المكان : مملكة عالم حواء
الزمان : قبل ثلاثة أيام من موعد الحفل الذي يقيمه عالم حواء لعضواته عروس لابن الملكة المدلل الفارس الوسيم >>> مناحي <<<
الفارس الأمير مناحي ابن ملكة عالم حواء
مناحي شاب وسيم يجمع كل صفات الجمال والوسامة، فالشعر أشقر، والعيون زرقاء مثل حسين فهمي، والعضلات مفتولة ولا أطلق مصارع كان يطلع في المصارعة الحرة بالتسعينات على تلفزيون السعودية الثاني، رشيق الجسم، جميل الوجه، فارس مغوار لا يهاب الأسود ولا القرود، يقاتل الأعداء وينتصر عليهم، يتصدر الجيوش في المعارك، سيفه ولا سيف عنتر بزمانه. مثقف محب للتاريخ والعلوم، يقرض الشعر ولا أحسن حيوان قارض بالأرض كلها، خريج جامعة اكسفورد، حاصل على درجتي الماجستير والدكتوراه من جامعة هارفارد.
طبعاً كل الكلام اللي فوق كان حسب ما سمعت عنه من الناس اللي يعيشون في قصر الملكة ويخدمون هناك، وكل البنات العانسات أقصد الآنسات اللي مثلي سمعوه بعد، لأن ولا وحدة فينا دخلت القصر من قبل وشافت الفارس المملوح مقطع قلوب العذارى >> مناحي <<
دعوة الحفل
كان نص دعوة الحفل والتي أرسلت لكل عانسات عالم حواء >>> سوري أقصد آنسات عالم حواء واللي أنا وحدة منهم <<< كالتالي :
يسرنا دعوتكم لحضور الحفل الذي تقيمه الملكة على شرف ابنها الفارس المغوار اللي هزم التتار وحارب الاستعمار >>> مناحي ولد أمه <<< وذلك لاختيار العروس التي تليق به وبجماله وحسنه ودلاله وحبة خاله، وتناسب مركزه ومكانته المرموقة وأصله النبيل وحسبه ونسبه الأصيل.
الداعية
ملكة عالم حواء
أم مناحي المزيون
ملاحظة : يرجى عدم اصطحاب الورعان أو الموبايلات أم كاميرا.
بيتنا
طق طق طق >>> صوت باب بيتنا ينطق
افتحت الباب زوجة أبوي الظالمة وطلع اللي بالباب مرسول من القصر علشان يوزع الدعوات للحفل على كل بنات عالم حواء
ههههههههههههههههههههههههها >>> ضحكت زوجة أبوي بهستيريا
وصوتت لبناتها خواتي من أبوي
يا دلال ! يا رقة، يا دلال ! يا رقة!
وجع وينكم فيه ؟؟؟؟
طبعا راح أعطيكم C.V. مختصر يعني السيرة الذاتية للبقر قصدي للبشر اللي انا عايشة وياهم في بيت واحد :
زوجة ابوي : حيزبونة شيزبونة مغرورة وشايفة نفسها على الطل، ام السعف والليف تطلع عندها مس لبنون وحمارة القايلة تصير جمب شرها هايدي، قصت على ابوي وخذت حله وحلاله واستولت على امواله وبعدين قطته بدار المسنين.
دلال : الوجه نعال، والخشم فيه ثالولة كبر الفيل تسميها حبة خال، تقرى الفنجال، وتكت فال، براطمها مثل اسماعيل ياسين واهي على بالها سامية جمال.
رقة : الجسم شقة، وكل يوم امصبحة وامسية عيال الجيران بطقة، تاكل الاكل اللي البيت كله وتقول لازم كل واحد ياخذ حقه، وتقول ما راح اتزوج الا واحد يشبه أحمد السقا.
