انتهى مشوار 13 سنه .. وما ابيكم تغلطون غلطتي

السلام عليكم

اخواتي انا انفصلت عن زوجي وكل واحد راح بطريقه
وانتهى مشوار 13 سنه زواج و3 اطفال صغار

والحمد لله على كل حال

بس بغيت اقول لكم كم كلمه اتمنى انها تفيد البنات عشان ما يغلطون غلطتي خصوصا اللي توهم متزوجات

- اذا زوجك يحبك لا تستغلينه وتعتقدين ان حبه لك بيخليه خاتم بيدك وتستخدمينه للضغط عليه
لأنه الرجل مهما حب يجيه يوم ويمل من كثرة الضغط ويتحول من حبه الى كره و صعب يرجع مثل اول

- لا تظنين ان الطلاق بعيد وتقولين لا مهما اسوي بزوجي مستحيل يطلقني وانا معي اطفال واصلا ما يقدر يعيش من دوني ... وانا اقول لك الطلاق يحصل وقريب وتراه كله كلمه وحده من زوجك

- اذا زوجك زعل منك لا تقولين ليش يسوي كذا وانا اللي ادلعه والبس له ودايم على الموضه وكل يوم مفرش وابخر الغرفه واجهز له ملابسه وووووو......
اجلسي مع نفسك واستهدي بلله وشوفي غلطك وين ؟؟ لا تاخذك العزة بالاثم يمكن زوجك ما يهمه تلبسين وترتبين السرير ووو كثر ما يهمه طريقة كلامك معه وقدر احترامك له ونظرتك له

- سوي الخير وارميه بالبحر ولا تتوقعين مكافاه منه .. جزاك عند رب العالمين

- زوجك وبيتك وعيالك غلفيهم بشيء من الخصوصيه عن كل احد حتى امك .. واذا صار عندك مشكله عندك اللي اكبر من امك واختك ومنتدى حواء و اللي هو رب العالمين

- اذارحتي مجلس نسائي خليك عاقله اسمعي واستمتعي بالسوالف بس اذا جيتي طالعه قولي كفارة المجلس وانسي انسييييي كل شي قالوه عن رجالهم او بيتهم او سفراتهم او لبسهم او او او
ولا تطلعين وانتي حاسه انك اقل من احد او ان زوجك ما يسوي لك مثل فلانه او علانه
وذلك للاسباب التاليه اولا انتي ما تدرين هي صادقه او لا ولو فرضنا انها صادقه اقول لك مافيه احد مرتاح وكل وحده لازم تضحي بشي
صحيح الطموح حلو بس انتبهي طموحك يدمر حياتك واعرفي تحطين لنفسك حد وتقولين لهنا وبس !!

يمكن كل الكلام اللي كتبته معروف وكثير منكم يعرفه او كتبوا عنه موااااااااضيع هنا ... لكن انا ارجع واقول لكم انه مو مجرد كلام ومواضيع !

وفيه كم عضوه كانوا يسالون عني بأستمرار احب اقول لهم انا بخير والحمد لله وبناتي وولدي معاي الله يبلغني فيهم وابوهم موافق على هالشي ومافيه اي مشاكل



وفي آخر الموضوع احب اشكر اختي ROMEE اللي حاولت تساعدني بمشكلتي
وجزاها الله الف خير

ووداعا يا بنات عالم حواء

هذه اخر مشاركه لي اتمنى يكون فيها فائده لكم