ساعدوني بنات على وجه زواج ( الله يوفق ويسعد للي دلني

الله يوفقك ان شاء الله البنات يقدرو يساعدوك

انا خايفه مره ومرعوبه خايفه افشل في زواجي خصوصا لاعندي ام ولا أخت حتى عمتي مقدر اثق فيها كل ماقلت لها كيف اعمل كذا قالت بكره رجالك يعلمك ؟ غريبه


بساعدك اوكي

أولا نــــــــبدأ بالحجـــوزات المطلوبـهـ:


حجز القاعـــه
حجز المكياج والشعر (للعرس والحنا والصباحيه والهديــهـ) المكياج روحي قطره ندى ولا شيفون
حجـز الكوشه والاضاءه
حجزالتوزيعات
حجز التصوير واختيار البوم العرس
اختيار بطاقات الدعوه
حجـز الفـرقه
حجز الأمن ( تفتيش جوالات الكاميرا) فيه بعض القاعات تقدر تامن لك دي جي وتفتيش جوالات انتي اسالي وشوفي

_________________________________________


ثانيــا قائمة مشتريات العروس :



الفساتيــــــن :

1-فستان الزواج ( تفصيل - ايجار- جاهز )
2-فستان الصباحيه خوذيه بلون سكر او وردي فاتح ولو يكون تحت الركبه يجيى احلى
3- فستان الهديــه
4- فستان او فستانين زياده على حسب انتي شلوون ><< لا تكثرين فساتين لان ممكن تحملين ولا يصلحون لك <<يعني تروح موضته
_______________________________________

الجلابيات :

1-طبعا تختلف الوحده عند بيت زوجها بتسكن تحتاج كميات من الجلابيات اكثــر .. يعني من 5 الى 10 جلابيات لاتكثرووون ......وفيه بنات مايحبون الجلابيات فلاتتعبون نفسكم >> واذا انتي وزوجك من2 الى 3 تكفي لكسر الروتين عن التنانير القصيره والجنزات >>>لازوم يشتاق ومايتعود على مظهرك عاد تلبسين ماتلبسين ماتفرق عنده
2- جلابية الحنــا أو فستانها ( طبعا شعبي)

________________________________________


قمصان النوم :

كل عروووس لاتكثر عن 15 قميص نووم لانها بتمل منهم وبعد الزواج بتشتري ... طبعا يتنوعون بين الطويل والقصير وبوفتحه والرئيـــــــيسي الي حق اول ليله يكون طويل ومستر ( مايمنع يكووون دانتيل وشفاف طبعا ) ولون العرايس المعتاد للون ليلة العرس هو السكري ودرجات البيج شوفي كولكشن نعومي لاول ليله رووووعه الصراحه وفخم بس لا تاخذينه ابيض

__________________________________________

البجامات :

تنوعون بين بجامات الحرير والشورتات والبجامات القطنيه ( بتحتاجونها ايام الدوره ) وبعد لاتكثروون يعني 10 كفايه .. وطبعا مايحتاج اوصي عالسليبرز عشان نكمل الطقم >> حركات...والارواب وانتبهي تكررين الالوان ولا الموديل

_________________________________________


الملابس الداخليـــــه:
من15 الى20 طقم


_______________________________________


ملابس البيت :

طبعا ملابس الغرفه اقصد اوالبيت لوكنتي بروحج وتتنوع بين برمودات وتنانير قصيره وحركات دلع .. اخذوا الاشياء العمليه الدلوعه (شرايكم بالتعبير) عشان تنفعكــم هاذي لاتاخذينها ماركات خوذيه من بي اتش اس او سيتي بلازا ولا سيتي ماكس سما سناء اوكي

_________________________________________


ملابس السبورات :

جنزات ... وتيشيرتات ... قمصان كشخه وعمليه ... حزامات ... وماالى ذلك

_____________________________________________


البــدل والتنانير :

تحتاجين من 4 الى 6 بدل كشخه لانج من عقب العرس بتجيييييج زيارات كثيره وبتحتاجينها .... والي بتسكن مع اهل زوجها بتحتاج التنانير الساده العمليــه
((جينز + اسود+ كحلي ممكن بني لو حبيتي ))

___________________________________________


العطورات والكريمــات :

بتااخذينلك كذا كولكشن عطور مع كريماتهم + عطور عربيه (دهن عود ومخلطات وبخور) + عطور فرنسيه+ مسك المنطقه الحساسه

