ياريت تفيدوني ( حساسية الجلد)

ما تشوفين شر اختي
انا عندي نفس الاعراض اللي عندج
وبعد استشارة اكثر من طبيب واخصائيين في الجلد تم تشخيص حالتي على انها أرتيكاريا أو بالعربي الشرى

تقدرين عن طريق جوجل تسوين بحث عن هالنوع من الحساسيه وراح تستفيدين وايد

بصفه عامه بقولج عن هالمرض:
اهو مرض يصيب الانسان مره في عمره او اكثر من مره في العمر وممكن يتم معاه لفترات طويله او ممكن يلازمه على طول

سبب هالمرض اهو افراز الجسم لماده اسمها الهستامين
اهي ماده طبيعية يفرزها الجسم بس في حالتنا الجسم يصير حساس حق اي شي مثل: طعام معين، رائحه معينه، غبار في الجو، ملابس معينه، دوا معين ....

انا في حالتي السبب كان دوا لحب الشباب اللي في ظهري

الحساسيه ما راح تطلع في نفس اليوم او بعد يومين، راح تاخذ وقت ممكن اشهر يالله تظهر الاعراض عليج من بعد التعرض لمسبب المرض

في دكاتره راح يوصفون لج الكورتيزون المخفف بس في هالحاله ما راح ينفع
والعلاج اهو كالتالي:

- تراقبين نفسج وتشوفين شنو الشغله اللي قاعده تسببلج الحساسيه وتبتعدين عنها
- حطي في بالج انها بتروح مع الوقت بإذن الله
- علشان تخففين الحكه أنصحج بحبوب الحساسيه قبل النوم وعندج مجموعه كبيره من الحبوب اللي ناخذها من غير وصفات طبية مثل: زرتك (ممكن ينعس) - آيرياس (ما ينعس) ....
وهالحبوب لو خذيتي منها طول حياتج ما راح تضرج وان شاء الله ما تحتاجينها الا لفتره قصيره بس

ومع هالحبوب تقدرين تاخذين دوا قرحة المعده (زنتك)
يعني حبة حساسيه مع الزنتك قبل النوم

وفي حالة انج ما استفدتي تقدرين تزيدين حبة من ادويه الحساسيه اللي ما تنعس بالنهار مع زنتك مال المعده

انتي طبيبة نفسج اختي في هالحاله
راقبي نفسج ونظمي الادويه اللي بتاخذينها
وان شاء الله ما عليج الا العافيه


تحياتي لج
ام-بدر

يــــــــــــــــــــزاج الله كل خيراختي ام بدر والله يحفظج من كل شر .. اختي العزيزه ممكن اعرف ليش اخذ دوا للمعده؟؟

وانا خذت حبه كلارتين للحساسيه وما يسبب للنعاس ومكتوب عليه حبه وحده في اليوم اقدر اخذ اكثر من حبه .. ولين الحين مب قادره احدد سبب الحساسية اللي الأحظه يبتدي في المسا على الساعه 12 واخذ الحبه واحط الكريم بس على الساعه 3 الفجر تزيد الحساسية بطريقه فضيعه ما اقدر استحملها .. :(

ممكن سؤال بعد .. هل استخدمتي اي كريم عن الحكه؟ غير الحبوب..

انا الأسبوع اللي طاف خلصت المضاد كانوا عطيني في المستشفى نوعين من المضاد وخلصتهم .. وعطوني لاني كنت مسويه عملية التنظيف بعد الإسقاط بس بعده شوفوا انه في شي باقي وعطوني حبوب مضاد عشان ما يصير لي إلتهاب .. فهل يمكن ان يكون السبب من حبوب المضاد كانن نوعين يعني في اليوم آخذ 650mg في الصباح وفي المسا 650mg

أتوقع والله أعلم السبب الدوا اللي خذيتيه
وممكن السبب يكون أي شي ثاني ما يخطر على بالج
شامبو، عطر، كريم، دوا غسيل ....

