والله ذكرتيني في بداية حياتي الفنيه قصدي الزوجيه انا كنت عايشه مع اهل زوجي وكنت اشوف خالتي تصلحه وهي طبعا زي الحريم الكبار بالنظر يعني ما فيه مقاييس ولا كاس جبن ولا شي <<< ==== داريه بتقولين اخلصي جيبي المقادير بس معليش لا زم تتحملين قصة حياتي شوي وتحسين بمعاناتي اللي عانيتها مع حمولتي وتعودت اني اصلح في القدر الكبير اللي اقول لك اكبر الطقم عشان الحموله وعشان بالوراثه خالتي اعتمدته يعني نعتمده من بعدها وعرفت كثر المويه ملي الابريق الصياح مرتين وحتى بعدين يوم استقليت بيت لحالي صرت برضو اصلحه في القدر الكبير وارسل لهم وهم الى يومنا هذا يحسبونها سناعيه في ما دروا اني ما اعرف اصلح الا بذا القدر ولا يصلح يحمى لبكره لان معه لحم يتغير شوي طعمه ولا اقدر اعطيه هنود البقالات اللي في الحاره ما يعجبهم ....

ندخل في اللي طلبتيه بالنسبه للدخن كان يجيبه ابو زوجي الله يرحمه مطحون وخالص والحين صرت اكتبه لزوجي ويجيبه يقول من المطاحن يقول انه دخن القصيم وشكله الهندي مسميه كذا يسمع بتمر القصيم واقول لك يعني انه مطحون ولونه يميل للاخضر شوي مهوب زي الدقيق الابيض ولا الاسمر كذا يميل للخضار

عشان بس تضبطيه بقول لك المقادير التقريبيه ويشهد الله اني حنيت عليك وودي تعرفين ومحتسبه الاجر فيك بتقولين اخلصي يالله المهم سوي كميه صغيره عشان لو ضبطت كرري المقادير ولا غيري شوي فيها
2 كاس دقيق اسمر
كاس دخن
بيالة جريش ( حسب الرغبه )
6كاسات ماء
لحم مقطع صغار
يعني الماء ضعف الدقيق الاسمر + الدخن جيبي قدر ( يمكن اصغر الطقم ) وحطي الماء واللحم وملح وخليه يغلي مدة نص ساعه وبعدين طلعي اللحم عشان المعلومه اللي قلت لك اول ما يسقط اللحم تحت مع الطبخ الطويل وبعدين شوفي المويه بتكون قلت عن المقدار زيديها يعني زي ما قلنا 6 كاسات وخليها تغلي ثانيه والحين ابدي بذر الدقيق والدخن اما تخلطينهم من البدايه ولا مره من الدقيق ومره من الدخن اللي تشوفينه والنار مقصر عليها المهم انتبهي لا يتكتل لانه اول مره وسعي الصدر عليه بشويش وعلى طول حركي بالخفاق اليديوي الكبير الى ان تنتهين من الدقيق والدخن اللي معاك وما اظن يطول اللت لانه بس ثلاث كاسات المجموع قصدي والحين عند اخر لته احتريه الى ان ينبض يعني بيدأ يطبخ او يغلي قصري عليه وغطيه واتركيه ساعه تقريبا وقول ساعه لان المقدار شوي بس بعدين اذا بديت تصلحين كثير ياخذ وقت اكثر وان امكن تحطين تحته بلاطه متينه عشانه بيطول لا يحترق وهو ما استوى اكشفي عليه بعد الساعه شوفي القوام اذا كان غليظ يعني زين الحمدلله وان كان خفيف لتي شوي دقيق اسمر خلاص ما تحطين دخن لانه يمرره ويبي طبخ اكثر وخليه يستوي الكميه اللي زدتيها واتوقع ان شاء الله ما يحتاج زيادة وترى من علامات استواء العصيد انه ما يلصق في جدران القدر هذي المقوله من الاثر اللي تعلمته من الحموله
خلاص الحين نرجع للحم اللي سلقناه اول ونحمس بصل صغار في سمن ونرجع اللحم نكشنه شوي مع البصل ونحطه على قدر العصيد شوي بس 10 دقايق لان الكل مستوي ونفرفه ونحط بعد فوقه بصل محموس بزبده نص استواء مع فلفل اسود
يارب يارب يارب تسوينه ويطلع زين وينبسط زوجك
"ربي اجعلني مقيم الصلاة ومن ذريتي ربنا وتقبل دعاء"

شكر الله سعيك يا أخت nourah2008 وجزاك عني خيرا والله إنك كريمة وسنعة لاتقولين ماهو سناعة مني بالعكس كان وش حدك من الأصل تصلحين وهذا أنت مجتهدة معي الله يثيبك خيرا دنيا وآخرة
بس ذكرتي في المقادير جريش وقلت ماهو لازم بس لو بغيته متى أحطه ولا تخافين إني ما أعرف اللت والنبض لا أعرفه وأشوفهم يصلحونه بس ماأعرف طريقته ومقاديره
ولا الحلو طريقة تقديمه مغاريف عليها كشنة بصل
للرفع
مادري وش تقصدين بس هذا اللي عندي


العصيدة

تحضر العصيدة من نوع أو نوعين من دقيق الحبوب حسب ماهو متوفر. وسنقدم هنا وصفة تقوم على خليط من دقيق الدخن العادي الأسمر ودقيق الذرة البيضاء، والذرة البيضاء ليست من أنواع الذرة ولكنها نوع من الدخن حبوبه بيضاء.

كوب ونصف دقيق دخن أسمر

كوب ونصف دقيق دخن ابيض

ملعقة أكل سمن

ملح وماء

مقدار من التمر الجاف المزال النوى والأقماع (اختياري)

توضع ستة أكواب من الماء أومرق اللحم أو مرق العظام في قدر على النار. يخلط نوعا الدقيق، وعندما يبدأ الماء بالغليان يذر الدقيق على الماء المغلي بالتدريج مع التحريك المستمر حتى ينتهي مقدار الدقيق ويصبح العصيد ثقيل القوام. يغطى العصيد ويترك لينضج على نار هادئة جداً لمدة حوالي ساعة مع التحريك بين فينة وأخرى حتى يشرب ماءه، ويمكن اختيار نضج العصيد بالتربيت على سطحه بأطراف الأصابع فإذا علق بالأصابع شيء من العصيد يضاف إليه القليل من الماء المغلي أو مرق اللحم ويترك على النار الهادئة حتى يتشرب السائل، ثم يعاد الاختبار حتى لايعلق شيء من العصيد بأطراف الأصابع. يغرف العصيد في طبق التقديم ويرش السمن على وجهه. في حالة الرغبة في وضع التمر فيه يتم تقطيع التمر إلى أنصاف وغرس الأنصاف بشكل تجميلي في طبق العصيد إلى منتصفها لإضفاء الحلاوة على الصعيد.


********
اتمنى اني اافدتك بشي
للرررررررررررررررررررررفع


الساعة الآن 05:10 .