وبعطيك اسمي عطور بتفيدك (( نينا ريتشي + جيفنشي الجديد << هذا تدخلين معه عالم ثاني + جينفر لوبيز القديم +نرسيسو>>الوردي مخفف وبارد والاسود ثقيل الاسود يصلح لسهره + miss dior ذا نعوووووم +عطر من مكياجي اسمه حبيبي حلووو وهادي +ستلا)) وكل مره تطلعين السوق شمي لك عطر ولا عطرين بس خوذي لفه بينهم عشان ماتخلط عليك الروايح وتخذين شي مو حلو
__________________________________________

الشنــــــط (الحقائب) :

العرووس تحتاج الشنط كثيــر فلازم تكون حريصه انها تنوع وتاخذ ( شنطه او ثنتين عمليات لشهر العسل + شنط سهره بالالوان المهمه مثل الاسود الذهبي الفضي + شنط ماركــات راقيــه ) ....
شنط لتجهيزاتك (طقم) فيه محل الشماسي الي مقابل هايبر بنده ((سوق العزيزيه))+ شنطة مكياج + شنطة للمجوهرات
_________________________________________

العبــــــايات :



عدد 6 عبايات (أطقم طبعا) ( 3 راقيات للمناسبات + 3 عمليــات فيهم حركات خفيفه وممكن تفصلين وحده ساده )
وخذي لك 4 طرح وحده شك وحده تل وثنتين عاديات بشويه نقش

_______________________________________


المكيـــاج :


كريم أساس للسهرات ( ديور).
- كريم أساس للاستعمال اليومي ( ذا بودي شوب).اوماكس فاكتور
- أساس استوديو فيكس من (ماك)
- بودرة مضغوطة من (كانيبو ).
- بودرة مضغوطة للاستعمال اليومي ( ماكس فاكتور).
- لووز باودر ( من شانيل).
- مثبت مكياج ( جيفنشي).ويمدحون ماك
- كريم ترطيب قبل المكياج من بدي شوب
- اللمعة دايموند باودر من ( ميك أب فور ايفير)
-الكونسيلر تاتش أوف لايت من (ايف سان لوران ).
- و الكونسيلر المتنوع الباليت الكامل من ( ميك آب فور ايفير).
- قلم الكحل الأسود من لانكوم و ماك.وديور
- ماسكرا من استي لودر.
- و ماسكرا هيبنوس من لانكوم.
- الآي لاينر آرت لاينر من ( لانكوم)
- الشدو:
بيق مينت من ماك للسهرات بآخذ ألوان معينة .
- مجموعة شدو منوعة بين المات و اللمعة و الكريمي من ماك و بن ناي و نوبا
- علبة الشدو الكاملة من مكياجي ولا بدي شوب للاستعمال اليومي و الخفيف .
البلاشر :بودي شوب خوذي الخوخي
نوبا و ماك.
- الأرواج و الجلوسات:
- ماك و نوبا و ميك اب فور ايفير و جيفنشي.
-فرش المكياج و قطع اسفنج :
بودي شوب و ريد إيرث وماك . ومستحضر منظف للفرش من ماك.
مثبت الشدو:
من ماك رهيييييييب و يخلي اللون يثبت و ما ينثر على الوجه.
____________________________________________



مفــرش السريــر :
راجع لك اختيار العدد بس اعتقد 2 كفايــه ..

______________________________________________

الذهب والمجوهــرات :

نصيحه لكل عرووسه لاتكثرين من المجوهرات لان راح تجيك هدايا كثيره ... يعني تاخذين طقمين او 3 الماس وذهب ابيض .. طقم ذهب أصفر(طبعا لوانتي من محبين الذهب ممكن تاخذين اكثـر) .. والباقي نوعي بين كم خاتم وأساور لليد .. والشبكه ليوم العرس (طبعا مب شرط) ....
_____________________________________________


الســاعات :

ساعة ليلة العــرس ... وساعتين وحده عمليــه لشهرالعسل ووحده كشخه للزيارات وغيرها .. (( لوكان عندك ساعات من قبل العرس فماله داعي تكثريـن)


______________________________________


الأحذيــه :

تاخذين على ألوان الفساتين الي شريتيها + أحذيه بألوان أساسيه أسود-أبيض-بيج-فضي- + أحذيه عمليه لشهرالعـسل + أكيـــد حذاء ليلة العرسـ

_______________________________________


الأدوات والمستلزمات الثانويه :

مجفف شعر (سشوار) + مكينة للحف + عدةأظافـر+ عدة خياطة+ حلاوه –شيره سويت (بكل اللغات ) + ملقط شعر + اكسسوارات الشعر + مكواة بخار + مشقر لشعرالجسم

____________________________________


الاهتمــام والعنـــايه:

حمامات مغربيه + عنايه بالجسم + رياضه + حل مشاكل البشره عند دكتور جلدي + حمامات زيت وبرامج عنايه بالشعــر + بادي كير ومانيكير +عنايه بالاسنان

