السلام عليكم ..

بغيت أسأل واللي تعرف تعلمني على طريقة عمل الشوربة اللي ناكلها في المطاعم الايرانيه غير الشوربه اللي يسمونها الاش

لا في غير مع الدجاج بس مره حلوه ابغي اتعلمها يا ناس
25-10-1424 هـ, 01:14 مساءً
 

لا توجد تقييمات لهذا الموضوع

يمكنك البدء بإعطاء تقييم عبر الضغط على النجوم أدناه:
5
4
3
2
1
الشوربة ما عرفتي اسمها
انا احتمل انها شوربة الشعير
شوفي انا اعرف الطريقة بس ما اعرف المقادير بالضبط شنو
المقادير:
صدر دجاجة
بصل مقطع شرائح رقيقة بالطول
قليل من الكركم ( رشة )
نصف كوب شعير او حب هريس (منقوع اكثر من ساعتين )
جزر مبشور (حبة كبيرة )
كوب من صلصة البشاميل او اذا تحبين الكريمة الطازجة
قليل من الملح
الطريقة
ضعي صدر الدجاج في الماء ودعيه يغلي وشيلي الزفرة
اضيفي البصل والكركم
اضيفي الشعير او حب الهريس ودعيه يطبخ ولما شفتي الحب اشوي استوى اضيفي الجزر واتركيه على نار
هادئة
اضيفي الملح واخر شيء تضيفين البشاميل ولازم تصير شوي ثقيلة وانت عاد شوفي الملوحة واضيفي شوي ليمون والف عافية وان شاء الله تضبط معاك اي على فكرة الصدر لما يستوي طلعيه من الشوربة وسويه شرائح رقيقة وردي حطيه في الشوربة وتسلمين
26-10-1424 هـ, 08:55 صباحاً
 
تسلمين حبيبتي أمل الكويت وفيتي وكفيتي ...

بس الشوربة اللي اقصدها انا فيها بقدونس وشبنت ... اذا تعرفينها قوليلي لان كلناها انا وريلي في مطعم من المطاعم الايرانية وعاجبته وايد ...

بس الطريقة اللي قلتيلي اياها بعد كلتها لما زرت ايران وايد حلوه

تسلمين يا :24: ولج مني الف تحيه وسلام

اقول اكيد الحين عندكم برد في الكويت ... يا حلو البرد يا حلوه
27-10-1424 هـ, 07:18 صباحاً
 
تستاهلين يا بنت الامارات والله اليوم بالذات البرد زايد شوي وانا قاعدة ميتة من البرد ومتلحفة بالبطانية ومقابلة الكمبيوتر. بالنسبة للشوربة هل كان فيها شعير ام ماذا؟ آه ذكرتينا باكلات ايران. على العموم انا حاطة موضوع عن الاكلات الايرانية مثل كباب برك وجوجه كباب وان شاء الله باضيف كم وصفة بعد
وعليك بالعافية يالغالية :24:
27-10-1424 هـ, 07:28 صباحاً
 
لا ما كان فيها شعير ... كانت مثل الاش بس مو اش ... شنو هذا لغز

يعني ما أقدر اوصفلج الشوربه كانت حلوه وايد وريلي خابصني يقولي روحي الانترنت خلي يعلمونج ... مع ويهه كأني كل شي انا تعلمته من الكمبيوتر .. خخخخخخخ ... ما يدري الفقير انا في أول زواجنا كانت كل أمي تطبخلي واروح اييبه من عندها واقول أنا طبخته لين ما كشفني ... ههههههههههههه والله ايام


المهم ما ابغي اعذبج حبوبه خلاص مو لازم هالشوربه
27-10-1424 هـ, 07:45 صباحاً
 


الساعة الآن 10:15 .