عريس القفلة :-)) الحلقة التانية

في الحلقه الماضيه وقفنا ياحبايبي عند سالفة ابوي يوم سحبني للحوش وطلعني برا وتوطا ببطني ورجع تفاهم مع ابو العروسه وهدا الوضع ورجعنا للمجلس وتفاهمنا على كل شي...
المهم اخوكم بالله كالعاده فكر ( طبعا انا اذا فكرة فهذا معناه حصل تغير بالدنيا) فكرت اني اطلب من ابوي يقول لابو نسب اني ابي اشوف العروسه يمكن تختبص الدعوه وقتها وتتفركش هالزواجه ونفتك ورحت اتهامس مع ابوي:
- اقول يبه....
- هاه وش تبي الحين ؟؟ انا ماقلت لك خلك ساكت ومنطم ؟؟
- معليش يبه بس بغيت اقول لك شي..
- قل خلصني يالله
- ابي اشوف العروسه
- وشوووووواااااااااا ؟؟؟ !!!! انت انهبلت ؟؟ تبيني اطلب من الرجال انه يفرجك على بنته .. ليه هي سياره تبي تشتريها والا وش؟؟ ( بغيت اقول.. وش.. بس خفت من المخمس )
- يايبه مافيه شي والدين سمح باني اشوفها قبل لا اتزوجها
- طيب انثبر بس وفكنا من هالخرابيط .. لعنبوا بليسك لو شفتها وشافتك هي اللي بتهون عنك يالشين ( غريبه ابوي يقول كذا رغم ان القرد بعين ابوه غزال)
- انا يايبه لازم اشوفها يمكن فيها شي والا عيب وامتشفه بعد الزواج وتصير مشاكل وطلاق وعيالي ينحرمون من الحنان والعطف ( بدا الفلم الهندي ) خلنا نتجنب هالشي من بدري
- اففففففففف منك انت وكلامك .. طيب طيب خلاص بقول للرجال اصبر شوي

وراح ابوي يتكلم مع ابو سليمان وانا حاط ايدي على قلبي واسحب ثوبي شوي شوي لاني متوقع انه بينفجر علينا باي لحظه ويطردنا وهذا اللي ابيه لذلك زهبت للنحشه
لكن اللي حصل ان ابو سليمان تبسم وقال لابوي طيب طيب لحظه وطلع من عندنا...
انا لله هالخبل صدق اني ابي اشوفها واكيد راح يعلمها ... طيب بالله عليكم لما اشوفها وش يبوني اقول؟؟؟ مايدروني اني ماعرف اتكلم مع الحريم؟؟؟ .. والله لا يجيركم بديت ارتجف وجتني ام الركب وام اربع واربعين بعد ... وعرقي قام يصب تقول انه شلالات نياقرا والا مخرج ثلاث طعش عقب المطر.. وقعدت اطقطق اصابعي واللي يسمع صوتها يقول مدفع مو اصابع هذي( قولوا ماشاء الله) المهم الحوسه مو الحين الحوسه يوم اشوف البنيه اله يستر وش بيصير...

رجع ابو سليمان وهو يضحك وقال لي :
- قم يابدر يالله
- وين ؟؟؟ ( تلاحظون العباطه بدت معي) وين تونا ماخلصنا
- يعني وين يالثور ( افااااااااااااا الرجال بدا يمون !!!) وش حنا نقول تونا؟؟؟ قم ادخل للمجلس اللي جوا شف مرتك وخلصنا .
- ايه بس انا مادل الطريق
- مهي مشكله هذا صالح يدلك الطريق ( صالح اللي بالحلقه الاولى فتح لي الباب .. الله يرجه ولا يصلحه ابد هالتيس قطعه صغير.. وداخل علينا وهو لابس سروال المفروض انه ابيض بس من الوصاخه صاير اسود وعععععع.. وفنيله علاق بس متعرفطه تقول عالكتها عنز وتافلتها بوجهه )


والله وقمت وقلت يالله صلوحي قدامي حبيبي الشاطر ( ابي العب بعقله واكل بعقله حلاوه خخخخخخخ شدعوه والله لو ان عقله رغيف ) بس لما سمع كلمة الشاطر حبيبي قال لي : اقول شاطر بعينك وش شايفني بزر قدامك كل تبن لا احوسك ... اعقل والا ترى والله ما اوافق انك تاخذ اختي .
