بسم الله الرحمن الرحيم
السلام عليكم ورحمه الله وبركاته
اخواتي الغاليات راح اشرح لكم شيء مضيق صدري وخايفه منه
انا في يوم من الايام بعد وفاه والدي استلمت مبلغ وهالمبلغ عباره عن جزء بسيط من ورثي كان تقريبا 300 الف ريال
وشغلته بالاسهم..وصار تقريبا مليون ريال بضرف سنه واربع شهور
ولكن بعد انهيار الاسهم والله لم يتبقى لي الا 30 الف ريال الحمد لله على كل حال
بالاضافه اني غير موظفه وزوجي ايضا غير موظف..ونفس الشي يشتغل بالاسهم
ووصل تقريبا لسته مليون وبالانهيار وصل تقريبا 300 الف ريال طبعا الي يعرف انهيار الاسهم اكيد بيصدق..
المهم انا وزوجي مضطرين نسحب من هالقرشين عشان نصرف وخاصه اننا عندنا طفلين وحملت وجبت الثالث من شهرين فكانت مصاريف تطلع بس مافيه مدخول بدال الي نطلعه صار الحين هو يملك180 الف ريال وزوجي مو صغير تقريبا عمره 45 سنه يعني ما اعتقد بهالعمر بيحصل وظيفه واصلا مافي وظايف وانا الحين الي املكه تقريبا 19 الف ريال
طبعا زوجي يبيع من اسهمه ويصرف لكن للاسف هو متعلق بارقام خياليه..
وانا ماعاد تفرق معي الايام الي راحت صرفت بالهبل مو دلع لا والله مستشفيات وولاده واشياء مالها اول ولا اخر
طبعا بتقولون وش تبين؟؟؟؟؟؟؟


ابقولكم انا صرت خايفه زوجي من تقريبا سنه ماعطاني مصروف وانا متعاطفه معه وقاعده اسحب من هالقرشين الي عندي وامشي حالي بس الى متى؟؟

والي يقهر اني لا انا ولا هو من عوائل متوسطه بالعكس زوجي ابوه ملياردير بمعنى ملياردير مشهور عالميا وليس عربيا فقط..لكنه للاسف استحاله يساعدنا بسبب انه متزوج اربعه وعيال الزوجه الاولى مسيطرين على كل شي..
ولو يشوفنا نشحت يمكن ينبسطون والقهر انهم واصلين يعني ممكن بمكالمه اتوظف انا وكل من اعرف وجربت وكلمتهم لكنهم بلعكس احتقروني وصارو حتى مايردون على مكالماتي..وزوجي كان يقولي لاتكلمينهم ماراح ينفعونك..انا ابخص فيهم اخون ابو...

والشي الثاني انا بعد اهلي اثرياء وابوي توفى من فتره خمس سنوات استلمت اول مبلغ الي قلت لكم عليه وبعدها قفلو على كل شي اخواني..طبعا نزاع اشقائي واخواني من ابوي..
طبعا اخواني واشقائي كلهم يطخون ويتمتعون بالحلال وحنا يالبنات ياغافلين لكم الله...
ولو اخذت ورثي كان اقلها قدرت افتح مشروع لاني شاطره بالصالون وكنت سابقا مديره مركز مشهور نسائي بس استقلت بسبب ان صاحبه المشغل كانت تغش الناس..ووقتها ماكنت محتاجه بقدر اني ابي اشغل نفسي
وبالفعل انا لما مسكت المشغل او المركز النسائي كان صغير وبسبب اهتمامي وافكاري اشتهر لدرجه ان صاحبه المشغل للحين تتصل علي وتستشيرني..وفعلا تطبق كلامي..والحين ماشاء الله تبارك الله شي لايوصف..


المهم كثرت الهذره يلله اعتبروه فضفضه انا ابي استشيؤكم وش مفروض اسوي الحين
قدمت بالمدارس الاهليه وكلهم مابغوني معي ثانويه عامه ودورات كميوتر وش كثرها.. بس ولا شي
قدمت في البنوك وكلهم بالعربي قالو عندك واسطه لو معك متوسط ماعندك ماتلزمينا..

ابي اعرف وش اسوي من جد صرت اخاف لاني قادره اطلع حلالي من اخواني بالاظافه ان الموضوع صار فيه محاكم وشكل الحكايه مطوله خمس سنوات راحت ماشفت شي ولا ابو زوجي متعاون وحاول زوجي معه انه يساعده او حتى يوظفه بشركته وطرده اكثر من مره بسبب خوفه من عياله الكبار..

