تحمدو لي على سلامتنا ... و واسوني ...

بسم الله الرحمن الرحيم ..


اشحالكم عزيزاتي ...

ما بطول عليكم وبدخل في الموضوع على طول ...

أنا عندي ليسن و دايما أسوق ويا ريلي ... ونحن رايحين الدوام يخليني اسوق نوصل ولدنا اول شي وبعدها اروح انا على دوامي وبعدها يركب هو ويكمل مشواره لدوامه ..

المهم هالاسبوع صادف انه يكون دوام زوجي مسا ...

وهو كل يوم الصبح يروح وياي يوصلنا ... أنا أسوق دايما بس بعد ما اوصل يركب هو ويرجع بالسياره البيت ..

والحمدالله انا حريصه جدااا و ادقق في الشارع عدل ورا وجدام و جنب و كل كل شي حتى تحت ..:22:

بس مشكلتي بطيئة مش في السواقه لاااا .. في اللفات مثلا وفي التحويلات .. وأماكن الانتقال عموما ...
:09: وطبيعي بكون بطيئة لاني أدقق عشرين مره في الشارع ...:eek:

وهالشي اللي أزمني وأزم زوجي وياي ... كله يباني أزيد سرعتي و أمشي حالي على السريع ...

لانه شوارعنا ما شاء الله زحمه ..

المهم أمس بالليل كنا سهرانين أنا و زوجي للساعه 3 و نص ..
والصبح يوم أقومه علشان يودينا ما قدرت عليه متكاااااسل يقوم من التعب ...

فقلت له خلاااص انا بطلع بروحي انا و ولدي اوكيه .. قاللي اوووكيه ..

طبعا هو قالها لانه يبا يرقد بس هو أصلا أبداااااااا ما يقبل اني اطلع بروحي شو ما يكوون ..

أحين اهني بدت المشكله ....

رحت وصلت ولدي و وصلت الحمدالله دوامي بتمام الصحه والعافيه ..

ويوم كنت طالعه مريت على ولدي وخذته ... مدرستين عنده تفاجؤا يوم شافوني أسوق على بالهم اني ما أسوق ...

قالولي انتي عندج ليسن ...قلت حقهم هي عندي ليسن بس ما عندي سياره هاي سياره زوجي ....

فقالولي انتي محظوظه لانه عندج ليسن .. نحن أمنية حياتنا يكون عندنا ليسن ...

و وحده فيهم ضحكت وقالت عاد انا فاقدة الأمل لانه زوجي للحين ما عنده ليسن رسب ثلاث مرات وبعده يحاول ...:22:

عاد أنا نفخت ريشي ... بس الظاهر اني نسيت انه العين حق وكان المفروض أقولهم قولوا ما شاء الله ...

الله أكبر عليهم .... ما أدري عاد من عينهم والا حكمة ربي ...

المهم بعد ما شلت ولدي و رحنا بنطلع من لفة فرعيه على الشارع الرئيسي كان الشارع فل مزدحم من الخاطر ..

وعاد أنا طفرت وانا أتريا حد يعطيني طريج علشان أدخل في الشارع الرئيسي ...

عاد في واحد مسوي عمره شهم وقف حقي وياااااااا دوب توني أطلع الا أشوفه الحيوان داااااس مره وحده ...!!

و طبعا خبطته ... اصدمنا ببعض بس اصطدام خفيف ... تكسرت الليت الأماميه لسيارتي و اشويه من المدعميه ...
وهو انشمخت سيارته من الجنب وانشل الربل الجانبي اشوي ...

بس عموما يطلع الغلط علي ... لاني طلعت حتى لو هو كان حيوان وعطاني درب كان المفروض أتأكد انه ما بيتحرك من بعد ما وقف لي ...

و طبعا نزل من السياره و شيك على سيارته وشافها ومسك تليفونه محتار يتصل او لا ...

نزلت له الجامه و طبعا ما نزلت أشوف شو صار بسيارتي ... استحيت انزل في الشارع ...

و قلت الله يسامحك ما انت عطيتني طريج ليش مشيت جذه بسرعه مره وحده ... قال والله افتكرتك ما راح تمشي ...

سبق وقلت لكم اني بطيئه في الانتقال وهاي فعلا مشكله ...!!!:eek:

عاد أنا أعرف انه لو يت الشرطه بتحط الغلط علي ... وبعدين فشله حرمه تروح مركز الشرطه و تخطيط ومخالفات و و و و ....