وكان ودي قسم بالله بمربوع ( قطعة خشب مربعه يستعملونها بالبناء اذا طاحت على راس الادمي ماراح يشوف العافيه) واصكه فيها بين عيونه بس وش اسوي اخاف الحين يفشلني قدام المره ومظطر استحمله ( خايف انه مايعطيني اخته .. تكفى يالرجال انت من اللي مشاورك )

وفتح باب المجلس والقالك حرمتين متبرقعات ( اكيد الحين كل واحد منكم يقول ياليتني بدالك يابدر) وحولها ثلاث رجال كل واحد شنبه يوقف عليه الصقره ( مرة الصقر) الاول هذا الكبير واسمه سليمان ماشاء الله عليه مدرس و مطوع ويشتغل بالهيئه بعد العصر .. والثاني عزوز عسكري برتبة جندي ( مسكين مارقوه من عشر سنين يقولون شكلك حلوا وانت واقف عند البوابه تحرسها وهو يصدقهم الخبل مايدري ان الواسطه طيرتها عليه)... والثالث نواف وهذا مسكين تخرج من الجامعه قسم علم نفس ومالقا وظيفه وصار يشتغل بحلقة الخضار ومن كثر مايشوف الخضار صاير شكله مثل البطاطه دب ( لا والله والف نعم بهالنسب اللي يشرف .. لعنبوا بليسهم مافيه بينهم دكتور والا ظابط والا وكيل وزاره ؟؟؟ حتى يصيرون لنا واسطه.. وبعدين بسم الله منهم توهم معنا بالمجلس متى امداهم يجون هنا لاحوووووول ياللزقات )
قال سليمان: تفضل يابدر حياك الله اقلط ..
ويوم جيت بادخل والا الاقشر صلوح يحط رجله عند الباب ويعرقب لي وبغيت اجيكم مصفح على وجهي بس الله ستر تعلقت بالباب وماطحت ( حسبي الله عليك يالظاطور انت ) وصاروا كلهم يكركروووووون ويضحكون علي وانا طاح وجهي قدام المره... وقمت اطالع بصلوخ بغل وحقدت عليه وصرت اقول بقلبي هين اوريك بكره والله لاجي مسرع بالسياره واصدمك يعنني ما دريت عنك .. هين هين يالضبان.. وهو يطالع ويضحك ويمد لسانه علي مثل البزران ..وانا مقهووووووووور منه... المهم شفت لي كرسي جنب الباب جلست عليه ..
وقلت مساكم الله بالخير .. مساء النور.. وشلونكم .. بخير الله يسلمك... عساكم طيبين ... الحمد لله ( كل هذا سلام مني ومايرد علي الا القشران اخوانها وهي ساكته ولا قالت كلمه ... ياشين اللقافه بس) قال سليمان:
- ياخوي وراك جلست عند الباب تعال اقرب اجلس هنا جنبي ( واشر على مكان بينه وبين العروسه)
- قلت ابشررر وطمرت للمكان وجلست فيه ( مدري منين جتني الشجاعه بيني وبينكم .. الظاهر اني ماني حاس بروحي)

اخوكم بالله جلس وقام يناظر بالارض ( يكون مستحي انا ووجهي ) والحرمتين اللي موجودات وحده جالسه بعييييييييد وهاجده .. والثانيه اللي جنبي العروسه قالت لي:
- كيف حالك يابدر؟؟
- بـ بببب بخير الله يسلمك ( ياجماعه نشف ريقي من حلاوة صوتها والله )
- ماشاء الله عليك كبرت والله .. اخبرك يوم انك بزر صغير سبحان الله الايام وشلون تمضي .
