طلب من زينة المزيونة الوردة

بردة بلاومن عيوني الحلوين الاثنين

عزيزتي, اولا ما حد يعرف بردة بلاو بهالاسم (يعرفوها باسم اوزي سوري)... بردة بلاو كلمة تركية واصل الاكلة تركية... هذا تاريخ الاكلة...
اليك الطريقة ... غالية والطلب طيب كلش كلش

المواد:
أولا:العجين صح ؟؟؟
آني اسويه بالبيت وهي تشبه عجينةالبورك (العراقي)
طحين ابيض+ ملح+ماي+بيكنك باودر(لكل كوبين.زملعقة واحدة)وتعرفين اختي الطباخة ماتعرف المقادير لأن مثل ما يكولون "عيني مكيالي"
اما بالنسبة لحالتك (احسن لاتعبين روحج ولا تتعلمين ....ترة الرجال والعيال ينامون براسج على أبو "طيب طبخها")
فممكن تستخدمين عجينة جاهزة "الجلاش" المستطيلة وتسوين منها طوبات طوبات

ثانيا : الحشوة مو؟؟؟؟؟
عبارة عن :
1- رز مسلوق فقط ومصفى (ما مهدر)
2- لحم غنم مفروم ومحموس مع بصل وبهارات
3- بازيلا مسلوقة (اوعلبة ولو آني افضل انت تسلكيها)
4- بيضتين مسلوقات زين, مقشرات وحمرات بزيت غزير
5- كرات كفتة مقلية(لحم غنم+بصلة+معدنوس اوكرفس+بهارات كفتة) او أو أو
دجاج مسلوق ومفلس (يعني مخلي من العظم ومسويه قطع قطع)
6-بطاطا مقلية(شوفي حبيبتي, اذاالبطاطا صغيرة "دعابل" فاسلقيها نص سلق,قشريها وبعدين ملحيها بايدك وفركيها بالملح وبعدين اقليها .. اذا كبار ..فقطعي البطاطا الى حلقات ارتفاعكل واحدة 2سم وبعدين قطعي كل حلقة نصين وقشري كل نص بحيث تدورين القطعة ..اشلون ؟؟ انحتيها نحت بحيث ماتبقى فيها حواف حادة فتصيركل قطعة بيضوية او دائرية وبعدين ملحيها واقليها)
7- زبيب+لوز مقشور ومبشورطوليا+صنوبر+كاجو+فستق مقشور(وحسب الرغبة تحطين كلهم اوبس اثنين .. لكن الللوز ضروري) تحمصين كل واحد علىجهة(خلي بالك,الزبيب .. شويةنار ..ينتفخ....شيليه)
8- بهارات برياني + ملعقةكوب مي زعفران
9- ملعقتين سمنة(او زبدة)
هسة حطي السمنة او الزبدةبطنجرة كبيرة شوي...والنار هادية...تذوب السمنة ..حطي الرز .. قلبيه بالسمنة ... حطي البهارات والملح والزعفران .. قلبيه مرتين ثانية والحين حطي كل الي عندك من 2 الى 7 ....قلبيه وينخلط زين

طريقةالطبخ::
الطريقة الاولى شوي : تجيبين صينيةالفرن وتدهنيها بشويت زيت, بعدين تجيبين العجينة (الجلاش اخذي 3-4 طبقات مستطيلة كاملة واذا العجينة بيتية فافتحيها بالشيبك الى سمك بسيط جدا) حطي شي م الحشة بالوسط ولمي الاطراف ...مثل البقجة (اذاعجينة بيتية فحاولي تحكمين سدها وتقطعين باقي العجين ... واذا جاهزة ...فممكن تستخدمين مي وطحينوتسدين الفتحة العلوية وتلزكين العجين على بعضه)
صارت عندج طوبة .... ادهني الوجه بزيت وشيليها وحطيها بالصينية ز.وسوي باقي الطوبات الى ان تخلص الحشوة ز. اشويها بنار وسط لمدة 25 دقيقة وبعدين افتحي النار عليها من فوق حتى تتحمر ..احكمي غلق الفرن ياحلوة...

الطريقة الثانية تهدير:::: تجيبين طنجرة تيفال حجم وسط, تدهنيها بزيت ...تحطين العجينة فيها بحيث تطلع الاطراف من الجوانب (اذا جلاش ...فاستخدمي3 طبقات X 3 طبقات بحيث يشكلون علامة الزائد "+" والاطراف برة الطنجرة .. واذا عجينة بيتية ... فافتحيها بشكل دائرة قطرها بمقدار ارتفاع الطنجرة)
حطي الحشوة بالطنجرة بحيث ترصيها رص.. وبعدين اطوي الحافات بحيث تسدين اعلى الحشوة بالكامل (يعني تسوين الطنجرة قالب) وحطي مشبكعلىالنار واتركي الطنجرة نص ساعة ... تستوي العجينويتهدرالرز بداخلها ... تكدرين تحمرين الوجه بالمشعل المحمول او تتركيه .. لان القاعدةاكيد تحمرت وانت راح تقلبيها بعدين والقاعدة تصير الوجه....

ملاحظة : المواد الي ذكرتها ... حسب رغبتج ...من كل شي شوي شوي ...يعني بازيلا مثلا نص كوب,,رزكوبين,,, كفتة 10حبات ... وهكذا مثلانص دجاجة مفلسة بدال الكفتة... كوب لحم محموس ... كلها بعدين تصير كمية زينة لماتخلطيهم...