ابي اسوي شي يدخل لي مبلغ اقلها اقدر اوفر اغراضي واحتياجات عيالي..لايروح فكركم بعيد انا ما اشحت بس من جد ضاقت بي ابي اعرف وش اسوي بزمن صار فيه الرز ب380 ريال بعد ماكان ب120 ريال..؟؟
شي يخوف؟
ماني قادره اصير مندوبه مكياج وعطور واشياء زي كذا لاني ما اعرف لهالاشياء..

هل فيه حل ولا اضف عفشي وامشي...خخخخخخخخخخخ


الي ابيه افكار منكم شي ممكن اسويه مع اني عارفه اني ماراح احصل حل بس احس اني ارتحت اني تكلمت وكتبت عن شي مسبب لي رعب..
مع اني بعد ماكان ودي احد يعرف عن ضروفي خاصه اني معروفه بكثير من المنتديات...

الله يكون في عونك يا اختي
والله يسخر لكم انتي وزوجك ويهدي اخوانكم
ياليت عندي حل كان عطيتك
بس ليش زوجك مايشتغل في شركة ثانية (ويخلي سوق الاسهم اللي محد صاد منه خير)
لأنه هو المسئول عنكم
وممكن يدخل رجال الدين او المشايخ المعروفين بينه وبين اهله ابوه واخوانه
وقدمي على المشاغل يحتاجون مديرات بخبرة مثلك
واكثروا من الدعاااااااااااااء
والله مافيه مثله واسألوني
والواحد بدون مايلجأ لربه كل اموره بتتعسر
وربي وحده يفرج الهم
وتأكدي ان كل ضيق وراه الفرج باذن الله
كان الله فعونك ياقلبي
واذا خطر لي شي قلتلك
اذا عمل رجل ما بلاهة ما يقولون :ياله من رجل أبله
واذا عملت امرأة ما بلاهة ما يقولون : يالبلاهة النساء

كل امرأة تعتقد ان هناك طفل واحد رائع "هو طفلها"
وكل رجل يرى ان هناك زوجة واحدة رائعة "هي زوجة لرجل آخر"
عيوني عندي لك فكرة .

شوفي مشغل ثاني بسيط بس له مستقبل و اتفقي مع صاحبته و خبريها عن المشغل اللي من اول قومتيه .

او ادخلي شراكة مع مشغل متواضع او حالته حاله و طلعيه للسطح مادام هذي خبرتك .

زوجك لازم يدور على اي حاجة يشتغل فيها

يا اختي الشباب السعودي الحين صار سائق ..

لقمة العيش ما يمكن تجمعينها من خطوة .

تحتاج مثابرة وتنازلات وتهميش للمركز والمستوى .

و ابني نفسك حبة حبة .





اقتباس مشاركة  (داليا للهدايا)
عيوني عندي لك فكرة .

شوفي مشغل ثاني بسيط بس له مستقبل و اتفقي مع صاحبته و خبريها عن المشغل اللي من اول قومتيه .

او ادخلي شراكة مع مشغل متواضع او حالته حاله و طلعيه للسطح مادام هذي خبرتك .

زوجك لازم يدور على اي حاجة يشتغل فيها

يا اختي الشباب السعودي الحين صار سائق ..

لقمة العيش ما يمكن تجمعينها من خطوة .

تحتاج مثابرة وتنازلات وتهميش للمركز والمستوى .

و ابني نفسك حبة حبة .
الله يستر مدام السعوديين صارو سواويق والسعوديات بيصرون خادمات
والبترول يطلع والاسهم تنزل والعالم تسدد قروض والميزانيه للدوله فوق الخيال
وين الخلل؟؟
شي تعبت وانا افكر فيه...بس الخلل معروف وين بس للاسف
احنا شعب لانسمع لانتكلم

بس زوجي اعتقد صعب يشتغل الحين بعد هالعمر هو مو قادر يتقبل هالفكره وانا مو قادره افرض هالشي عليه
لان قلبي يعورني خاصه ان اخوانه كلهم والله بثراء فاحش ومو من جيبهم من فلوس ابوهم
وهو الجدار القصير...
فما ابي اكون انا والزمن عليه..
وراكم ما شريتوا عمارة بقريشاتكم الي معكم ؟؟

تدخل عليكم

اذا معكم قيمة عمارة اشتروا تراها والله تفك ازمات بالاجارات الي بتدخل عليكم



الله يوسع عليكم وعلى جميع المسلمين بالحلال والعافية
لا اله الا اله محمد رسول الله


الساعة الآن 02:10 .