- ( بزر!!!!!!!!... الحين اللي يسمعها يقول كنا نلعب بالشارع سوا ؟؟ وشبلاها هذي خشت فيني عرض.. انا مستحي اكثر منها والله )
- وش فيك ساكت ليه ماترد .. والا مستحي مني ؟؟
- والله يعني شي زي كذا .. لاني مو متعود على موقف مثل هذا ؟؟
- اي موقف؟؟
- ( ولقيتها فرصه اسوي فيها رومنسي انا ووجهي وقلت) اني اقعد بمكان والقمر اللي بيصير زوجتي جنبي ..
انا قلت كذا ويطيحون كل اللي جالسين من الضحك .. وانا ادربي راسي مدري وش السالفه.. وهم كركركركركركركررررررررررركركركركركركركر هاهاهاهاهاهاهاهاهاهاهاهاهاهاهاهاهاهاهاهاهااههاهاههاهاهاهاهاهاهاهاهاهاهاهاهاهااهاهاها..لا حووووووووول وش فيهم هذولا انهبلوا( ضحكوا من سرهم بلا) ... خير ياجماعه انا قلت شي يضحك وقالت البنيه:
- انا يابدر مو زوجتك انا خالتك ام العروسه هاهاهاهاهاهاهاهاهاهاهاهاهاها يعني اللي بصير حماتك كركركركركركركركركركركركركركركركر وهذي اللي جنبي زوجتك مها.
لما قالت كذا والله لايوريكم ياجماعه طاااااااااااااااااااح وجهي بقووووووووووووه وصار يتلون مثل اشارة المرور .. حاولت اصرف الموضوع وقلت :
- لالالالالالالا مو معقوول انك حماتي!!! ياشيخه حرام عليكي تبين تضحكين علي انتي؟؟
- والله العظيم يابدر انا حمات المستقبل ( مستقبل والا ال بي سي خخخخخخخخ ).
- بس والله العظيم مو مبين عليك ماشاء الله ( بدا النفاق تلاحظون ) بصراحه لو قلتي انك اختها الصغيره كان صدقت اما انك امها ماتخش مخي ..
وتكرها العجيز ضحكه وتحط عيونها بالارض ( يكون استحت يعني) .. وبعدين اشرت للعيال اشاره غريبه وعقبها قاموا وطلعوا وتركوني لحالي معهن .. وقالت لي الحماة : يابدر هذي مها الغاليه اللي انت جاي تخطبها وهي ماشاء الله عليها متعلمه ومثقفه وخريجة جامعه قسم ادب وهي كاملة الادب ربي يحفظها... ويوم انك خطبتها هي للحين ماقالت رايها بس طلبت من ابوها انها تقعد معك وتسولف شوي علشان تعرف افكارك وتشوف اذا تصلح لها والا لا وحنا واثقين منها علشان كذا بترككم مع بعض تسولفون وتشوفك وتشوفها وبعدين يجيك الخبر.. يالله استاذنكم .. وقامت وقفت من عندنا وطلعت وسكرت الباب وبقيت انا يابو البدور مع هالمصيبه لحالي يالله حلوها عاد.. وش السواة الحين .. بس قلت لنفسي يابدر وش انت خسران هبله وطاحت بك يالله شف شغلك يمكن انها ماتوافق عليك احسن .. على فكره هي كانت جالسه بعيد عني .. ولابسه برقع وعبايه ومتغطيه من راسها لرجليها ( يعني يكون من زينها هي وبرقعها) .. المهم ماخذيت الا قامت من مكانها وجلست جنبي ( افا وشي ناويه عليه بالظبط هذي ) بيني وبينكم بدا الفار يلعب سبع الحجر بعبي.. انا توقعت انها راح تستحي وماتقدر تقول كلمه لكن اللي حصل انها تكلمت بالاول وياليتها ياجماعه ماتكلمت .. يازين هالصوت والله انا من يوم سمعته رحت في خرايطها .. قالت :
- مساك الله بالخير يابدر..
- هلا مسا النور ( خلاص زهقت من كثر السلام والتمسي ماعندكم غير هالسالفه )
- شلونك ؟؟
- ( احمر بيني وبينكم خخخخخخخ) بخير الله يجعلك بخير .
