دجاج بصلصة الباربكيو والكريمة

السلام عليكم ورحمة الله وبركاتة



اهلين اخواتي انا جايبه لكم طبخه لذيذه مره
انا متعوده اقيس المقادير بالنظر لكن حاولت اقيسها هالمره عشان تسهل على الجميع التطبيق بإذن الله



الطبخه هي دجاج بصلصة الباربكيو والكريمة




ااول خطوه نحتاج




صدور دجاج 450 جرام 6 قطع تقريبا مقطعه لمكعبات متوسطة
2 ملعقه كبيره صلصة باربكيو مدخنة
2 ملعقه كبيره صويا صوص معتدلة
2 ملعقة شاي بهارات الدجاج
رشتين فلفل ابيض تقريباً (نسيت اشوف المقاس)



نخلطهم مع بعض ونتركهم على الاقل نصف ساعه





الخطوه الثانية ضعي بالخلاط



3 حبات طماطم
1 بصل
4 فصوص ثوم ممكن تقللي الثوم لان طلع معاي شوي كثير
3 ملاعق معجون طماطم
2ملعقه كبيره نشاء
وماء لخلط الطماطم





بقية المقادير




1 كوب لبن
1 كوب كريمة الطعام
كوب ونصف بطاطس تقريبا حبة كبيره
كوب ونصف قرع امريكي تقريبا حبه صغير
ا فلفل رومي صغير او حسب الرغبة
زبده 100 جرام او حسب الرغبه (( لكن 100 يعتبر كثير لان انا احب نكهة الزبده فاللي تحب الاكل الصحي تحط 50 جرام بيكفي))
ملح حسب الرغبة
بهارات مشكلة ((1ملعقة شاي صغيره لان فيه احجام منها انا اقصد المقاس الصغير مايعادل ربع ملعقة طعام تقريباً
المهم
1 ملعقة شاي كركم, 1ملعقة شاي كزبره مطحونه, 1ملعقة شاي زنجبيل, 1ملعقة شاي كمون مطحون, نصف ملعقة شاي قرفة مطحونه, نصف ملعقة شاي ليمون اسود مطحون .نصف ملعقة شاي اكليل الجبل ,نصف ملعقة شاي بهارات مخلطة)) طبعا البهارات كل وحده وحسب رغبتها لكن انا بهاراتي كانت بهالشكل
وممكن اللي تحب الكاري تضيف شوية


الطريقة



نضع 50 جرام من الزبده حتى تذوب
ثم نضيف له قطع الدجاج ونقلبه قليلا بعدها نغطيه فترة بسيطة يمكن دقيقتين لحتى يتغير لون الدجاج ويبيض شويه
بعدها نضيف كوب اللبن (انا ملحت اللبن ملح خفيف)) ونخطلهم بعدها نضيف البطاطس ونتركه لخمس دقائق وبعدها نضيف باقي لخضروات وعصير الطماطم
بنات اهم شي النار ماتكون عاليه يعني تكون هادئه
لان حسب معلوماتي اللبن بسرعه يحترق
اتركيه لمدة 20 دقيقه على نار هادئه مع التقليب بين فترات





بعد 20 دقيقه نضع البهارات والملح انا ذقت الطبق حسيت صلصة الباربكيو خفيفه فرحت خلطت ملعقتين كبيره صلصلة باربكيو اضافية مع كريمة الطعام((ماكانت موجوده عندي كريمة طعم فاستبدلتها بكريمة الخفق الساده ))
بعدها نقطع بقية الزبده شرائح ونوزعها فوق الاكل



نتركة يستوي على نار هادئه مع التقليب كل 5 دقائق تقريباً عشان مايحترق انا تركته بعد اضافة كريمة الطعام تقريبا نصف ساعه
قبل التقديم تاكدي ان البطاطس استوت والدجاج
القرع والفلفل سريعين ماياخذو وقت اهم شي البطاطس والدجاج


هذا شكلة النهائي




هنا في طبق التقديم




طبعا بالصحن رز ابيض مع حشوة بصل وسلطة باذنجان وباذنجان مقلي هذا مو انا طابخته الطباخه طبختهم
طريقة الرز عاديه اخر شي وضعت بصل ومعاه كركم وبهارات اظن كذا مو متاكده وقلبت على النار بعدها اضافته فوقه




اما سلطة الباذنجان مره خطيره جربوها
تقريبا باذنجان مربعات مقلي وطماطم مكعبات نفس المقدار
بصل مقطع صغير كمية اقل شوي من الاثنين
تخلطينهم مع بعض
بعدها تضعين خل وليمون وملح وكمون مطحون مع بعض وتضيفينها للسلطه
وممكن نفس الدريسنق تضيفينه على قطع الباذنجان المقلي الكبيره بعد القلي مباشره
سامحوني المقادير مو واضحه للرز والسلطه لان مو متاكده منها بالضبط




على العموم اي سؤال انا حاضره



الطريقة اخذتها من اكثر من وصفه فخلطتهم على بعض وطلعت رهيبه مره
الله يجزاهم خير البنات اللي اقتبست افكارهم



لاتنسون تدعون لي انحف بصحه وسلامة واتوظف قريب :7_5_131:
لاني مليت من البيت



واسفه على كثر الكلام