طربخ طربع دادددع >>> صوت اقدام خواتي الحلوات الرقيقات وهم يهبدون بالسلم قصدي ينزلون منه
ها شنو تبين يما >>> خواتي الحبيبات
ووجعاه حتى وجعاه انزلوا بس وتعالوا ابيكم بمويضيع >>> زوجة ابوي
دلال قالت اكيد وافقتي اني اسوي تفخ حق براتمي صح صح
براتمي وانتي اللي عندج براتم، انتي حتى تواير الجمس اصغر من براطمج ، تبين تسوين تفخ ونفخ بعد، والله عقلج اللي يبيله تفخ مو براطمج. انا ما ادري على منو انتوا طالعين عليه جياكر جذيه اكيد على ابوكم الا اكيدين بعد ولا انا نانسي تغار مني.
تسوووووووو >>> هذا صوت الصاروخ اللي طلع بعد كلام زوجة ابوي المذكور اعلاه
قالت لهم السالفة بالتفصيل مو الممل الا اللي يزهق ويغث ويطلع الروح بعد
وناصة، وناصة هيه وناصة >>>> المقرودة رقة واهي تناقز فوق وتحت لحد ما تسببت بزلزال عجز عن تحديد قوته مقياس ريختر وانكسر وخرب وبغت تهدم البيت بس ربكم ستر
دلال قالت : مامي ما يمدينا نخلس شغل بـ 3 أيام ورانا روحه للسوق علشان النفانيف ، وروحه للسالون علشان الحف والشيرة وغيره وغيره وايد اشياء
هههههههههههههها >>> ضحكت زوجة ابوي ضحكة تهزهزت لها جنبات كرشتها الواصلة لحلقها
اذا على النفانيف سهلة انا اساساً موصية المصمم جورج مطلق على نفانيف لنا من اسبوع علشان ملجة ولد خال عمة ام جارة بيت جدي، كل واحد بـ 000 20 دينار، مع اكسسوراته، واليوم المفروض استلمهم، راح اطرش حوريو الجيكرة علشان تجيبهم، وتمر بطريجها الحواج وتجيب منه الشيرة والصوابين والزيوت علشان اهي اللي راح اتسوي لكم كل شي بنفسها، ليش المخاسير وفسفسة الفلوس والتبذير حرام.
واهي بعد اللي راح تسرح شعوركم وتمكيجكم بعد.
طبعا الخبر نزل علي كالصاعقة التي وقفت كشتي من شدة قوتها، لأن شعر خواتي ليس كأي شعر بل ان سيم المواعين حرير عنده، ووجوه خواتي ليست كأية وجوه بل هي برٌ أجلحٌ أملحٌ تكثر فيه التضاريس والوديان. ولكن لا مفر من ذلك فأنا لست سوى خادمة تعمل لديهم لا أخت لهم وقد اعتدت على الشقاء والتعب، وقد رأيت ألوان العذاب كلها من زوجة ابوي وابنتيها، لم تترك لونا الا وأرتنياه فوشياً كان ام فسفورياً او حتى مخططاً وفيه زري على الطرف
لا مفر من القدر هذه حياتي وقد اعتدت عليها، لكني احلم دائماً باليوم الذي سوف افتك فيه من وجوهه الودرة
خالتي ممكن اروح معاكم الحفلة >>> سألتها وقلبي يدق كما طار طقاقة في وسط عرسِِ
تعالت الادخنة وثارت البراكين في راس زوجة ابوي وصرخت بي قائلة : ما بغى الا الخدم يروحون حفلات بعد ، ذلفي عن ويهي لا ارفسنكي رفسة الحصان في بطن قطوتي
ذلفت عن وجهها، واطلقات العنان لكراعيني مسرعة الى غرفتي لاختبئ فيها وانخش حتى تهدأ
وبعد مرور الـ 3 أيام، وعند حلول صباح اليوم الموعود
استيقظت مبكرة كعادتي وتوجهت الي النهر لاغسل وجهي الجميل فيه، واشتم الازهارير والورود وادغدغ فيها خدودي البيضاء كما القطن، واقطف قليلاً من ثمار الفراولة الطازجة لاحمر بها برطماي الرقيقان.