- اعجبتني الكلمه اللي توك قلتها لامي يعني كان ممكن تكون لي ؟؟ بس الظاهر انك متعود تقولها لاي وحده ؟؟
- ( بديناااااااااااا الله يستر ) ايه اكيد انا اصلا كنت قاصدك انتي بس كنت امزح مع الوالد ( حلوه التصريفه والنصبه صح )
- بدر انت عارفق انا ليش وافقت اني اجلس معك الحين ؟؟
- والله بيني وبينك عارف وماني عارف !!!!!!
- كيف يعني
- يعني انا اصلا الي طلبت اشوفك تعرفين قبل الورطه اقصد الزواج حلو ان الواحد يعرف شكل اللي بياخذها ( الله ياخذك اقول بقلبي شكلك شينه بقوووووووه ) وفهمت بعدين من الوالده انك انتي بعد تبين تشوفيني وتتعرفين علي قبل لا تعطين رايك صح؟؟
- صح .. بس مو هذا السبب الوحيد .. يعني انا ماكنت ابي اتعرف على شكلك من برا .. انا كنت ابي اتعرف على شكلك من جوا وكــ....
- وش قصدك من جوا ؟؟؟؟؟؟؟؟؟؟؟ ( واحد فهم غلط مررررررره الموضوع )
- يعني من داخلك ابي اعرف تفكيرك وطريقته واعرف قلبك ونوعية مشاعرك ومواصفاتك
- اشوا ... طيب قولي كذا من الاول طيحتي قلبي
- ليه انت وش فهمتها؟؟؟
- لالالالالالا ابد سلامتك ..هاهاهاهاهاها انا امزح معك ياشيخه انتي صدقتي على طول؟؟؟ المهم كملي
- آآآآآآآآه طيب شكلك مزوح مره .. انا كنت اقصد اني ابي اتعرف على الجوانب الانسانيه اللي فيك من خلال حوار بيني وبينك
- ( لاحوووووول بدت الفلسفه اللي ما نفهم فيها ) طيب اوكيه تفضلي تعرفي .
- طيب بس نبي نتفق على شي بالاول .. انا ماراح اكشف عن وجهي الا بعد مانخلص كلام اتفقنا
- اتفقنا ( طبعا وافقت لاني ماودي اشوف شكلها وتنسد نفسي على طول اذا شفت خشتها )
- طيب تبداء انت تسال والا انا ابداء؟؟؟؟؟؟؟
- لالالالالا ليدز فرست ( اخس والله ماني سهل ... بس ابي اعلمها اني ديمقراطي واعرف لغات بعد حتى ماتشوف نفسها علي )
- طيب يابدر قل لي وش المواصفات اللي تبيها بزوجتك ؟؟
- قتاة احلامي؟؟؟؟؟ اممممممممممممم ( لاحظوا اللمبه اللي طلعت فوق راسي يكون افكر يعني) ابد ابيها حلوه ودمها خفيف وتعرف تطبخ وتكون ست بيت محترمه وا خلاقها عاليه طبعا وتسمع الكلام بدون نقاش وتحسسني اني رجل البيت وتبحث عن راحتي دايما .
- طيب حلو .. لكن ليش قدمة جمال الشكل على جمال الخلق ؟؟؟
- ( افاااااااا بدت تدور لها عذر لشيانتها ) لالالا مو القصد طبعا جمال الخلق اهم شي لكن تعرفين انه المراه بدون جمال الشكل ماتسوى شي .. معليش لاتزعلين مني لكن انا كذا صريح اللي بقلبي على لساني .
