السلام عليكم ورحمة الله وبركاته

حبيباتي واخواتي أعضاء المنتدى
أبغى مساعدتكم...
أبغى طريقة عمل كل من
المرقوق ...والجريش ...والمطازيز....

بليزززززززززززز وبأسرع وقت ممكن

ولكم مني جزيل الشكر...

اول شي نبدأ بالجريش لانه الاسهل

خذي من الجريش مقدار كاس تقريبا يكفي 2-3 رجال


اولا اغسلي الجريش ثم حمسي البصل على النار واذا تحبين قطع من صدور الدجاج


يكفي صدرين بعدين ضروري جدا يكون معك قطع شحم <<مافي شحم مافي جريش زين>>


قلبي البصل مع الشحم والدجاج وفلفل حار بدون فتحه الي ان يذبل البصل بدون تحمير


صبي عليه ماء وحطي الجريش عليه وحطي على النار الصغيره ونار هاديه جدا مع الحديده


الموزع الي نحطها اسفل القدر


بدون تقليب وخلي فتره شيكي عليه اذا احتاج سائل اضيفي الي انت تحبين <<حليب او لبن>>


في حال اللبن حطي اللبن كل ما احتاج سائل بعد مرور ساعتين على الاقل واربع ساعات على الاكثر


طفي النار ازيلي قطع الشحم واضيفي علبة قشطه اي نوع مو مهم


خذي مضرب البيض واضربي الجريش الي تشوفين قطع الدجاج صارت خيوط


بعدين رجعي على النار بس ثواني عشان يسخن


اذا تحبين بالحليب خذي مقدار 2-3 فناجيل قهوه حليب بودره وحليها مع ماء واضيفي الي الجريش

والباقي مثل ما هو


في النهايه لازم يكون عندك بصل مفروم تقريبا بصلتين قلبي على النار مع سمن اوزيت


وحطي عليه مسمنه وشوي بهار مخلط وممكن تستغنين عن البهار


بعد غرف الجريش حطي الخلطه على الوجه وعليك بالعافيه




اما المطازيز والمرقوق فامرهم سهل بعد اول شي لحم او دجاج يكون مطبوخ وخالص


مجموعه من الخضار الي تحبين <<كوسى -جبى-جزر-قرع-بطاطس-باذبجان->>


بعد سلق اللحم تصفى المرق من البهارات ثم نضع جميع الخضار ماعدا القرع


اذا حبيت تحطين باذنجن ضروري قليه قبل


بعد وضع الخضار بـ 5-10 دقايق حطي الطماط والصلصه والبهارات والقرع في نفس الوقت


بعد مرور 5 دقايق اخرى حطي قطع المطازيز او شرايح المرقوق وخليهم على نار هاديه جدا


عشان ما يصقط بالقاع ويحترق


بالنسبه للعجين الخاص بالمطازيز والمرقوق >>>عجينه مكونه من دقيق بر +ماء +ملح +زيت فقط


افرديها على الطاوله وقطعيها بالفنجال او البياله اواذا توفر عندك الاله الخاصه بها ازين


والمرقوق اما انك تفردينها على يدينك مثل السمبوسه والمطبق او بالفراده الخاصه بفرد


البف والسمبوسه وطليعها بشكل شرايح رقيقه جدا وحطيها في القدر وحده وخليها شوي


بعدين وخريها بحذر بعدين حطي الثانيه لا تحطينهم فوق بعض عشان ما تلزق في بعض


وتتعجن ضروري ان كل وحده تكون بالحالها


الى هنا اكون انتهيت عليكم بالعافيه واذا بغيت شي ثاني عندك الخاص انا في الخدمه
mona_daloo3ah

مشكوره عيوني كفيتي ووفيتي
تسلم يدك على عمل هالبخات الرائعة وبصراحة انا اموت بالجريش


الساعة الآن 02:07 .