خالتي كبيرة بالسن شلون افهمها انها مو عاطتني استقلالية بحياتي

مساء الخير خواتي

انا اكتب لكم والحين 12 بالليل ماجاني نوم متضايقة والله،،

أدري ان بنات وايد يملون من المواضيع اللي تتكلم عن اهل الزوج أو اللي تتكلم عن زوجة الأخ

بس شنسوي يعني الزوج والزوجة لو بيدهم يكون عندهم بيت لهم ماراح يقولون لا بس ندرون ظروف الحياة شلون هالايام

الله يسلمكم راح اعطيكم نبذة عني طبعا عمري 22سنة تقريبا متزوجة من سنتين تقريبا ماعندي اطفال (مأجلين الانجاب بسبب دراسة الماجستير) عايشة مع زوجي في شقة منفصلة داخل بيت حمولتي،،

الحمدلله علاقتي بزوجي حلوة ومتفاهمين الله يدومها علينا، انا اشتغل الحمدلله وبديت هالكورس احضر الماجستير،،

انا مثل ماذكرت شقتي منفصلة وعندي مطبخ بشقتي طبعا يعني مو عوايدنا ناكل مع الحمولة يوميا ماعدى يوم الخميس لان تجمع العائلة، يمكن تقولون شتبي بعد اذا عندها شقة منفصلة؟؟ انا بقولكم وانتو احكموا يمكن اكون غلطانة او مكبرة الموضوع،،

المشكلة ان ام زوجي الله يحفظها دايما تجيني شقتي بأي وقت ، بما اني اشتغل طبعا اصحى مبجر والله انها مرة تجي لي الساعة7 ونص الصبح وتطق الباب وايد ومن خوفي ان اكو شي صاير افتحه لها،، بس هذا طبيعتها تصحى بدري وتنام من المغرب ما شاء الله،،

انا اوصل من دوامي الساعة 3 او 3 ونص تقريبا بشكل يومي تتخيلون شلون الوحدة لماترجع من الدوام اضافة الى ان الصبح طبعا وقتي ضيق ومايمديني الوقت انظف شقتي ،، هي لما ما تكون تعبانة تقريبا بشكل يومي تجي الساعة 4 شقتي وتطق الباب واليوم جتني 3 ونص الظهر كنت يا دوب واصلة من الدوام وصليت مافتحت لها الباب وقتها ،، أيام اجازتي طبعا مودايما يكون زوجي اجازة احيان على مزاجها تجي لي تطق علي الساعة 9 الصبح واحيان كثيرة تجيني الساعة 2 او 2 ونص يعني على مزاجها،، المشكلة انها توقف تطق وتطق مدة طويلة وانتوا عارفين يعني احيان اكون نايمة ولا ولا يعني وقت راحة ومو مستعدة يعني،، وبعدين اذا شافتني تتشره علي اني رحت لك وطقيت وطقيت

طيب حتى شهر رمضان صوم ودوام ، طبعا في رمضان ارجع الساعة وحدة ونص كنت احيان تجينا العصر وانا اطبخ وانفخ او توي قاعدة من النوم واحيان تجينا بعد الصلاة مباشرة اثناء تجهيز الفطور طبعا هي ما تاكل معنا بس تتفرج يعني ولما اكون عاملة خفايف بس ع الفطور يتغير وجهاا وتعلق على الفطور،،

ما ابي الخوات يفهمون اني ماحب خالتي ومابيها تجيني لا بالعكس واصلا انا بشكل يومي اروح لها الا لما اكون تعبانة او عندي مذاكرة بس هي الله يحفظها ما يمديني ارجع من الدوام اشوف اغراضي اشوف نفسي الا هي سابقتني وجاية احيانا تجي وانا توي راجعة من الدوام 3 ونص تقريبا وتجي تقعد وتشرب شاي وتسولف للمغرب طبعا ان اجاريها بس اتضايق يعني لو انها تجي الساعة 4ونص او 5 ع الاقل يمديني ارتحت،،

اليوم كنت معاها وكنت متصلة على بنتها طبعا بنتها متزوجة موظفة بس ترجع قبلي الساعة 2 كنت داقة عليها الساعة 4 ونص وماردت ( طبعا بنتها اغلب شي اذا ترجع من دوامها تنام لي العصر) الا تقولي خالتي اي اكيد راجعة من الدوام اكيد بتنام اكيد نايمة الحين ... انا وقتها انقهرت... يعني بنتها تشتغل فيصير لها تنام وانا اشتغل والله احيان يدوب يمديني اصلي الا وهي جاية لي وانا اكون تعبانة وابي ارتاح وانام:(

والله عجزت اشكثر اقولها كنت نايمة كنت نايمة بس ما تفهمها وترد ترجع تتشره علي يعني بناتها عادي ينامون الصبح ولا الظهر ونا مو من حقي لازم باب شقتي يكون مفتوح 24 ساعة ؟؟ اذا ما فتحته تتشره علي وتحسسني بالذنب وان انا متعمدة او ما ابيها ،،