- الصراحه حلوه .. لكن معنى كلامك انك لو لقيت قدامك وحده حلوه راح تتزوجها بدون ماتعرف اخلاقها ؟؟
- والله مشكلتنا حنا يالرجال اننا ندور البنت الجميله ولو كنا نسال ونعرف اخلاق البنت وتفكيرها قبل الزواج ماكان حصلت حالات الطلاق الكثيره ... فماله داعي ندقق وبالنهايه هذي مسالة قسمه ونصيب من الله سبحانه وتعالى ( شفتوا كيف الرد والدبلوماسيه .. تعلموا بالله )
- طيب يادبلوماسي انت واجابتك ... انت قلت انك تبيها تطيعك طاعه عميا وما تناقشك بكلامك صح ؟؟
- صح .. وهذا شي مافيه غلط ومن حق الرجل ان زوجته تطيعه؟؟
- حتى لو كان بالغلط ؟؟
- لا بالغلط لا ماتطيعه شدعوه هو وش يبي يخليها تسوي يعني بيقول لها اكفري بالله ؟؟
- لالالالا اقصد لو كان فيه شي غلط غير الكفر .. يعني ماتطيعه ؟؟
- ايه نعم ماتطيعه ( حاس بورطه جايتني وبديت احوس اناولساني )
- طيب مو انت قلت طاعه عميا وبدون نقاش .. وشلون ماتطيعه بهذي ؟؟؟
- ( الله يلعن بليس نشف ريقي عطوني كوب ماء.. ما دري وش اقول لها هذي) شوفي يامها كلامك صح بس انا كنت اقصد انه تطيعه وماتناقشه في كل شي يقوله لها الا في شي غلط او معصيه لا سمح الله .
- اآآآآآآه يعني غيرت كلامك الحين ؟؟؟
- لالالالا ماغيرته بس نسيت اقوله بالبدايه وجل من لا يسهو ( حلو التصريفه هذي )
- طيب انت قلت تبيها ست بيت يعني ماتبي مره تشتغل صح ؟؟
- صح .. لان مملكة المراءه بيتها
- معناته انت منت ناوي تخلي بناتك تتعلم وتدخل للجامعات ؟؟
- الا طبعا ابيهم يتعلمون مو يطلعون هبلات مايعرفون شي
- طيب احنا تعلمنا وش تبينا نسوي بشهاداتنا ؟؟؟
- ( بيني وبينكم حسيت انها بتورطني مره ثانيه بس هالمره تقدرون تقولون اني اخذت على الجو وبديت اخذ راحتي بالكلام لذلك خطر ببالي جواب راح يسكتها مررره) انا اقول لك يامها انا ابي انسانه متعلمه ومعها شهادات .. علشان هالانسانه اللي بتزوجها اكيد راح احبها واعشقها لانها زوجتي وام عيالي .. فلنفرض بعد عمر طويل انشاء الله ( قولوا امين وجع ) انا مت ( فال الله ولا فالكم) او لنفرض اننا تطلقنا .. ليش تروح زوجتي من بعدي وتتبهدل هي وعيالي وتصير عاله على الناس الثانين ... وقتها بتكون عندها شهادتها وتقدر تشتغل وتربي العيال وهي معززه مكرمه ..( بس وش رايكم بالاجابه ... طلعت ذكي صح ؟؟)
- طيب زين .. يعني انت تبيني احتفظ بشهادتي واقعد بالبيت واربي لك العيال بس ؟؟؟
- اقول ممكن نخلي الجواب على هالسؤال باخر الجلسه ؟؟؟؟
- وليش ماتجاوب الحين ؟؟؟
- معليش خليه بعدين ...( احترت ياجماعه وش اقو ل لها )..
- طيب انت تحب بعد الزواج تسكن مع اهلك والا لحالك ؟؟؟
- لالالالالالالالا بسكن لحالي وش ابي باهلي ( مسكينه ماتدري ان اهلي يبون الفكه من وجهي ) تعرفين علشان الواحد يحس براحته مع زوجته وهي بعد تحس انها ببيتها..
- طيب انت تدخن او لك اي عادات مو زينه ؟؟
- لا الحمد لله ماتتن ولا اعرف التتن بحياتي ( مره ابوي صادني يوم انا باول متوسط تحت الدرج اتتن وقطع العقال على ظهري ومن عقبها وانا اشوف الدخان انهبل .. بس لاتعلمون احد تكفون) ومن ناحية عادات مو زينه ماعتقد لي عاده معينه لكن زي زي اي واحد بهالدنيا فيه الشين وفيه الزين
- طيب وش رايك بموضوع قيادة المراة للسياره وهل المراه اخذت كامل حقوقها بمجتمعنا ؟؟
- ( انا كان قلبي حاس انها دبوس وناويه توديني ابو زعبل ) اقول فكينا من السياسه .. انا جاي اتزوج والا احل مشكلة الشرق الاوسط .. الظاهر اني طالب وحده من بيت كوفي عنان ..