هالنوع من الحساسيه أكثر شي يكون في فترة الليل حزة النوم علشان جذي الدكتور دايما يوصف أدوية الحساسيه لسبب واحد انها تخفف الحكه وتساعد عالنوم

الكلاريتين هم اوكي من ادويه الحساسيه المعروفه بس اذا حسيتي ما منه فايده غيريه واستخدمي دوا ثاني

بالنسبه لسؤالج ليش الزنتك دوا قرحة المعد: هالنوع من الأدويه معروف انه من مضادات ماده الهستامين اللي يفرزها الجسم وعلشان جذي يساعد على توقيف هالماده
مو شرط اللي ياخذ الزنتك معدته فيه قرحه او شي لا سمح الله
السبب مثل ما قتلج

انا للحين فيني الحساسيه اذا وقفت الدوا والظاهر انا الحساسيه اللي عندي من النوع المزمن يعني يبيلها فتره يالله تروح بإذن الله

اختي مثل ما قتلج انتي طبيبة نفسج وتقدرين تاخذين الادويه بالطريقه اللي تحسين راح تفيدج لانها بإذن الله تعالى ما منها ضرر

مثلا:

إبدئي بشي خفيف وخصوصا ان الحكه والاحمرار تصيرلج في فتره الليل

دام الكلاراتين مو قاعد يفيدج غيريه

حاولى الصبح تاخذين دوا حساسيه ما ينعس (ويفضل عمل 5 دقايق رياضه من اي نوع علشان تساعدين الجسم على فرز ماده الهستامين)
وبالليل اي دوا ثاني للحساسيه يسبب النعاس وعندج الزنتك او التيليفاست بس الدكتور مره قاللي انا ما انصح فيه لانه يقلل التركيز ، بس على فكره كل ادويه الحساسيه اللي تسبب النعاس تقلل التركيز وان شاء الله ما منه خوف

والله يشفينا من جميع الامراض بإذنه تعالى

وأي سؤال أنا حاضره

تحياتي لج
ام-بدر

بسم الله الرحمن الرحيم
أنقل لك يا أختي هذا الكلام من كتاب للدكتور عبد الباسط وهو دكتور مصري متخصص في الطب النبوي
الحساسية :
قد تظهر بعض الإندفاعات الجلدية أو قد تظهر الحكة المزعجة عند النساء تترافق هذه الحالات غالبا مع وجود الحمل ، ولما كانت جميع الأدوية المضادة لحالات التحسس فيها الكثير من الضرر على المرأة الحامل فيجب إعطاؤها أعشاب بديلة مثل :
الصعتر أو ( الزعتر ) : يجرى حمام منقوع العشب (الزعتر) 2-3 مرات أسبوعيا
ماء الحمام يحضر بوضع 200 جرام من العشب في 5-8 لتر من الماء البارد لمدة 12 ساعة ثم تسخن وتصفى وتضاف إلى ماء المغطس الذي يجرى لمدة 20 دقيقة ( يعني تقعدي فيه لمدة 20 دقيقة ) ويغمر الجزء الأسفل من الجسم ( منطقة البطن وما تحتها ) هذا بالنسبة للحساسية أما إذا كان اللي عندك أعراض سحر أو مس فلا أقدر أن أنفعك في شئ إلا أن أنصحك بعدم النوم عند أحد أو عدم الأكل كثيرا عندهم ودائما تقرئي ( بسم الله الذي لا يضر مع اسمه شئ في الأرض ولا في السماء وهو السميع العليم ) ودائما تشغلي القرآن الكريم وخصوصا سورة البقرة
وأسأل الله العظيم رب العرش العظيم أن يشفيكي ، وهو القاهر فوق عبادة

كثير كان يطلع لي كذاا انتفاخات منثورة على الجلد حساسية مدري كنها قرصات ناموس بس كبيرة شووي

كنت قبل اتروش ادهن جسمي واخليه نص ساعة بـ ملعقة حنة + ملعقة سدر اخضر مطحون + ملعقة ملح خشن

او اغلي نبات الحرجل في ماء علي النار واخذ الماء واغسل فيه جسمي بعد الاستحمام يعني
تخلينه علي جسمك اخر شي ما تنشفينه ولا تغسلينه بماء يوميا لين تروح الحساسية

لي عودة لموضوعك بتاكد من اسم العشبة من جارتنا هي اللي وصفتها لي