وتحياتي واي سؤال آني برسم الخدمة يامعودة ولا تشيلين هم

الله يعطيج الف عافية والله اشعر احد خلى مي بارد على قلبي :17:
حبيبتي زينة اني بكندا و لا اعرف اذا فيه عجينة اسمها جلاش ، فهل عجينة البيت اذا اعملها نفس عجينة البيتزا؟
والله لساني عاجز عن شكرك ، وحيدة بهالبلد واخواتي امر مني بالطبخ العراقي الطيب
عاشت ايديج

صباح لخير يا اريج الورد
أي يصير, بس ما تحطين فيها زيت كثير(والاصل ... بدون زيت ولاخميرة).....ولاتستخدمين خميرة (بس بيكنك باودر) ولما تفتحيها ما تخليها سميكة ....وخملي احد يساعدك حتى تسيطرين على العجينة وتكعديها بالجدرية زين وتطلعين حوافها برة ... يعني تبطنيين الجدرية بالعجينة تبطين والزايد برة ولما تديرين الحشوة .....سدي الحواف وحطي الغطا وخلي تحتهاالسيباية واتركيهاتتهدروتتحمر ...او سوي طريقة الشوي بالفرن راح تكون اسهل لك ......


تحياتي حبيبتي...هسةصارت عندج موسوعة للاكل العراقي اسمها "زينة المزيونة"آمري ومراح ارجعج ابد

مستعدون لتلبية الطلبات كلها:
دولمة مشكلة, شيخ محشي, لهانة(ملفوف), محشي البطاطا ...
كبب(كبة السراي الشهيرة) وكباب وعروك ,عروك موصل, باسطرمة,
كباب الشيش وكفتة ودجاج وضلوع, لحم روست
باجة وكبايات وتشاريب حمرة وصفرى
قوزي الخروف
تمن بالتاجينة(لوبيا,كلم, جما, روبيان) ,مقلوبة سودة وحمرة وصفرى,برغل وشعرية, تمن وماش اخضر, تمن وعدس, تمن احمر
سمك مسكوف, مشوي بالفرن ومقلي ومحشي ومطبق بالتبسي, رز السمك الاصلي
فطاير وبورك طري وناشف مع حشوات متنوعة
مرق فاصوليا, قيمة, باجيلا خضرا, بربين, زهرة, باذنجان وشجر
تباسي عش العصفور, شجر(كوسة), بطاطا, فلفل ودجاج
دجاج مشوي , ومحشي
كل انواع السلطات(بالحصار صرنا نستخدم الزهرة بدل الحمص وسمينها "قرنبطحينة") والمقبلات (مخللات بكل انواعها الخيار المحشي والباذنجان والفلفل والشلغم الاحمر والقرنابيط واللهانة ومخلل التركمان الشهير الحار بالزيت)
خبز تنور وخبزالخضار بالتنور
جبن ولبن تصنيع بيتي
زنود الست العراقية, حلاوة الجزر وحلاوة الطحين والشعرية والزردة والهريسةوالمحلبي والترايفل والحلقوم والدهيين والساهون وشباك الحبايب والسمسمية والجوزية

هذاالي في بالي هسة ... تذكري انت الباقي .....
الله ايصبرنا... تصدكين عاد ...آني لما اسوي اي اكلة...اريد ابجي بدل ما آكل ......لأني ........... اتذكر آخرمرةسويتها هناك او اكلتها ....... فالعبرة تخنكني ... وتنسد نفسي عنها ... صح عشنا الحصار وشفنا الويل .. وكثيرمن المواد اختفت (اختفاء فعلي او لزيادة اسعارها) لكن كانت الاكلة لها طعم غير وانت بين اخوانك وبيتك ..... هسة الواحد يشوف الاكل ويسويه ويتنغصه لكل طفل وطفلة وشاب وشابة هناك ما شافوا غير القتل والخوف والامراض....والجوع.. بلد العزوالحضارات الانسانية ...بلدالعلم والعلماء ... بلد العرب الاول ....عراق واسمه عراق .... أرض السواد...بلد النهرين .....

بغداد يا قلعة الاسود.. يا كعبة المجد والخلود

اللهم فرج كرب المكروبين وانصر عبادك المسلمين في مشارق الارض ومغاربها واهديهم الى صراطك المستقيم
اللهم انصر عبادك واخزي اعداءالدين ...المجرمين الكافرين من المغضوب عليهم والضالين
اللهم اجعل كلمتك "كلمة الحق" فوق الباطل ليمحقه كله "ان الباطل كان زهوقا"
اللهم آميـــــــــــــــن
الله اكبر ... الله اكبر ... الله اكبر ... ولله الحمد
لا إله إلا الله وحده, صدق وعده , نصر عبده, اعز جنده , هزم الاحزاب وحده ..... لا إله إلا الله

في امان الله

والله يا زينه في اول كلامك ضحكتيني وفي اخر كلامك بكيتيني,ما اقول الا الله يفرج كربتكم,ذكرتيني بصديقاتي العراقيات ايام الغربة الله على الكلام الحلو والطبخ الزين.

:26: :26: :26: :26: