القيصريه موجوده با الحمام مو برا) و العبي مع طفلك و علميه كيف العروسه اذا اكلت او شربت لازم تروح الحمام, و تاخاذون العروسه و تحطونها على القيصريه.

بنفس الوقت تكونين شاريه قيصريه عليها رسومات حلوه, و دايما با الحمام, جنب قيصريه العروسه, و العروسه على القيصريه, و تعاملي مع الطفل برقه و بدون ضرب و صراخ و معاير با الكلام, خلي معك حلاو علشان تكافئينه لما يعملها, و لو وصخ على ملابسه لا ترجعين و تلبسينه الحفاظ, لا معليش تحملي لبسيه ملابس ثانيه نظيفه و لكن بدون حفاظ, و في اليل عودي طفلك ما يشرب سوائل قبل ما ينوم بساعه, و في اليل قوميه كل ساعتين صحيح انك راح تتعبين بس بعدها بترتاحين صدقيني. نقطه مهمه التدريب يكون بسن مبكر تدريب بشكل يومي لين تحسين ان الطفل تعود و استوعب الموضوع, مو تجين على طول تجين تفصخين الحفاظ و تقولين له خلاص ماني ملبستك حفاظات انت رح الحمام ترا كذا غلط و بعدين تضربينه و يتعقد طفلك.



بس راح اذكر لكم قصتين ماساويتين بخصوص جهل بعض الامهات في التعامل مع هذه المشكله. وحده من الامهات كان عندها طفل واحد و كانت صغيره با السن وما تعرف كيف او متى تدرب طفلها على الحمام, المهم هي كانت بجمعة حريم و قالت لهم عن طفلها و الحمام قالت لها وحده من الحريم ( يا خبلك بنتك عمرها سنه و ثمانيه شهور وما علمتيها على الحمام ولا دربتيها, خلاص ما لك امل بنتك بتقعد طول مرها لين تكبر وهي توصخ على نفسها) قامت الام الساذجه و سمعت كلام الحرمه الجاهله, و فكت حفاظ البن و قالت با الغصب تعلمين الحمام, و الطفله كل ما فكت امها الحفاظ توصخ, قامت الام سخنت الملعقه على النار لما صارت حمرا و اخذت الملعقه و كانت تبغى تخوف طفلتها علشان تروح الحمام وما توصخ نفسها او البيت, و قامت حرقت رجل بنتها لما وسمت جلد البنت با الملعقه, و الطفله بغت تموت.

القصه الثانيه هذي بنت عمرها 10 او 11 جميله جدا بس مشكلتها ان تعمل الكبيره في ملابسها ( الله يشفيها ولا يبلانا) فوحده من اهل ها البنت سالتني عن حل, لانهم صراحه تعذبوا منها و ينحرجون من الناس بسبتها, فقلت لهم اكيد امها كانت تضرها يوم كانت صغيره, وما فيه حل الا انكم تاخذونها لدكتور, فا اعتقد ودوها عياده نفسيه. شكرا :27: