مساكم الله بالخير
كيفك وش حالكم واحوالكم عساكم طيبين
مابي اطوله من البدايه عندي بعضن من الكلام ودي اقوله
طبعا دايم اسمع اذا همك مضايقك ودك تبوح به فصدور خلق الله اضيق >> ابو الاسلوب
مادري هو كذا صح والا خطا ماعلينا لاتشرهون علي ترى فيوزي ظاربه
ندخل في الجد الحين والكلام اللي واقف في حنجرتي من يوم بديت اكتب لكم >> اسلمي
في يوم من الايام وانا اقلب ذاك الجريده وداخله جو في اعلاناتها واذا بي القى ذاك الأعلان طالبين موظفات دقيت وانا واثقه من خشتي انهم بيقولون ياقدمي على الفاكس او الايميل اذا توفر سالت عن الوظايف
وطلعت المديره اللي راده علي
قالت تعالي اليوم اقابل معك قلت لها متاكده والا تمزحين >>امون انا ووجهي قالت ايوه انا بكلمك جد (مصريه) قلت لها كويس انا في العصر جايه واصكر واذا باختي جلست جنبي واسدح لها السالوفه كلها قالت وانا ما سالتيها عادي نجي ثنتين قلت والله نسيت وامسك سماعه التلفون واعيد الرقم والقاه مشغول مشغول مشغول على ذا الحال حول عشر دقايق والله ويمسك الخط وترد ونفس الصوت سلمت وقلت لها ترى كلمتك
قبل شوي قالت لي ايوه عوزه ايه قلت لا سلامتك بس عادي ذا سسترتجي تقدم معي
قالت ايوه عادي قبيها معاك دحنا محتاقين موصفات
قلت خلاص شكرا
واقول لوخيتي وكل هالكلام في حدود 8 الصباح >> بنت سنعه تقوم منذو الصباح الباكر
ونروج العصر قدمنا الاوراق وقالت من بكره تجون تدربون طبعا انا فاغرت الفاه اول مره في التاريخ يصير لي كذا اقدم ويقولون لي تدربي من اليوم الثاني وبعد ثلاث ايام استلمي وظيفتك والوظيفه هي شركه تسويقيه طبعا تسويق بطاقات عضويه تابعه لاحد الفنادق في الرياض
المهم ذاك الليله احس اني عايشه في دنيا ثانيه
من يوم دريت اني اخيرا باتوظف وانا شاقه الوجه (عاد هالشعور ما يحسه الا اللي جرب خبر وظيفي بعد حرمان منقطع النظير يعني اول مره يتوظف في حياته) ومن قوه الفرحه النوم ذاك اليوم ماعرفته بس تفكير وتجي ايام التدريب وتروح وكل اللي شرحته لنا سهل امسكي ذا التلفون واشرحي للعملاء العصويه وكيف الاشتراك واحنا نعطيك الارقام يعني بالعربيه الفصحى قلت ان الدعوه سهله
بس اقول بيني وبين نفسي متى اجلس على المكتب واحس اني في واقع ماني جالسه احلم
وبدا اول يوم اول جلست على الكرسي وانا فرحانه وبديت احلم مثل ذولاك اللي يجونكم في المسلسلات المهم ويجي صوتها ويقطع حبل افكاري قالت لي امسكي التلفون المهم وقالت يابنات ادوها ارقام يابنات اعطوني البنات ورقتين فيها 6 ارقام طبعا هذي اول ماتستلم الوحده يعطونها ارقام تدق عليها كمساعده من الاداره وقالت لي المديره سوي مثل زميلاتك كلمي قسم ركبتني ام العبيد جاني خوف فضيع والسحى عقرني مادري وش اسوي يعني اكلم واحد مادري وينه من ارض ربي ولا اعرفه اصلا واسرد عليه كل اللي بالورقه طالعت في اللي حولي كلهم عادي ويكلمون ويشرحون سميت بالرحمان وجلست اقرا واتعوذ على بال ماهديت عوعو (ام العبيد) وامسك سماعته التلفون قلت والله ما اتفشل من اولها بدق على خالي واسرد عليه كل اللي بالورقه ويرن التلفون ومع كل رنه احس قلبي بيطلع ويكلم واسوي ثقل مو طبيعي واسلم واقوله ممكن اخذ من وقتك دقايق قالي تفضلي انا ماسمعت هالكلمه واسكت هو يحتري متى اتكلم وانا من اللخبطه قلت اكيد انه مشغول واسمع اصوات عنده قلت خلاص استاذ محمد اكلمك وقت ثاني مع السلامه
واجلس عشر دقايق وارجع اكلمه مره ثانيه واول مارد سلمت واقوله نفس الكلام ما امداني اخلص كلامي الا وهو فاطس من كثر الضحك سكرت بوجهه
وطالع بكل عيون بريئه في البنات جالسين سالت وحده جنبي قلت الحين كيف الشغل معاك وكيف الوضع يعني كذا سؤال
قالت لي شوفي 80 %
تعتمد على علاقاتك يعني شوفي اخوانك اقرباك اصدقائهم صديقاتك سيدات اعمال يعني علاقاتك مهمه جدا في الشغل انا يوم قالت كذا كانه من مسك طاوه تيفال نوع اصلي وصكه بوجهي
اصلا اصلا علاقاتي معدومه وكل اللي اعرفهم مو مشتركين
قلت لها طيب وهالارقام اللي اعطيتوني اياها وش فايدتها قالت لا تعتمدين عليها
ترى مو نافعك الا علاقاتك وتكون لها وزن (يعني دفيع معه قرشينات ) وترشيحات العملاء بعد مهمه
مادري داخليا تحطمت شوي مو كثير وقلت بخلي املي بالله كبير ولا بياس من اوله اصلا ماصدقت على الله متى تجي هالوظيفه
وارجع على المكتب واقول ان شاء الله اتوفق وامسك التلفون واكلم اول واحد بعد خالي بالورقه واسرد
عليه اللي بالورقه والثاني والثالث ومنهم اللي مغلق واللي يقول شكرا ما احتاج هالبطاقه واللي يعتذر باسلوب غير مباشر واللي يقول بافكر مر اليوم وانا اقول واقنع نفسي ان الانسان مايطلع السلم مره وحده لازم درجه درجه حتى يوصل اكيد يواجه صعوبات على مايوصل مرت ثلاث ايام وانا ولا عميل قد جبت قلت ماعليش اكيد بتجي اوقات اجيب فيها عملاء للأداره و صرت
اخذ ترشيحات من العملاء اللي ادق عليهم وجبت من صديقاتي كذا رقم بس اللي يقول بكره واللي هزئني لين شعري سبح في السما من كثر تهزئيه والله العظيم ان قلبي حسيته طاح بين رجولي من وين جبتوا رقمي انا بشرشحك انا برفع قضيه عليكم انا اكلمه بكل ادب ولا رديت مو عشان شي لكن اول مره اتعرض لهموقف كلام الله لايوريكم اصطريت اسكر واشغلت الخط شوي ورجعت اكمل الشغل عادي ماكانه صار شي واروح عند البنات واتميلح انا ووجهي عندهم ابغى يعطوني اي رقم لان ماعاد عندي اي رقم خلصت كلها
قسم ياكل وحده انها انذل من الثانيه جلده على ذا الارقام والله ياهم اعطوني مخرج اخره وحده طلبتها امس قلت لو عندك ترشيحات لا تبخلي علي ياهي فقعت وجهي بالارنب اللي اعطتني اياه قالت والله ماعندي انا ابغى من يعطيني المشكله ان الاداره قبل ما اكلمها نادتها خصيصا حتى تعطيها ارقام لانها جابت عميل مهم نوع ثقيل ذو مكانتن ذاك اليوم
يعني لما اطلبهم مو طمع هما ماشاء الله اللي قد جابت امراء واميرات واللي جابت لاعبين واللي فنانين واللي من عائلات مشهوره مره واللي رائد وعقيد واللي دكتور واللي مهندس واللي رجال وسيدات اعمال يعني كلهم صار عندهم عملاء مو بس واحد او اثنين كثر شعر راسي
ولا بس وحده او ثنتين قسم بالله اغلبهم اذا موكلهم مرت الايام والليالي وانا على حالي اللي يوعد من يوم لثاني واللي يقولي دقي علي بعدين ويسحب علي واللي تقول انت نصابه بس تبين فلوس واللي يقول طيب ولا يجي
من جد انا انقهرت ولا عميل واحد حتى اني قمت االف من راسي ارقام على الله ربي يطيحني في ولد حلال ويشترك عن طريقي
واخر شي لما شافتني المديره كذا بدون عملاء هزئت قدام الكل يعنني التهزئي للجميع بس في النهايه العن ام الاحراج وجهت الكلام كله لي انت مو مهتمه انت جايه تقضين وقت اسلوبك غلط ارقامك غلط(طيب من وين اجيب) وقالت هذا الاسبوع اخر اسبوع لك لو ماجبتي عملاء انا راح استغني عنك و انها تتكلم من جدها
والله حسيت اني ببكي قدام البنات من كثر تهزئيه لي
يعني مايكفي المرمطه ورا العملاء اخذ بعد كلام يسم البدن لا راتب بستلمه نهاية الشهر ولا انا جد في وظيفه واحس اني موظفه
(معلقه برجولي لاني طايله لا ارض ولا سما )
انا مابي اترك الوظيفه لاني محتاجتها مره واصلا ماصدقت متى تجي وانتوا ادرى ذا الايام الواحد مايلقى وظيفه بسهوله
انا كتبت هنا حابه احد يساعدني وربي ماجيت اكتب الا لما شفتها مسكره في وجهي من كل جهه
لو احد عنده علاقات وعملاء عليهم القيمه يدلني عليهم والله اني ماخليت احد اعرف انه ممكن يشترك الا ودقيت عليه
بجد انا محتاجه لكل صاحب رقم يحب السفر من رواد فنادق 5 نجوم حاب انه يروح المطاعم التابعه لها يروح شاليهات يسافر برى المملكه
يمكن انتوا ماتعرفوني مره لكن انا عارفتكم نفرا نفرا وحاطه املي في الله ثم فيكم انتوا املي الوحيد
اذا شفتوا ان ماحدن معطيني وجه في الموضوع احذفوه ولاتنسون تحذفوني وراه لاني في ذيك اللحظه راح ابصم بالعشره ان المديره بتسوي فيني زي كذا
تراني حاطه امل عليكم بنات واولاد ورجال ونساء
كول ابو دايم (جميعا) بدون استثناء طالبه منكم المساعده
انت او انتي قريبك من اهلك معارفك جماعتكم اين كان
محتاجه لـ مساعدتكم
12-12-1428 هـ, 07:12 مساءً
 

لا توجد تقييمات لهذا الموضوع

يمكنك البدء بإعطاء تقييم عبر الضغط على النجوم أدناه:
5
4
3
2
1
الله يقدرنا ونساعدك
12-12-1428 هـ, 07:19 مساءً
 
مااعرف احد ولا كان ساعدتك
12-12-1428 هـ, 07:38 مساءً
 
اقتباس مشاركة  (oula81)
الله يقدرنا ونساعدك
الله يوفقك ويبارك فيك
12-12-1428 هـ, 07:45 مساءً
 
اقتباس مشاركة  (@اميرة الذوق@)
مااعرف احد ولا كان ساعدتك
جزاك الله الجنة
12-12-1428 هـ, 09:22 مساءً
 


الساعة الآن 10:25 .