_____________________________________



أغــــــــــراض ومستلزمات السوبرماركت (الجمعيه) ومحلات العنايه :

صابون (للوجه + شور جل + للجسم ) + شامبـو + مقشرجسم + مزيل مكياج + كريمات عنايه + قطن للتنظيف + أعواد الأذن + أسيتون (مزيل المناكير) + أولويز (للدوره ) + كيرفري للاستخدام اليومي + غسول المنطقه الحساسه (ستيل أو كيرفري ) + سبراي شعر + جل شعر + كريم شعر (فاشكول ) + مناديل مزيله للمكياج + كلينكس ( للشنطه ) + كلينكس معطر + فحم سريع الاشتعال (للدخون ) + ليفه الجسـم + علكه للشنطه + زيت لوز ( لجفاف البشره ) + فرشاة أسنان + معجون + معطر جوللحمام الله يعزكم + ديودرنت+مجموعة عنايه على ذوقك

_____________________________________



مقتطفـــــــــات ( لاتنسي ) :

*إعداد قائمة المعازيم من وقت شان ماتتعبين
*تأكيد حجوزاتك قبل العرس بفتـــــره
*تشاورين الناس القراب منك في الخطوات الي تسوينها لان النصايح مفيده
*لوحجزتي شي (مكياج – شعر- حنا – كوشه ) وانتي مقتنعه وعاجبـك ... لااااتخلين احد يحيرك الي حجزتيه خلك عليه
*حجز المكياج لاتحجزين لاشخاص كثير ماك عشان تاخذين راحتك ومايكون ضغط عالماكييره
*خلي لك مبلغ بسيط من المهر ينفع لبعد العرس
* لاتنسين الهدايا لخطيبك بين كل فتره وفتره (تقرب القلوب) >> طبعا عشان هو يجيب بعد هههه
* قراء سورة البقره كامله يوم العرس
* لبس الفستان والحذاء قبل العرس والتمرن على المشيه ويفضل مايكوون ثقيل عشان ماتتعبين
* تبتعدين عن السهر عشان وجهك يكون منور يوم العرس
* اكثار شرب الماء واكل الفواكه والاشياءا لمفيده (للبشره )
* لاتتوتريـــــــن ... ترى يقولون أيام التجهيز من أحلى الايـــام حتى لوكانت تعب

منقول لبنت الغالي منتديات عروس + بعض الاضافات مني

هذا جدول للمهر
قسمت الجدول الى 9 صفحات بامشي معاكم بالترتيب وباشرح لكم عن كل صفحه

الصفحه الأولى ( قائمة الحجوزات )

بتلاحظون ان فيه مكان للاسم بالصفحه الاولى وتاريخ الزواج كل وحده تكتب اسمها وتاريخها عشان تشوف كم يوم باقي 

طبعا كل عروسه بعد ماتحجز أي شيء من مكياج وقاعه وغيره تدون في هالورقه نوع الحجز والتاريخ والعربون والمتبقي وممكن تكتب رقم التلفون عشان ماتضيعه اذا احتاجته كالاتي



ملاحظه : شوفوا مثلا في الملاحظات ممكن تكتبون تذكير لنفسكم للي تبون تسوونه ثاني يوم
الصفحه الثانيه ( الملابس من فساتين وعبايات وبدل )



تكتبون ششريتوا من ملابس مع السعر ... وفي قائمة الملاحظات تكتبون الكماليات المطلوبه ... والفساتين وعرابينها وتاريخ تسلمها وكذلك العبايات كما هو موضح في الصوره




الصفحه الثالثه ( قمصان النوم والملابس الداخليه والبجامات )

الصفحه الرابعه ( عطورات وكريمات )

الصفحه السادسه ( الشنط والأحذيه )

الصفحه السادسه ( الماكياج )


الصفحه السابعه ( المجوهرات والساعات ) >>> لا تكثرين لسببين اول شي الذهب غالي هاليومين والثاني انه راح تجيك هدايا اكتفي بطقمين مع ساعتين فخمه وحده لسهره ووحده ووحده كاجول

الصفحه الثامنه ( الأدوات والمستلزمات الأخرى )


الصفحه التاسعه ( العنايه بالبشره والجسم )


http://www.7ammil.com/download.php?id=FVZVJX0U2T

الرابط لتحميل الجدول طبعا هو لبنت الغالي من منتدى عروس

(ام الوليد)

الله يوفقك ويسعدك وييسر أمرك..وبارك الله لكي وبارك عليكي وجمع بينكما في خير...

ماشاءالله غيررركم ماقصرت...