ما عليكم زود يا الربع انا انتخيكم يااللي تسون رز المزه وهو الاصفر وشلون تسونه لاني انا اسويه يكون طعمه مكرونه لكن اذا جبناه من المطاعم صار حبته حلوه توني شاريه كيس رز ابو بكر او ابو كاس ولكن بدون فايده الله يخليكم عطوني الطريقه والمقادير وطريقه الغسيل بليز اريد اتطعم طعم الرز الحلو من فظلكم

للاسف حبيبتي ماعندي فكره وما حبيت اطلع من الموضوع بدون فايده فحبيت ارفعه وان شاء الله البنات يفيدونك
هلا اختي.. انا بعطيك طريقتي

1_ اغسلي الرز زين لين ينظف ونقعيه من ساعه الى ساعه ونص ( ضروري يتنقع علشان تطول حبته )

2_ قطعي بصل واحمسيه مع زيت وضعي عليه البهارات العدله ( هيل + دارسين + ليمون اسود واذا تحبين القرنفل ضيفيه ) وقلبيهم مع بعض شوي

3_ اضيفي لهم حبة طماطم مقطعه مكعبات صغيره واذا حبيتي يكون لونه احمر زيدي ملعقة صلصه ( الأفضل بدونها ) وقلبيهم سوى لين يذبل الطماطم

4_ اضيفي قطع اللحم او الدجاج + الملح + رشة بهار وقلبيهم لين يتغير لون اللحم

5_ صبي عليهم الماء المغلي وخليهم لين يستوي اللحم

6_ بعد الاستواء طلعي قطع اللحم او الدجاج وحطيها في صينيه وحمريها بالفرن , واشخلي الرز من ماء النقع وضعيه على مرقة اللحم ( ارتفاع المرق عن الرز لازم يكون بحدود 1 ونص سم )وحطي على الوجه فلفل اخضر ( حبحر ) وغطي القدر وخليه على نار عاليه لين ينشف مويته ( بس انتبهي لا يلزق بقاع القدر ويحترق ) واذا نشفت المويه قصري النار وخليها واطيه مره ووزعي كشنة البصل على الوجه ( على حسب الرغبه ) وغطي القدر وخليه لمدة ربع او ثلث ساعه وبس قدميه

اتمنى اكون أفدتك .. وترى كل وحده ولها طريقتها بالطبخ بس اهم شئ لنجاح الكبسه هو نقع الرز لمده كافيه وكمية المرقع ماتكون كثيره على الرز ويعجن
اشكركم سر السواد وكالوري على التعاون بس يقولون انه اذا نظفتيه من الماده اللي على حبه الرز خلال التنقيع بيزبط معاك شلون اشيل الماده اللي على الرز
مافهمت وش تقصدين بالماده اللي على الرز !!!

انا اغسل الرز بالماء اكثر من مره مع تقلبيبه ودعكه على خفيف باليدين , لين تحسين ان المويه صارت تطلع صافيه بدون اتربه وشوائب


الساعة الآن 07:37 .