ابي مساعدتكم لسفرللامارات

انا مثلك ابي اروح لللامارات وياليت البنات يفيدونا

السكن هو الغالي اما المطاعم والاسووواق نفسنا

شوفي يالغالية

السكن غالي حتى في الشارقة وصل الغلا بالسكن
بس بخصوص المطاعم لا طبعا على حسب نوع المطعم ماشاء الله المطاعم انواع واشكال فيختلف طبعا

اما الاسواق على حسب شو نوع الهدايا الي تينها

تبين ملابس وشنط احذية (الله يكرمج) هذا تلاقينه في منطقة نايف يعني سوق نايف القديم بس الحين السوق احترق لو سمعتي عنه في شهر 4 بس المنطقة الي موجوة في اكسوارات واحذية وشنط وغيره اقصد المحلات الي كانو بجانب سوق نايف بس سوق نايف الجديد في منطقة قريب من السوق القديم يعني لو سألتوا اي احد هناك بيعرف وبيدلكم وطبع في سوق نايف ملابس وشنط واشياء وايد

اما بخصوص سوق مرشد هذا يالغلا اكثر شئ في للمطبخ يعني دلال وفناجين وصحون (اشياء فخمة وروعه) فيه بعض المحلات هناك فيها عطورات وجلبيات يعني فيه اشياء حلو الاسعار مب لذاك الزود غالي يعني على حسب السلعة فخمة طبعا غالي

اما التنين انا طبعا سمعت عنه بالاول والكثير يقول انه رخيص بس والله اعلم سألت مرة ربيعيتي عشان اروح له قالت بالاول كان اسعاره رخيصه بس الحين غلى الاسعار اما البضاعة الي فيه اغلبها للبيت من مواعين للسيارة ومافي كثير حق ملابس واغلب المنتجات شكلها صينيي >>> هذا للعلم انا مارحت له هذا وصف ربيعيتي

وعندج مركز المنال في دبي طبعا في منطقة نايف
وعندج في الشارقة مركز سارة والمحلات الي في سوق الشارقة القديم صحيح اسعاره شوي غالي بس في الاخير نقص لج وملابس بصراحة روعة

وإذا عندج اي سؤال انا حاظرة
بس يكون الافضل ارسلي لي رسالة لاني هالقسم مادخله واول مرة بصراحة دخلته اليوم وعلى حظج

وربي يوفقج ان شاءالله وييسر سفرتكم يارب

حبيبتي أنا رايحة دبي قريب للمرة الثالثة ماشاءالله

أتمنى ردي يفيدك
وكل اللي ابغاه منك و من كل اللي يستفيدوا من ردي , دعواتك لزوجي بالتوفيق في حياته العملية , و ان الله يتمم حملي و ولادتي على خير ...

بالنسبة للتذاكر
حجزنا عن طريق طيران الخليج , من البحرين الى دبي مباشرة
سعر التذكرة للكبار 890 ريال ... للأطفال 760 ريال
مجموع تذاكرنا 3300 ريال تقريبا .. أنا و زوجي و اولادنا الاثنين

بالنسبة للسكن

احنا مثلك كنا متخوفين بالنسبة للسكن و الغلا خصوصا اننا بنجلس 6 ليالي ... و مشكلتنا ما نحب السكن يكون اي كلام , يعني لازم يكون نظيف و فخم و موقعه ممتاز ....

حجزنا في فندق دوست و طبعا فخم جدا و غني عن التعريف , و كانت الليلة 1200 ريال للسويت الغرفة ...

و بعدين الحمدلله الله وفقنا و لقينا سكن ممتاز جدااا و سعره جدا رخيص لأنه جديد و عندهم عروض ... و مجرب من صديق زوجي اللي سكن فيه مع عائلته في شهر جولاي ...

تخيلي الفرق في السعر !! يعني كنا بندفع 7 آلاف ريال للسكن , و ألحين بندفع 2400 ريال بس ...

السكن شقق فندقية أربع نجوم و موقعه في بر دبي , يعني قريب من كل شي , قريب من مجمع برجمان , و من شارع زايد و من الجميرا ...

اسم الفندق : xclusive hotel apartment
و هو من الفنادق الجديدة الأربع نجوم في بردبي

حجزنا معهم شقة غرفة و صالة و مطبخ و حمامين بـــ 450 درهم في الليلة , و الشقة الغرفتين أعتقد بــ 650 درهم , طبعا هالأسعار بدون الفطور ... سعر الفطور 20 درهم للشخص ...

بس ما عندهم مطعم يعني الفطور في الغرفة
(Room Service)

عندهم غسالة ملابس في الشقة , تلفزيوناتهم ال سي دي (فلات) و فيه جهاز دي في دي ....

و عندهم حمام سباحة ونادي صحي و جليسة أطفال و خدمة تنظيف الغرف و غيرها من الخدمات ...

ادخلي على موقعهم و بتلاقين صور للغرف و وصف لخدمات الفندق
www.xclusivehoteldubai.com

و فيه شقق فندقية بنفس المواصفات اسمها
kirklees hotel apartments

نفس مواصفات الفندق اللي قبل , بس اسعارهم 50 درهم زيادة
يعني شقة غرفة و صالة ومطبخ بـــ 500 درهم
و الشقة غرفتين و صالة ومطبخ بـــ 700 درهم
و نفس الشي بدون فطور , بس فطورهم بــ 40 درهم للشخص و أظن عندهم مطعم
و هذا موقعهم
www.kirklessdxb.com

و عموما الفطور مو مشكلة , سوبرماركت سبينيز قرب جداااا من هالفنادق و ممكن تشترون لكم فطور كامل و تسوونه في مطيخ الشقة و تاكلون على راحتكم بدون ما تلتزمون بموعد محدد

و اذا حبيتي تسكني في أبراج الجولدن ساندز فهي نفس الشي اربع نجوم , أوسع و أكبر من الفنادق اللي قبل , لكن اثاث الفنادق اللي فوق أفخم لأنها جديدة ,

و المهم انك اذا اخترتي الجولدن ساندز أهم شي تسكنين في البرج العاشر لأنه أجدد شي , أما الأبراج الباقين شققهم قديمة

بالنسبة للتنقلات
الأفضل استئجار سيارة من المطار فور الوصول , و الاعتماد على الخريطة , و كل شي في دبي واضح بالخريطة ... استئجار السيارة الصغيرة لأربع أشخاص مثلا يكلف 100 ريال يوميا ... سعر جدا مناسب ...


