تعالوا شوفي قصتنا واللي ظلمونا!!!

آه من الظلم يا بنات... حابة أفضفضلكم وأطلع اللي بقلبي...

قصتي هي إني متزوجة من ثلاث سنوات تقريباً وعندي بنوتة الله يحميها، وزوجي من ثمان سنوات بشتغل في مشروع بملكه أبوه واثنين من أعمامه وعمة.. العمة وعم من المالكين ساكنين في الخارج... وهدول يا بنات المالكين كلهم نيتهم الله يعلم فيها على قد ما فيها غل وسوء نية، من بداية المشروع وهو مشاكل في مشاكل.

الآن زوجي هو مستلم كل شي في المشروع، كل الهم على راسه، هم بس بتأمروا وبسمعوا كلام...والله ويشهد الله إنه زوجي بحرق دمه على هالمشروع، وبشتغل ليل نهار فيه ودائما أنا وهو مشاكل علشان دائما غايب عن البيت... ما عنده عطله أسبوعية ولا حتى عطلة عيد.. ولسة الأدهى الراتب اللي باخده عدم ويا ريت باخده كمان، إلا بالتقسيط المريح وكتير أشهر ما باخده إذا كان الشغل تعبان... وبتسجل راتبه دين، ولما بشوفوا إنه صارله دين كبير بعمله معه اتفاقية وبشطبوله ثلاث أرباع الدين وهو ما بقول اشي بوافق...

كذا مرة يكون المشروع بحاجة لدفعات طارئة، ياخد من فلوسنا ويدفع، حتى مرة وصلت إنه يفتح الحصالة وياخد اللي فيها ويدفع دفعة مستعجلة... ووين ووين على ما يرجعهم وساعات ما يرجعوا.

ومن سنتين انزنقوا مادياً وكان بداية موسم ولازم يعملوا تجهيزات للمشروع، وأنا كان في حسابي مبلغ مدخرته من وظيفتي، قام طلبه مني على أساس يسددلي إياه الموسم اللي بعده، وأنا وافقت وأعطتيه ودفعهم، مع إني من داخلي مش راضية لإني عارفة إنه صحاب المشروع ما بستاهلوا وما بثمر فيهم المعروف.

حياتنا كلها فوضى وتعب من ورا هالشغل، هذا غير المشاكل اللي دائما بتصير والكلام اللي متل السم اللي بسمعوا زوجي منهم فوق كل اللي بعملوا زوجي، ما حدا عاجبه اشي ودائما حاطين سبب المشاكل عليه.

ومن كام يوم صارت الشغلة اللي فجرت كل شي.. أجت العمة اللي إلها حصة من المشروع من الخارج، وواضح إنها جاية وناوية لزوجي والمؤامرة محبوكة ضده... أجت وعملت مشكلة وطلعت كل القديم والجديد وطلعت كل المشاكل في وجه زوجي وإنه هو سبب الفشل والمشاكل، وفوق هذا كله صارت تقول: إنت كيف بتاخد فلوس من زوجتك وبتدفعهم للمشروع، بأي حق بتعمل هيك!!! اتخيلوا فوق ما هو زوجي عامللهم معروف لسة قاعدة بتحمله بجميلة وبتحاسب فيه، بدل ما تشكره، اتخيلوا الوقاحة، وآخر شي صارت تقوله: اثبت إنك دفعت فلوس للمشروع!!!!!!!!! أنا لما عرفت انصعقت وقلت مش معقولة قلة الدين وصلت لحد هون إنها تنكر فلوسنا!

آخ يا بنات .. والله زوجي حالته حاله، اتقاتل مع عمته وصرخ في وجها وانفجر فيهم كلهم للمرة الأولى وترك الشغل.

أنا والله فرحت من كل قلبي إنه ترك الشغل، طول عمري نفسي يترك هالشغل ويبني نفسه في شي تاني وهذا اللي بدا يعمله.. هلا هو ماشي في مشروع ثاني وإن شاء الله يزبط مع إنه راح ياخد قرض ويكون علينا ديون بس أنا فرحانة وراضية ومتأملة إنه ربي راح يوفقنا ونبدا حياتنا من جديد، وفلوسنا بإذن الله راح نرجعهم غصب عنهم.


معلش كلامي ملخطب والقصة فيها تفاصيل كتير ومشاكل كتير ومؤامرات كتيرة من أعمام زوجي وعمته، بس ما بقول غير ربنا هو اللي شايف كل شي وعارف النيات من الداخل وقادر يجازيهم على الظلم اللي ظلموه لزوجي.

وبدي منكم يا أخواتي تدعوا لزوجي ربنا يوفقوا بمشروعه الجديد ويوفقنا نبني حياتنا من جديد بعيد عن كل قرف هالعائلة.