- هاهاهاهاهاهاهاهاهاهاها طيب طيب .. بس والله سؤال عادي مافيه شي..
- طيب انا بسالك انتي حاسه ان الاسلام والمجتمع الاسلامي حارمك من حقوقك ؟؟
- لا والحمد لله .. الاسلام كرم المراه ورفع من شانها
- اجل انثبري وفكينا ..
- طيب تفضل انت الحين اسالني
- ( بيني وبينكم يوم ضحكت هالبنيه شي غريب حسيته بداخلي... حسيت كانها وجه مالوف لي مو غريبه عني وبديت احس انها شي مختلف شي كنت ادور عليه من زمان ... يعني حسيت براحه ماقد حسيتها قبل كذا ..بس لو اشوف وجهها كان ارتاح اكثر ومدري ليه تمنيت انها تكون جميله وجا في بالي كلام ماكنت اتوقع اني ممكن اقوله في يوم من الايام ) اسمعي يابنت الناس.. انا رجال ابسط مما تتخيلين ..كافحت وتعلمت الين ماخلصت وحصلت على الشهاده اللي انا كاشخ بها ومبروزها عندي بالبيت .. والحمد لله توظفت وظيفه محترمه وبراتب محترم ... وهذا واحد من احلامي وتحقق .. حلمي الثاني برضه بسيط وهو اني القا انسانه محترمه ومن بيت محترم اقدر اكمل حياتي معها واكمل دوري بالمجتمع وابني معها اسره نربيها على الصلاح وخدمة دينها .. ونكون امتداد لاسرنا واهلنا ... ابيها نسانه معتدله في كل شي تتحملني واتحملها ونكون ستر وغطى على بعض ..طموحاتي توافق طموحاتها ..ماتكون بدون طموح ونخسر حياتنا ببلاش ..ولا يكون طموحها عالي ونحس بالياس من الحياة اذا ماحققناه .. ابها تناقشني بكل صغيره وكبيره ماعندي مانع بس تعرف متى تختار الوقت المناسب للنقاش .. وتكون ودوده ونفسها طيبه مو شينه وجلد مروح .. ابيها تحبني مثل ما احبها .. تعطني اللي ابي وانا اعطيها اللي هي تبيه ... يعني باختصار تبادلني العطاء بمثله ..وتكون هي فعلا نصفي الثاني اللي مقدر استغني عنه ( الله الله الله يابدوري صرت فيلسوف وحنا مو دارين ) هذا انا اختصرت لك كل حاجه ابيها منك .. اذا نتي انسانه حاسه اني بلقا معك كل هالشي على عيني وراسي ويشرفني انك تكونين زوجتي مانتي قادره قولي لي وخلي كل واحد مننا بطريقه احسن ( على الله عقب هالكلام بس تطلع حلوه اهم شي والاراح تعبنا على الفاضي)
بعد ماقلت هالكلام قامت البنت تطالع بي مثل الدلخه مو عارفه وش تقول .. كانها مو مصدقه ان مثل هالكلام يطلع مني .. وجلست خمس دقايق ومانطقت حرف بس تطالع بي من فوق لفوق ...
وقالت طيب يابدر انا الحين عرفت كل اللي ابيه منك ... بقى شي اخير وهو انك تشوف شكلي بس الله يخليك انا يكشف لك وبعدها على طول بروح داخل وسامحني على اللي بتشوفه وانساه لو ماعجبتك ...
ووقفت قدامي ومدت ايدها على غطوتها تبي تشيلها .. وحطيت ايدي على قلبي وصرت ادعي واقول الله يستر بس .. الله يستر بس ... وضرب طبلون دقات قلبي ... وايدها ماشيه لغطوتها .. وماشيه .. وماشيه .. وماشيه

بالحلقه الجايه والاخيره راح نعرف وش اللي صار بالظبط ياتنتهي بخير والا بماساة الله واعلم

الى اللقاء