وبعد ذلك توجهت مسرعة الي الفيلا بعد ان سمعت زوجة ابوي تناديني : حوريو حوريو وصمخ جلاب وينج تعالي زهبي الريوق بسرعة راح نموت من الجوع يلا
دست 220 ووصلت العداد حده ورحت طايره للمطبخ ولا اجدعها فراري وسويت لهم الزحير علشان يزحرونه، وحطيته على الطاولة واقولهم هني عليكم بالعافية وانا بقلبي اقول يا مال الشقاق اللي يشق بطونكم قولوا آمين
حان وقت الاستعداد للحفل واستلمت شعور خواتي امشطها بمشط الحديقة لأن كل مشوط الشعر المعروفة في العالم عجزت ان تتحمل الغابات الاستوائية التي تحتل مساحة شاسعة من رأسيهما، فأبت الا أن تموت منتحرة بشرف وعزة، ولا أن تهان وتتكسر وتضيع في الوديان وتصبح طي النسيان في ظلمات شعريهما.
اما وجهيهما فشتان، شتان بينهما وبين طابوق البنيان.
فالأخير يطلع عليهما انعم واطرى وارق من خام فستان.
لطختهما وصبغتهما بأصباغ الحيطان.
فبشرتهما لا تلائمها الا هكذا ألوان.
تعطرتا وتبخرتا وانقلعتا مع امهما النسراء الى الحفل بسيارة ابوي المرسيدس اللي شراها ولا ركب فيها دقيقة وحدة.
ذهبت الي غرفتي وخمطت وسادتي وخرت دموع عيناي كما شلالات نياغرا ورحت اغني يا عين هلي صافي الدمعي
وما هي الا لحظات حتى ظهرت لي العاب نارية ومفرقعات وقامت تنرش رغوة وطلعت اغاني وموسيقى ما ادري من وين
ولا طلعت منو ؟؟؟
قولوا منو ؟؟؟
أكيد بتقولون
الساحرة الطيبة >>>> ساحرة طيبة شلون هذي بالله
لأ
الأمير مناحي بكبره
أي مناحي ولد امه
جابت لي بكبره الساحرة لأن ما لقت لي فستان جاهز في السوق كله والمصممين والخياطين كلهم مشغولين ولازم حجز قبل فقالت ادز لي الامير بشحمه ولحمه عندي اسهل
الامير يوم شافني انصدم وتسمر بمكانه ولا يقدر يتحرك
انسحر بجمالي على قولته
إي هذا الجمال والزين والدلال مو اللي بالحفلة قبل شوي، انا قلت لأمي يا تخطبين لي وحدة بيضة بياض السوريات ما جلحة ملحة وابيها طويلة ورشيقة وشعرها مثل زينب العسكري وبراطمها مثل نانسي وعيونها مثل هيفا يا إما اضرب عن الزواج واعنس، بس هي الله يهداها ما اسمعت لي وسوت الحفلة اللي ما حضرتها الا العوية والمنكسرة، انتي الوحيدة اللي احس وانا قاعد اطالعها اني قاعد اطالع لميس اللي بسنوات الضياع، والله وتحقق مناك يا مناحي يا ولد ام مناحي ولقيت العروس اللي تمنيتها.
شنو ؟؟؟؟؟؟ أي عروس يبا ؟؟؟؟؟؟ ومنو قال اني رضيت اتزوجك انته وشكلك ؟؟؟؟؟؟ ما عنكم منظرة في البيت تشوف فيها روحك ؟؟؟؟؟؟ مثل ما انته عنك طلبات في العروس اللي تتمناها انا هم عندي طلبات يا الاملح.
اكيد بتقولون انتي انجنيتي في وحدة في الدنيا ترفض تتزوج فارس مثل مناحي كامل المواصفات متعدد المزايا
برد عليكم واقول طلع مناحي لا هو اشقر وشعره جنه خنافس ولا هو فارس حتى حصان خشب يخاف يركب وطلع ساقط ابتدائية مع مرتبة الشرف ولا يعرف يفرق بين القلم الرصاص والحبر وجسمه يخرع جنه جاي من مجاعة ولا هو مفتول العضلات الا خيط صوف مفتول وفاتلينه حيل ويبي ينقطع وضروسه ضروس سعيدان تطلع لولو جمبها شقول وشخلي .....