وفوق هذا كله نحن عدنا قانون مصخره ايديد .. النقاط السوده ... سود الله و يه اللي سواه ...:angry2:

فقلت له يا أخي ما صار الا كل خير بعطيك 500 درهم و خل نمشي ....

قال لا ما بينفع هيك لازم أبلغ الشرطه ... قلت له الله يخليك أنا حرمه ما أبي فضايح و شرطه و الناس بتلتم علينا ..

خل انسوي الموقف وديا ....

قال ... واذا التكسير هاد جاب فوق الـ 500 ... قلت له شوف سيارتك اصلا والله ما بتييب حتى 500 ..
كلها شغلات بسيطه جدااا ... وهو طبعا يعرف انها شغلات بسيطه بس يستهبل علي ...

قال طب خلاص عطيني 1000 درهم و بمشي ... قلت له والله ما معي ألف درهم عندي 500 وبس و كم عشره أمشي حالي فيهم ....

قال طيب لحظه اشوي بس بشوف ...

رجع يشيك على سيارته مره ثانيه ... وهو بداخله يراجع نفسه لانه هو الربحان بكل حال ....

بس طبعا أنا قلت له 500 لاني أعرف انه لو الشرطه ياتنا بتكلفني فوق الـ 2000 بعد ....

تصليح سيارتي و سيارته و الغرامه و المخالفات و النقاط السوده ..... :09:


والله حسيت اني صج بصيح .....

مب علشان السياره ... بس لأني ما حبيت أنحط في موقف مثل هذا وخاصه انه ويهي بيروح جدام زوجي ...

هاي أول مره أطلع فيها بدونه ويستوي لي هالشي ..... وبعد ما صدقت أقنعه يطلع لي سياره .... شكله بيغير رايه ...:(


الحمدالله بعد ما اقتنع الريال عطيته الــ500 وتوكل على الله ....

و حسيت اني صج ارتحت ...

عاد ياتني البلوه الثانيه .... كيف أقول لريلي ؟؟؟؟

أنا لحزتها ما كنت أعرف شو صاير بالسياره بالضبط لاني ما نزلت بس طليت من الدريشه ...

ويوم وقفت السياره في البيت نزلت أشيك عليها شفت انها متكسره اشوي من جدام .....

حسيت اني بصيح ولا أقول لزوجي .....

بس ما في حل أصلا غير اني أقول حقه .....

دخلت البيت وشفته قاعد على النت .... سلمت عليه و قلت له قول حقي الحمدالله على السلامه ...

قاللي الحمدالله على السلامه ... وهو مب على باله شي بالمره ..

ولا حتى صد علي ..

قلت له سامحني تراني سويت حادث بسيارتك .....اهني عاد فتح عيونه .... سألني صج ؟؟؟

قلت له ..هي ... سألني عاد كيف صار الحادث .. وكان يرمس بهدوء مميت ... ( هدوء ما قبل العاصفه ) ...

حكيت له اللي صار ....... وسكت أبدا ما علق ......

قلت له ما بتروح تشوف السياره ... قال بهدوء .. شو أشوف فيها ...

والله حسيت اني صج انحرجت منه ......مب عارفه كيف أتدارك الموقف ....

وقلت له تراني سويت الموقف ويا الريال .... عطيته 500 ومشى ..

قاللي على شو تعطينه 500 ؟؟؟ قلت له تراني بعد الغلطانه و لو يات الشرطه تخطط بيطلع الغلط علي 1000%
وبعد بتطلع علي شغلات ومخالفات ونقاط و و و ... أنا بغنى عنها ...
و غير جذه ما حبيت أوقف في الشارع وتينا الشرطه .... وترى بعد سيارته تعورت ويبالها تصليح ...

المهم سكت عني وقام لبس ملابسه وسويت له على السريع سندوتشتين و عطيته لبن و الحمدالله انه شلهم و طلع ....

وبعدها بخمس دقايق اتصل بي وقاللي اذا حد سألج عن السياره لا تقولي له انج انتي ...

لانه أخوي شاف السياره و سألني وقلت له اني دعمت واحد بالغلط من غير ما أنتبه ... عديـــــــــها ..


فقلت له تراني صج مب الغلطانه هو عطاني طريج والله ..... فقال أنا أعرفج بطيئة لين تطلعين ...

وبصراحه والله وااايد منحرجه من موقف زوجي .....

واللي مخليني أنحرج أكثر انه ما هزبني ولا قاللي أي كلمه ...سكت و كلمني بهدوء فظيع ينم عن غيظه العظيم ..


وأخيرا ....

أتمنى تواسوني و تقولولي كيف ممكن أهدي من زوجي وأخليه يسامحني من قلبه ..!