بالنسبة للمطاعم

مطعم صدف في شارع المكتوم مطعم ايراني و شرقي رووووعة و عندهم بوفيه

و فيه مطعم حاتم موجود بمعظم المولات , نفس الشي ايراني و لبناني شرقي و لذيذ

و فيه مطعم ايطالي في مجمع ابن بطوطة حلو و اسعارة حلوة

و اذا بغيتي مطاعم فخمة , فيه مطاعم الفنادق و خاصة منطقة الجميرا .. سمعت عن مطعم المنى في فندق ميناء السلام يقولون حلو و قعداته خارجية و داخلية .. و سعر البوفيه عندهم أعتقد 180 ريال للشخص ....

و عموما المطاعم متوزعة في المولات و ماراح تحتاري و الاسعار تتفاوت

و بالنسبة للمجمعات


طبعا المجمعات المعروفة ابن بطوطة , مول الامارات , برجمان , سيتي سنتر , فستفال سيتي و غيرها ...

بس لو بغيتي بضائع مخفضة لا تفوتي دبي أوتلت Dubai Outlet.. و هو مجمع كبييييير خاص بالبضائع المخفضة و فيه معظم الماركات المعروفة باسعار مخفضة ...

سوق التنين ما رحته و مو ناوية اروحه لأني ما أحب البضائع المقلدة , مع انها يقولون ان فيها اشياء ثانية حلوة غير التقليد بس ما ودي اضيع وقتي ...

بالنسبة للأماكن السياحية


اذا حابة تروحين الوايلدوادي ,و هي حديقة مائية حلوووة و ممتعة ... فيه الليلة الخاصة بالنساء كل يوم خميس من الساعة 9 مساء الى الساعة 1.. (أربع ساعات) خصوصية تامة للنساء و يسمح لدخول الأطفال الذكور فقط 8 سنين و تحت , و يطلبون منك اثبات عشان يتأكدون من عمر الولد
, أنا عجبتني كثير و خليت حجزنا يكون فيه يوم خميس علشان ألحق اروحها
اسعارها 165 درهم , و فيها مطاعم و جلسات , و يأجرون خزائن لأغراضك الشخصية أظن بــ 50 درهم


و فيه سكي دبي , عالم ثلجي روووعة في مول الامارات و تجربة جديدة و حلوة ماراح افوتها , تندمت إني ما جربتها آخرمرة رحتا دبي و هالمرة أكيييد راح أدخل
فيها قسمين , الحديقة الثلجية , و التزلج على الثلج من على منحدر , رسوم الحديقة الثلجية أرخص تقريبا 80 ريال للشخص و هي الأنسب للي ما يعرفوا يتزلجوا و مناسبة جدا للأطفال ... الرسوم تشمل ملابس شتوية لأن درجة الحرارة تصل الى 6 تحت الصفر و يمنع دخول الأطفال تحت الثلاث سنوات ..

فيه حديقة الخور اللي فيها مدينة الطفل و هي مركز استكشافي , و فيها تلفريك و قطار لأخذ جولة في الحديقة ,و فيها عروض الدلافين و هاذي جديدة توها السنة فتحوها , العرض يستمر ساعة و الرسوم غالية 120 للكبير و 100 للصغير ... لكن يوم الاثنين بأكمله و الجمعة الصباح يكون فيه تخفيض يصل الى 30 درهم فقط للشخص

مدينة مدهش طبعا رائعة للأطفال و هي موجودة في معارض المطار

فيه باخرة الباتو , عشاء رومانسي في رحلة بحرية مغلقة و مكيفة لمدة ساعتين , لكن غالية أظن بــ 280 ريال للشخص

و فيه رحلات بحرية أرخص منها أظن اسمها البوم

فيه الباص البرمائي اللي ياخذ جولة في دبي بحرا و برا , حلو و اسعارة حلوة أظن بـــ 90 ريال للشخص

و طبعا فيه سوق الجميرا , و هي سوق شعبي على مستوى راقي في أفخم و أغلى منطقة في دبي ... و المقاهي و المطاعم اللي على النهر الاصطناعي , هاذي روووعة خصوصا بالليل

و فيه أماكن كثيرة في دبي , عشان كذا خلينا رحلتنا 6 ايام علشان ناخذ راحتنا و ما نحس اننا ملحوقين

أتمنى أكون أفدتك حبيبتي انتي و كل بنات المنتدى

و أهم شي تسوين بحث عن كل شيء قبل لا تروحين عشان تكونين متأكدة و لا تعتمدي على راي واحد ... وتنسيق الرحلة مهم جدا عشان تكون ناجحة ....

بالتوفيق .... و ان شاءالله تنبسطي و تروحي و ترجعي بالسلامة

ماشاء الله عليج اختي امينه شرح وافي

احس اني سافرت معاكم

ههههههههههههههههههههه


الله ييسر لكم ويخلي لج زوجج ويقومج بالسلامه