شحجي فيك شخلي منك يا مناحي يا ولد امك
لا وازيدكم من الشعر شقة
طلعت امه مسيطرة على حياته ولا يشك خيط بإبرة الا بشورها واللي راح يتزوجها لازم تكون كمخة مثل ولدها علشان تلعب فيهم على كيفها وتسيرهم وراها مثل الغنم، فعلى شان جذي اخطبوا اختي دلال حقه وملج عليها في نفس اليوم وخذاها معاه للقصر وكملوا الحفلة علشان يحفظ ماي وجهه المالح وهو وامه جدام المعازيم اللي نصهم رفضوا يزوجونه بناته بعد ما شافوه على الحقيقة والواقع والبحر فيه قواقع ، والنص الثاني ما كانت بناتهم على هوى امه لانهم كانوا متعلمات وخريجات جامعة ومثقفات ومفتحات باللبن مثل ما يقولون.
اما انا تزوجت سايق مناحي واللي هو زي حلاتي اخو مناحي الكبير >>> شليويح <<< بس من ابوه والملكة كانت ذالته بسبب كرهها لامه، وهذا عاد كان على عكس مناحي كل شي زين فيه ماجود يقول الزين عندي فارس ولا كل الفرسان. وبعد فترة امرضت الملكة وكانت تحتضر على فراش الموت واهني ضميرها انبها على شليويح اللي ذلته من يوم ما كان صغير وعذبته تعذيت ولا غوانتاموا بكبره سووه، انبها ضميرها عليه وقررت انه اهو اللي راح يكون الملك من بعدها وكتبت كل شي باسمه كل حلالها ومالها، وطردت المفهي مناحي اللي ما عنده سالفة من القصر وراح وسكن اهو ومرته دلال عند زوجة ابوي الظالمة اللي خلته خدام عندها يكرف ويمسح وينظف ويطبخ بعد ما فلس من كل شي وصار ينطبق عليه المثل القائل : يا واخدة القرد على ماله بكره يروح المال ويفضل القرد على حاله ......
اما انا عشت الحياة اللي ظليت احلم فيها طول عمري مع فارس احلامي شليويح اللي يسوى مهند وابوه، في سعادة وهناء ... وعسى الله يتمم علينا خخخخخخخخخ
حورية مثل الجورية @hory_mthl_algory
عضوة نشيطة
يلزم عليك تسجيل الدخول أولًا لكتابة تعليق.
ههههههههههههههههههههههههه يسلمووووووووووووووووووو امووووووووووووووووووووورةههههههههههههههههههههههههه يسلمووووووووووووووووووو امووووووووووووووووووووورة
الله يسلمج حبيبتي عهود لمسة جود
والله جبرتي خاطري بردج :44:
محد عبرني غيرج :icon33:
بس عاد لا تنسينا بالتصويت >>> طرارة وتتشرط خخخخ انتي خل احد يرد على موضوعج وبعدين تأمري
سواء كانت من بين الفايزين او لأ
ما بتفرأ معي >>>> على قولة اللبنانيين
اهم شي انكم تستمتعون بالقصة وتضحكون وتنبسطون
هذا اهم شي عندي
يا عسى الفرحة ما تفارق قلوب بنات عالم حواء الغالي
والله جبرتي خاطري بردج :44:
محد عبرني غيرج :icon33:
بس عاد لا تنسينا بالتصويت >>> طرارة وتتشرط خخخخ انتي خل احد يرد على موضوعج وبعدين تأمري
سواء كانت من بين الفايزين او لأ
ما بتفرأ معي >>>> على قولة اللبنانيين
اهم شي انكم تستمتعون بالقصة وتضحكون وتنبسطون
هذا اهم شي عندي
يا عسى الفرحة ما تفارق قلوب بنات عالم حواء الغالي
الصفحة الأخيرة
يسلمووووووووووووووووووو امووووووووووووووووووووورة